1 Yësu ënyï ila bi nani, ehe ï’bë hulëhu mï gawo 'ba dakaŋo 'bënï. Vo lö’bö 'bɔmo’e ï’bënnï mo aba. 2 Mï ko’do 'ba ralawo aba, mo ayeto kö’du yandi mï bi 'ba mötu. Vïdï kayo ëdïnnï ani, mati zë owonnï kö’du mo, zë biya na rakaga. Zë ako’jonnï kö’du iyannï henye, "Here mo i’ja kö’du ne biya ta kila? Kö’du yɔlɔ 'ba a’di ra here mati ï’dï zi mo ne? Hala mo ëdï kö’du koro ne’e ko’dɔ mo? 3 Mo anza vo kaga kïsë, wisi 'ba Mariya, öndu 'ba Yemisi, Yosepa, Yudasi, Simona aba? Anza dë ëmï mo’e ra ëdïnnï alima kinye ne?" Here zë ombannï mo dë.

4 Yësu ënyï iya zi zë henye, "Nëbï ɔwɔ ta bi ne biya, nje vïdï mï gawo liŋɔ 'bɔmo, karo mo’e, vo dakota 'bɔmo ëtï ra ombannï mo dë." 5 Mo omba dë zi kö’du koro ako’e ko’dɔ ani, mo ï’dï kala nï nje da vïdï 'ba rakɔɔ gbɔngo maako’e, ehe akɔ’jɔ zë gbɔ. 6 Mo rakaga kyedre aba ga kö’du vïdï anzannï dë kö’du koma aba.

Yësu ënyï ï’bë kpo ta ra dakaŋo nani komo vïdï yandi aba. 7 Mo ako’jo vo lïtu 'butë dɔmorïyö ne’e bi kölö, utu zë yaga na rïyö rïyö. Mo ï’dï kalakonda ndra ta da dakyikyi ne’e.

8 Mo ise gɔ mo zi zë, "Oba’e waako dë 'e aba ta bi tï’bë 'be’e ne, mangɔlɔ’bɔ manza dë, aŋboro 'ba wa lenze manza dë, kɔhi manza kpa dë mï bɔngɔ re 'e, nje mɔvɔ. 9 Usu’e kamoka, ehe ïnjë’e kya 'ba bɔngɔ dë ëtï. 10 Ëzë ödu’e mï liŋɔ, alima’e mï liŋɔ nani le ila’e gawo nani. 11 Ëzë gawo mati ayiye mï mo vïdï ombannï dë 'e kïrï kala kyedre aba, mandere ombannï dë zi kö’du 'be’e kowo, ila’e bi nani, akyitɔ’e turufu ne 'de ta ndïye. Ne atëdï zi zë na wasënë."

12 Here zë ënyï ï’bënnï yaga kö’du yëtï aba zi vïdï dë nnï kotɔ tëmï kö’du kyënyë 'bënnï ne’e. 13 Zë orennï dakyikyi yaga, apisinnï yënï ra vo kɔɔ’e, akɔ’jɔ zë gbɔ.

14 Yaanya aba Yere Heroda owo kö’du ne, ga kö’du wa komba 'ba Yësu inde bi biya. Vïdï maako’e iyannï henye, "Yowani Bapatisi ra ënyï ku na dïdï tëmï koli, kö’du nere ra mo ëdï kyigɔ nenye aba zi tëdï kö’du koro ne’e ko’dɔ mo." 15 Vïdï maako’e iyannï henye, "Mo Eliya ra." Agamo’e iyannï henye, "Mo nëbï ra, kaa tëmï ma kölö mati ëdïnnï kani kyere nani."

16 Mati Heroda owo kö’du ne, iya henye, "Mo, Yowani Bapatisi, mati mikye dɔ mo 'de nere ra ënyï tëmï koli." 17 Heroda ra na bi dënï ï’dï kö’du zi Yowani kïrï, kida mo, ku’du mo mï kamba. Heroda o’dɔ kö’du ne here ga kö’du mo oze Herodiya, mo le na mbara 'ba öndu mo Pilipo ne. 18 Yowani Bapatisi zɔ nduwë kö’du ne yada mo zi Heroda. "Anza dë na laka zi yï mbara 'ba öndu yï koze." 19 Here Herodiya ïrï kö’du ra Yowani, omba zi mo kofo. Mora mo ɔ’bɔ dë, 20 ga kö’du Heroda ere Yowani, ga kö’du mo ayɔlɔ Yowani ne, mo vïdï laka ra, ehe agaga gɔ mo. Heroda ëdï le kö’du yëtï 'ba Yowani sösu, mora mo omba zɔ nduwë zi kowo mo.

21 Ndundu mo aba Herodiya i’ja gërï laka 'bënï. Ëdï mï ko’do ko’jo kadra 'ba Heroda, mo o’dɔ kyere, ise vïdï kyedre 'ba turu’e biya, vo wehe’e, vïdï kyedre 'ba Galilaya ëtï. 22 Mati wu’jë 'ba Herodiya ne ayi, ɔlɔ komo vïdïye, kö’du ne eme ra Heroda nnï yingɔ 'bɔmo ëtï.

Here Yere Heroda iya zi wu’jë ne henye, "A’di ra omba zi tëdï zi yï? Makï’dï zi yï wa mati omba." 23 Ha kï’dï lömu aba mo iya zi wu’jë ne henye, "Miya henye, makï’dï wa mati ako’jo kö’du mo ne zi yï, ëzë ëdï le kyedre kaa kutë damöku 'bama."

24 Here wu’jë ne asi ï’bë zi ma nï yaga. Ako’jo hɔ mo, "A’di ra makako’jo kö’du mo?" Ma mo aya’ba da me’do iya henye, "Ako’jo kö’du ga da Yowani Bapatisi." 25 Here wu’jë ne aho kandi hulëhu zi tï’bë kö’du ne kiya zi Yere Heroda, iya henye, "Momba zi yï kï’dï zi ma kinye yaanya aba ne da Yowani Bapatisi mï kakpa ne."

26 Mati Yere Heroda owo kö’du ne here, o’dɔ mo na rasösu. Mo ɔ’bɔ dekpe zi komba dë zi wu’jë ne, ga kö’du mo o’dɔ ku na lömu ta da komo yingɔ 'bënï ne’e biya. 27 Here mo utu vo kanya 'bënï kö’du kï’dï aba zi tï’bë da Yowani kika mo. Vo kanya ënyï ï’bë mï kamba, ikye da Yowani 'de. 28 Mo ika mï kakpa, ï’dï zi wu’jë ne, ehe mo ï’dï gbɔ zi ma nï. 29 Mati vo lö’bö 'ba Yowaniye owonnï kö’du ne, zë ayinnï, obannï yöku mo, ï’bë usunnï.

30 Mati vo lïtu i’ja rë nnï Yësu ëtï, a’bannï wa mati zë o’dɔnnï, yandinnï ne yada mo zi Yësu. 31 Here vïdï kayo ëdï tayinnï ehe ëdï tï’bënnï, here Yësu vo lïtu 'bënï ëtï, i’jannï kadra 'ba zi wakonyo dë. Here mo iya zi zë henye, "Ënyï dï’bë’e 'de bi maako na bi de ze kutu ze aba, zi ye re 'e lawo tisi."

32 Here zë ënyïnnï, ayetonnï tëkyï mï töŋbö tï’bë yaga na bi dë nnï bi mbiya maako. 33 Mati vïdï kayo ne’e ongɔnnï zë ëdïnnï atï’bë, kandi ayɔlɔnnï zë, here ënyï ï’bënnï biya tëmï gawo ne’e, ahonnï dagba ta dakaŋo, ɔkɔnnï dagba bi nani ta komo Yësu vo lïtu 'bënï ëtï. 34 Mati Yësu asi yaga tëmï töŋbö, mo ongɔ vïdï kayo ne’e, di’di mo oso ndɔ na kö’du sösu ga kö’du zë, ga kö’du zë kaa tïmëlë ma kazi vo yako. Here mo ayeto zë yandi kö’du kyɔ aba.

35 Mati kadra omba ku zi loso, vo lö’bö 'bɔmo’e ayinnï zi mo iyannï henye, "Ongɔ te, kadra anza kpe bi nenye na möku. 36 Utu vïdï nenye’e zi zë tï’bënnï mï liŋɔ mati ëdïnnï kpoko kinye zi zë wakonyo kogo zi konyo."

37 Yësu aya’ba da me’do zi zë iya henye, "'E na bi de 'e, ï’dïye wakonyo zi zë zi konyo." Zë ako’jonnï ha Yësu, "Kɔhi ne vïdï ako’dɔ lɔɔ yehwe modɔmowota zi ki’ja. Omba zi ze tï’bë yaŋa kɔhi lamirïyö ne da mangɔlɔ’bɔ zi tɔ’bɔ zë?" 38 Yësu ako’jo hë zë iya henye, "Ëdïye mangɔlɔ’bɔ aba ndö? Ï’bë’e te kongɔ." Mati i’jannï, iyannï kö’du mo zi mo henye, "Mangɔlɔ’bɔ ëdï muyï, kyenze rïyö." 39 Yësu iya zi vo lïtu 'bënïye zi kiya zi vïdï ne’e biya zi rë nnï kinye na gbɔngo gbɔngo, ma limannï akaŋo da loma kyekpe ne. 40 Here vïdï ne’e biya alimannï na ratɔtɔ gbɔngo gbɔngo lamikölö maako’e 'butëmuyï.

41 Yësu oba mangɔlɔ’bɔ muyï ehe kyenze rïyö ne, ongɔ bi komorïyë, o’dɔ öwö’dï zi Wïrï. Mo owe mï mangɔlɔ’bɔ ne, ï’dï zi vo lö’bö 'bënïye zi yanya mo zi vïdïye. Mo inye mï kyenze rïyö ne kpa ta gë zë biya. 42 Vïdï biya onyonnï, ehe ɔvɔnnï gbɔ. 43 Vo lö’bö’e atɔtɔnnï kɔsɔ mangɔlɔ’bɔ kyenze aba mati ɔsɔ ne mï baga 'butë dɔmorïyö. 44 Watiti 'ba vïdï mati onyonnï wa ne kpulukumuyï.

45 Kandi Yësu ï’dï vo lö’bö’e tëkyïnnï mï töŋbö tï’bënnï dagba komo nï mï Beteseyida ta kafo föfö, mora here mo iya kö’du zi vïdï kayo ne’e mï’bënnï liŋɔ. 46 Ta ga kö’du kiya 'bɔmo zi vïdï kayo ne’e, ï’bë’e gbɔ, mo ënyï ï’bë da lutu amötu. 47 Mati hutaga ɔkɔ, töŋbö ëdï ku 'de mï kutë 'ba föfö, mora Yësu nje kutu nï aba da götï. 48 Mo ongɔ vo lö’bö 'bënïye ëdïnnï ku rë nnï kï’dï zi ko’dɔ mo ngari aba, ga kö’du ëdïnnï akopi ta ga bi tayi 'ba buluku. Kutë yɔndɔ aba mo ï’bë zi zë, lasi aba ta da wini. Mo omba zi laga ta da kapa zë, 49 mora mati ongɔnnï mo ëdï alasi ta da wini ne, asösu 'bënnï iyannï wakoro ra, ehe a’bannï hë nnï gbögbö lörö aba. 50 Mati ongɔnnï mo ne, zë biya na tere. Mora Yësu ame’do zi zë kandi, iya henye, "Uku mï ye, ne ma ra. Ere’e dë." 51 Here mo ënyï ëkyï rë zë mï töŋbö ehe, buluku ɔrɔ. Vo lö’bö’e biya na rakaga, 52 ga kö’du koro 'ba mangɔlɔ’bɔ mati mo o’dɔ zi vïdï kpulukumuyï konyo mo ne, ödu dë gba dë zë.

53 Zë ënyï umunnï kyëtï föfö da götï 'ba Genesereta, ehe idannï töŋbö ani. 54 Mati ilannï töŋbö ne, vïdï ayɔlɔnnï Yësu. 55 Here zë ënyï ahonnï ta bi ne biya. Ëzë owonnï bi mati mo ëdï 'dɔmo, ïnjënnï vïdï 'ba rakɔɔ’e da laŋba kika mo zi mo. 56 Bi mati biya Yësu ï’bë ta 'dɔmo ne, mï gawo, mï daliŋɔ maako’e, vïdï ako’bannï zë mati na rakɔɔ ne, ga bi 'ba wakogo. Akalenzennï mo gbï nje zi zë ha bɔngɔ 'bɔmo kise, zë mati biya isennï ne, akɔ’jɔ zë na laka.