1 Kadra maako aba löhu, Yësu ayeto kö’du yandi da kapa föfö 'ba Galilaya. Vïdï mati atɔtɔ rë nnï kpo ta rɔ mo ne, ëdïnnï kyɔ, here mo ëkyï mï töŋbö, alima mï mo. Töŋbö ne ëdï mï föfö, vïdï kayo ne’e ɔrɔ 'bënnï 'de yaga da götï 'ba föfö. 2 Mo alima kö’du kayo ne yandi mo zi zë tëmï mala. Mï kö’du yandi 'bɔmo ne mo iya henye, 3 "Owo’e te. Kora maako ï’bë yaga kofo kïlï mï yaka. 4 Mati mo ïlï kofo ne mï yaka, maako’e alëpï da ga gërï, ali ayinnï, onyonnï 'de. 5 Maako’e alëpï dakaŋo ma ṛï’dï aba, mati kaŋo nje tisiwa aba ne. Kandi kofo ne ötu, ga kö’du kaŋo ne ayöndu dë. 6 Here kadra ayi rïyë, o’bɔ wevo ma luru ne, ga kö’du ngara’da mo ödu dë na laka mï kaŋo. 7 Kofo maako’e alëpï mï kutë kono, övu ayasi wevo nï, mora 'de ana dë. 8 Kofo maako’e alëpï mï kaŋo ma laka ne, wevo mo asi, övu, ana ï’jö. Maako’e ëdïnnï ï’jö aba 'butëwota, maako’e 'butëmodaka, maako’e lamikölö." 9 Yësu aya’ba gɔ mo zi zë iya henye, "Mo mati ëdï mbili aba, mowo kö’du ne."

10 Mati Yësu ëdï kutï nï aba, vïdï maako’e mati owonnï kö’du mo ne, ayinnï zi mo vo lïtu 'butë dɔmorïyö ëtï, ako’jonnï hɔ mo zi mï mala ne’e yada. 11 Yësu aya’ba dɔ mo zi zë, iya henye, "Kö’du koho 'ba damöku 'ba Wïrï ï’dï ku zi ye. Mora zi vïdï maako’e kö’du koho akayandi tëmï mala.

12 Here zë akongɔnnï akongɔ,

mora 'de kaa ongɔnnï dë.

Ëzë o’dɔnnï here akotɔ dë nnï zi Wïrï,

akila zë."

13 Yësu ako’jo hë zë iya henye, "Ayɔlɔ’e mï mala ne dë? Akayɔlɔ’e mala maako’e hala? 14 Vo kofo kïlï ne ïlï kö’du me’do 'ba Wïrï. 15 Vïdï maako’e kaa kofo mati alëpï da ga gërï. Kandi ëzë owonnï kö’du me’do ne, Satani ayi oba 'de. 16 Vïdï maako’e kaa kofo mati alëpï da ṛï’dï. Kandi ëzë owonnï kö’du me’do ne, ïrïnnï na rakyenyi. 17 Mora ödu dë gbo mï zë, here ne ɔ’bɔ limannï 'diri dë. Ëzë riti maako mandere wakofo ayi ga kö’du me’do ne, zë akilannï 'de. 18 Vïdï maako’e ëdïnnï kaa kofo mati ïlï mï kutë kono. Ne ëdï zë mati owonnï me’do ne, 19 kö’du sösu, lɔvɔ 'ba kɔhi, lɔvɔ kö’du wakyɔ, akakɔhɔ me’do ne, mora anannï ï’jö dë. 20 Vïdï maako’e ëdïnnï kaa kofo mati ïlï mï kaŋo laka. Zë owonnï me’do ne, ombannï dɔ mo, anannï ï’jö maako’e 'butëwota, maako’e 'butëmodaka, maako’e lamikölö."

21 Yësu alima nduwë kiya zi zë henye, "Vïdï maako here ne, oba lamba ndö kika mo hu sikɔ mandere hu sora? Anza here dë, ï’dï lamba da tarabiza. 22 Wa mati ëdï 'de kɔwɔ na koho akika yaga bikanyi. Wa mati ayöfu dɔ mo ne, akayëhu dɔ mo yaga. 23 Owo’e kö’du ne, ëzë ëdïye mbili aba."

24 Mo iya kpa zi zë henye, "Kö’du mati mëdï akiya zi ye ne, oze mbiliye na laka zi kowo mo. Wa yeri mati ëdï ako’dɔ’e zi oka’e, ako’dɔ kpa zi ye. 25 Vïdï mati ëdï mo aba, akï’dï zi mo kyɔ. Vïdï mati anza mo aba, akoba 'de kazi mo."

26 Yësu nduwë kiya mo aba zi zë, iya henye, "Damöku 'ba Wïrï ëdï henye. Kora maako ïlï kofo mï yaka ënï. 27 Mati mo o’do yɔndɔ aba, ënyï kadra aba, kofo ne biya ëdïnnï ku mbili kï’dï, ëdïnnï kpa ku tövu. Mo ayɔlɔ dë hala o’dɔ rë nï here. 28 Kaŋo ra o’dɔ wevo ne na bi dënï zi tövu, zi ta na lɔgɔ. Dagba bïrïtï mo ma luru ne akalaya, mbili mo, ehe ndundu mo mbili ma ndɔ ï’jö aba. 29 Mati ï’jö ne alɔtri ku, kora ne ayeto kumu mo kulu aba, ga kö’du mo ayɔlɔ kadra mo ɔkɔ ku."

30 Yësu ako’jo kö’du henye, "Dakiya ze damöku 'ba Wïrï ëdï kaa a’di? Mala a’di dako’dɔ ze zi yada mo? 31 Ëdï kaa kofo 'ba masatada, kofo mati tisi ṛiri mï dakaŋo ne. 32 Ta gɔ mo yaa, övu rïyë, ayi kyedre ta da wevo ne’e biya. Ï’dï ngora nï ma kyedre mo’e yaga, ali ayinnï, uvö loko ënnï mï galïlï mo."

33 Yësu ayëtï kö’du kise 'bënï tëmï mala maako’e. Mo ayada zi zë kyɔ, kö’du zi zë tɔ’bɔ yɔlɔ mo. 34 Mo ɔ’bɔ dë me’do zi zë kazi mala. Ëzë mo ëdï vo lö’bö 'bënï ëtï, mo akayada kö’du ne’e biya zi zë.

35 Mï da hutaga mï ko’do nani, Yësu iya zi vo lö’bö 'bënïye, "Ënyï dï’bë’e kyëtï 'ba föfö." 36 Here zë ilannï vïdï kayo ne’e, ehe vo lö’bö’e ëkyïnnï mï töŋbö, mati Yësu ëdï alima nzɔ mï mo, obannï mo nnï aba. Töŋbö maako’e alö’bönnï kpa ga ndï mo.

37 Truku’du buluku kyigɔ aluku rïyë kagba 'ba wini, ayeto ku likɔ rïyë mï töŋbö, here omba ku kara zi koso wini aba. 38 Yësu ëdï 'de hulëhu mï töŋbö ako’do dë nï taka gara aba. Vo lö’bö 'bɔmo’e alironnï mo iyannï henye, "Vo komoyandi, asösu 'bëyï kö’du dë, ze hiya kara zi koli?"

39 Yësu ënyï rïyë, ame’do na kamo zi buluku, iya zi wini kagba ne henye, "Ɔrɔ, ti!" Buluku nnï wini kagba aba ɔrɔnnï, bi gbɔ liwo. 40 Yësu iya zi vo lö’bö 'bënïye henye, "Kö’du a’di ëdïye atere gɔ mo? Anza’e dë koma aba?" 41 Zë tere kyedre aba, ako’jo ha oka maako, "Kora nenye ëyï? Buluku wini kagba aba, ɔwɔnnï mo?"