1 Tapëtï ko’do yaa, Yësu ënyï ï’bë hulëhu mï Kaparanamo ehe kö’du yöyö apere rë nï iya mo ëdï liŋɔ. 2 Vïdï kayo ayinnï ga bi kölö, ani bi ako ɔsɔ dë mï loko, gbï le yaga ha loko bi kpa anza dë. Yësu ëdï kö’du yöyö ne yëtï zi zë. 3 Vïdï kora sowɔ ɔkɔnnï, ëdïnnï kora mati eŋe kyere akaŋo ne kïnjë kika mo zi Yësu. 4 Ga kö’du vïdï kayo, zë ɔ’bɔnnï dë zi kora ne kika mo zi mo. Here zë ïtïnnï bïngö ta komo lembe mbïyï bi mati Yësu ëdï. Mati ayëhunnï bi ne ku, zë izannï kora ne akaŋo, ëdï ako’do da laŋba. 5 Mati Yësu ongɔ hala ëdïnnï kö’du koma aba, iya zi kora keŋe ne henye, "Wisi ama, kö’du kyënyë 'bëyï ila ku."

6 Vo komoyandi 'ba kö’du kï’dï maako’e mati ëdï alimannï ani ne, asösunnï kö’du, 7 "Hala mo ame’do kaa nenye here?" Ne kö’du sawiya ra. Wïrï ra nje kölö atɔ’bɔ kila kö’du kyënyë.

8 Kandi Yësu ayɔlɔ kö’du mati zë ëdïnnï asösu ne, here mo iya zi zë, "Ëdïye kö’du mahere ne sösu ga a’di? 9 Ma vala ra anza na kyigɔ zi kiya zi vo keŋe ne, ‘Ila yï ku tëmï kö’du kyënyë 'bëyï,’ kɔdɔ zi kiya henye, ‘Ënyï, ïnjë laŋba 'bëyï ne, ï’bë’? 10 Here zi ye yɔlɔ laka Wisi a Vïdï ëdï kalakonda 'ba dakaŋo nenye aba zi vïdï kila tëmï kö’du kyënyë, miya zi vo keŋe ne, 11 ‘Mëdï kiya zi yï, ënyï, ïnjë laŋba 'bëyï ne, ï’bë liŋɔ.’" 12 Here mo ënyï ta da komo zë, ehe ïnjë laŋba ënï, ï’bë gbɔ. Zë biya na rakaga, zë ayetonnï Wïrï, iyannï henye, "Wa mahere ne, dongɔ dë gba kyere."

13 Yësu ï’bë hulëhu löhu da götï föfö 'ba Galilaya, vïdï kayo atɔtɔ rë nnï zi mo ani, mo ayeto zë yandi. 14 Mati mo ëdï tï’bë lasi aba, mo i’ja vo 'be’bele kö’du ru mo Lëvï wisi 'ba Alipayo, ëdï alima mï bi 'ba 'be’bele kö’du. Yësu iya zi mo henye, "Alö’bö ga ma." Lëvï ënyï, ehe alö’bö gbɔ gɔ mo.

15 Mati Yësu ëdï wakonyo liŋɔ a Lëvï, vo 'be’bele kö’du kayo ehe vo kö’du kyënyë kayo ko’dɔ’e mati alö’bönnï ga Yësu ne, ma kayo tëmï zë adrɔ’bo rë nnï mo aba, ehe vo lö’bö 'bɔmo ëtï wakonyo ga bi kölö. 16 Vo komoyandi 'ba vo kö’du kï’dïye ru zë Farasi ne, i’jannï Yësu ëdïnnï wakonyo ga bi kölö vo kö’du kyënyë ëtï ehe vo 'be’bele kö’du’e. Here zë ako’jonnï ha vo lö’bö 'bɔmo’e, "Kö’du a’di mo onyo wa vïdï mahere ne ëtï?" 17 Yësu owo kö’du 'bëzë ne, aya’ba dɔ mo zi zë, iya henye, "Vïdï mati rë zë na laka kazi kɔɔ, ombannï dakatörö dë, nje zë ma na rakɔɔ. Mayi dë ga kö’du vïdï laka’e, mayi ga kö’du vïdï kyënyë’e."

18 Vo lö’bö 'ba Yowani Bapatisi ehe Farasiye ëdïnnï hë nnï koro. Vïdï maako’e ayinnï zi Yësu, ako’jonnï hɔ mo, "Kö’du a’di vo lö’bö 'ba Yowani Bapatisi ehe Farasiye ëdïnnï hë nnï koro, mora vo lö’bö 'bëyïye oronnï hë nnï dë gɔ mo?" 19 Yësu aya’ba da me’do zi zë iya henye, "Omba 'be’e yingɔ mati ëdïnnï bi 'ba oze ne, zi tï’bënnï kazi wakonyo? Anza here dë. Ëzë kora vo mbara ëdï gba zë aba, zë ɔ’bɔnnï dë zi ko’dɔ here. 20 Kadra mo atɔkɔ ëzë oba kora vo mbara ku 'de kazi zë akoro hë nnï 'da."

21 "Vïdï maako uru bɔngɔ ma kyïyï dë zi kɔ’jɔ bɔngɔ ma kɔɔ. Ëzë o’dɔ here, ma kyïyï ne aya’ba tisiwa aba, ehe akire bɔngɔ ma kɔɔ ne, ehe ako’dɔ ogo kyedre. 22 Vïdï maako odrɔ a’ji ma kyïyï dë gbï mï lɔsɔ wana ma kɔɔ. Ëzë o’dɔ here, a’ji ne akiha lɔsɔ wana, ehe a’ji 'dö lɔsɔ wana aba akayaŋa rë nnï. Mora laka zi kope a’ji ma kyïyï gbï mï lɔsɔ wana ma kyïyï."

23 Mï ko’do 'ba ralawo aba, Yësu ëdï atï’bë kpuru tëmï yaka 'ba nyenyo. Mati vo lö’bö 'bɔmo’e ëdï atï’bënnï mo aba ne, ayetonnï da nyenyo ne kowe zi konyo. 24 Farasiye iyannï zi Yësu henye, "Ongɔ te, kö’du a’di vo lö’bö 'bëyïye ëdïnnï kö’du mati ï’bë dë ga kö’du kï’dï 'ba ko’do 'ba ralawo ne ko’dɔ gɔ mo?"

25 Yësu ënyï, aya’ba dɔ mo zi zë iya henye, "Ako’jo’e kö’du mati Dawidi o’dɔ mï kadra nani dë, mati mo omba wa zi konyo mï kadra mati mo vïdï 'bënï ëtï na o’bo ne? 26 Here mo ï’bë mï loko a Wïrï ehe onyo mangɔlɔ’bɔ mati ï’dï zi Wïrï ne. Kö’du ne o’dɔ rë nï mï kadra mati Abiyata ra na vo karasa ma kyedre. Ëdï mï kö’du kï’dï 'beze nje vo karasa’e ra akonyonnï mangɔlɔ’bɔ ne, mora Dawidi onyo, ehe ï’dï kpa zi vïdï 'bënïye." 27 Yësu aya’ba gɔ mo zi zë iya henye, "O’dɔ ko’do 'ba ralawo ne kö’du vïdï, o’dɔ vïdï dë kö’du ko’do 'ba ralawo. 28 Here Wisi a Vïdï ëdï gbï na Yere 'ba ko’do ralawo."