1 Yësu vo lïtu 'bënï ëtï ënyï ï’bë ɔkɔnnï kyëtï kapa föfö 'ba Galilaya mï dakaŋo 'ba Gerasa. 2 Kandi mati Yësu asi yaga tëmï töŋbö, andɔsi dë nnï kora maako aba, asi tëmï wogo 'ba da wogo ani ne. Kora ne ëdï dakyikyi aba mï nï. 3 Mo ëdï alima mï kutë da wogo. Vïdï ako ɔ’bɔ dekpe zi sesi mo na kida nyɔri aba. 4 Da kyɔ ndï mo kala mo aba ëdï na kida, mora ta ga kadra ne biya mo akisi nyɔri ne, ehe akikye mï kɔhi ne ta ndï nï na nzoyi. Mo embe 'beri, vïdï maako ɔ’bɔ dë zi mo kïrï. 5 Kadra yɔndɔ aba mo ëdï lima alasi tëmï da wogo kpuru ta da lutu, kudu aba rë nï kumu yïtö aba.

6 Mo na kɔwɔ mati ongɔ Yësu, here aho alɔdrɔ domo nï aba akaŋo komo Yësu. 7 Here mo alörö na kyembe, iya henye, "Yësu wisi 'ba Wïrï omba a’di kazi ma? Lömu mï ru Wïrï, ma lenze yï, ï’dï riti dë zi ma." 8 Mo iya kö’du ne ga kö’du Yësu ëdï akiya henye, "Dakyikyi asi 'de yaga ta ra kora ne."

9 Here Yësu ako’jo hɔ mo iya henye, "Ru yï ëyï?" Kora ne aya’ba da me’do iya henye, "Ru ma ‘Gboko,’ ga kö’du dëdï ze kyɔ." 10 Mo zɔ nduwë Yësu lenze kazi ore dakyikyi ne’e yaga ta dakaŋo nani.

11 Ani wa’do kayo ëdïnnï kara dakapa lutu wakonyo. 12 Here dakyikyi ne’e zɔ rë nnï la’ba zi Yësu, iyannï henye, "Utu ze zi wa’do ne’e, zi ze tï’bë tödu mï zë." 13 Mo ila dakyikyi ne’e tï’bë, ödunnï gbɔ mï wa’do ne’e. Wa’do ne’e ëdïnnï biya kaa kpulukurïyö, ahonnï akaŋo mï föfö, ehe aluyïnnï.

14 Kora mati ëdïnnï ga wa’do ne’e kongɔ, ahonnï 'de, ayöyönnï kö’du ne mï gawo mï haliŋɔ kö’du mati o’dɔ rë nï ne, yada zi vïdï. Vïdï ënyï ï’bënnï biya kö’du mati o’dɔ rë nï ne kongɔ. 15 Mati ayinnï zi Yësu, zë ongɔnnï kora mati ëdï kani gboko 'ba dakyikyi ëtï mï nï ne, mo ëdï alima ani bɔngɔ aba rë nï, dɔ mo ku na laka, zë biya na tere. 16 Zë mati ongɔnnï komonnï aba, ayadannï zi vïdïye kö’du mati o’dɔ rë nï zi kora mati dakyikyi aba ne, ehe kö’du 'ba wa’do ne’e. 17 Here zë ako’jonnï ha Yësu zi tënyï atï’bë 'de tëmï dakaŋo ënnï.

18 Here mati Yësu omba ku zi tï’bë zi tëkyï mï töŋbö, kora mati ëdï kani dakyikyi aba mï nï ne, alenze mo iya henye, "Dï’bë ze yï aba." 19 Yësu ila mo dë zi tï’bë ta gɔ mo, iya zi mo henye, "Ï’bë liŋɔ zi vo dakota 'bëyïye, ayada zi zë hala kö’du mati Yere o’dɔ zi yï, laka 'bɔmo zi yï ëdï hala." 20 Here kora ne ënyï ï’bë biya kpuru tëmï Gawo 'Butë ne’e, kö’du mati Yësu o’dɔ zi nï ne yada mo aba. Vïdï mati owonnï kö’du ne biya na rakaga.

21 Yësu ënyï ï’bë hulëhu kyëtï kapa 'ba föfö vere. Ani da kapa föfö, vïdï kayo atɔtɔ rë nnï kpo ta da kapa mo. 22 Here vere maako ru mo ëdï Yayiro, mo ra na vo dagba 'ba bi 'ba mötu ani, mati mo ɔkɔ, ongɔ Yësu, mo umë rë nï akaŋo ndï mo, 23 alenze mo kö’du komba aba, iya henye, "Wu’jë tisi 'bama na rakɔɔ. Akɔ ayi, ï’dï kala yï dɔ mo, here zi mo tëdï na laka, na dïdï." 24 Yësu ënyï ï’bënnï mo aba.

Here vïdï kayo mati ëdïnnï atï’bë Yësu ëtï ne, ëdïnnï mo diri ta da kapa biya. 25 Here mbara maako ëdï ani, na riti ga kö’du yama ëdï taho ta rɔ mo kazi tɔrɔ kɔɔ 'butë dɔmorïyö. 26 Dakatörö kayo ëdïnnï le ɔwɔ kï’dï zi mo. Mo ayaŋa kɔhi 'bënï biya, mora here ne zi ta’ba na laka anza dë, ëdï wënï zɔ rë nï kidra dagba ta ga kadra biya. 27 Mo owo kö’du Yësu, ënyï ayi kafo mo mï kutë vïdï kayo ne. 28 Mo iya na bi dënï henye, "Ëzë mise gbï le nje bɔngɔ rɔ mo ne, matëdï na laka." 29 Mo ongɔ here ise bɔngɔ rɔ mo ne, kandi yama ɔrɔ, mo ayɔlɔ ku mï ida rë nï henye, na kɔ’jɔ rë nï ku tëmï riti kyedre 'bënï ne.

30 Yësu kandi ayɔlɔ henye, kyigɔ asi ku ta rë nï yaga. Mo opi rë nï kpo tëmï kutë vïdï kayo ne, ako’jo kö’du henye, "Ëyï ra ise ra bɔngɔ ama?" 31 Vo lö’bö 'bɔmo aya’bannï da me’do zi mo henye, "Ongɔ te vïdï kayo mati ëdïnnï yï kuru ne, kö’du a’di ako’jo 'bëyï kö’du gɔ mo henye ere, ‘Ëyï ra ise ra ma?’"

32 Yësu zɔ nduwë lima bi kongɔ kpo ta rë nï zi yɔlɔ ëyï ra o’dɔ kö’du ne. 33 Here mbara ne ayɔlɔ kö’du mati o’dɔ rë nï zi nï ne, mo ayi tese aba na tere, alɔdrɔ ndï mo, ayada kö’du tïnyö mati o’dɔ rë nï ne biya zi mo. 34 Yësu aya’ba da me’do zi mo henye, "Wu’jë ama, koma 'bëyï o’dɔ yï ku ŋbala. Ï’bë na rakyëyï, makɔ’jɔ yï tëmï riti ne."

35 Mati Yësu ëdï kö’du ne kiya, Vïdï maako’e ayinnï ta liŋɔ 'ba Yayiro, ayadannï zi mo henye, "Wu’jë 'bëyï oli ku. Kö’du a’di kpe zi riti kï’dï ra vo komoyandi ne gɔ mo?" 36 Yësu oze mbili nï dë da kö’du mati iyannï ne, mo aya’ba zi Yayiro henye, "Ere dë, nje kölö koma."

37 Here mo ila vïdï ma kölö maako dë zi tï’bë nï aba dagba, nje Petero, Yemisi, öndu nï Yowani aba. 38 Mati zë ɔkɔnnï liŋɔ 'ba Yayiro, Yësu ongɔ bi apere rë nï ku na yawa, owo kuyë rïyë kudu rala’ba aba. 39 Mo ënyï ï’bë ödu loko, iya henye zi zë "Kö’du a’di bi apere rë nï gɔ mo na yawa here? Kö’du a’di ëdïye kudu gɔ mo? Wu’jë tisi ne oli dë, ëdï öŋbö ako’do."

40 Here zë ogonnï mo. Mora here mo ore zë biya yaga, oba 'bu 'ba wu’jë tisi ne, ma mo, vo lö’bö 'bënïye wota. Mo ënyï ï’bë ödu mï loko mati yöku wu’jë tisi ne o’ba 'dɔ mo.

41 Mo ïrï kala mo, iya zi mo henye, "Talita Kumu." Kö’du ya’ba aba henye, "Wu’jë tisi, miya zi yï, ënyï rïyë." 42 Here mo ënyï, alasi kpo. Kɔɔ 'bɔmo ëdï 'butë dɔmorïyö. Mati kö’du ne o’dɔ rë nï, zë biya na rakaga. 43 Yësu ï’dï kö’du kise anza dë zi zë yada zi vïdï kölö maako, ehe mo iya henye, "Ï’dïye wa zi mo zi konyo."