1 Mati Yësu inde kö’du nenye’e yada mo zi vo lö’bö 'bënï 'butë dɔmorïyö ne’e, mo ila bi nani ï’bë kö’du yandi yëtï aba mï gawo 'ba Galilaya’e. 2 Mati Yowani Bapatisi owo mï kamba, kö’du Korisitɔ ëdï ako’dɔ ne, mo utu kya 'ba vo lö’bö 'bënïye zi mo. 3 Zë ako’jonnï ha Yësu iyannï henye, "Ayada zi ze, yï ra kora ma omba tayi kɔdɔ dida ze bi vïdï maako?" 4 Yësu aya’ba da me’do iya henye, "Ï’bë’e a’ba’e hulëhu ayada’e zi Yowani kö’du ma ëdï akowo’e kongɔ mo aba. 5 Vo komoköndu atɔ’bɔ bi kongɔ, vo keŋe atɔ’bɔ lasi, zë ma ëdïnnï na riti kazi kɔɔ mönyu o’dɔ zë ŋbala, vo mbilikïsï owo kö’du, yöku vïdï ënyïnnï löhu na dïdï, kö’du yöyö laka ëdï yëti mo zi vo leriye. 6 Rakyenyi ëdï zi zë ma anza nnï dë dajijï aba ga kö’du ma."

7 Mati vo lö’bö a Yowani ëdï atï’bënnï, Yësu ame’do kö’du mo zi vïdï kayo: "Mati ï’bë’e yaga zi Yowani mï da lïpï, a’di ra omba’e zi kongɔ? Rakïdë 'ba mbili loma mï buluku? 8 A’di ra ï’bë’e yaga zi kongɔ? Vïdï kora usu rë nï mï bɔngɔ laka? Vïdï ma usu rë nnï kaa mahere ne alimannï mï loko kyedre a yere. 9 Ayada’e zi ma a’di ra ï’bë’e yaga zi kongɔ? Nëbï ra? Ɔɔ ongɔ’e ndra ta da nëbï. 10 Here kö’du yöru ra iya kö’du ga kö’du mo, ‘Ma kutu vo lö’bö ama dagba komo yï zi gërï yëhu zi bi yï.’ 11 Ma yada zi ye tïnyö, Yowani Bapatisi ëdï kyedre ta da vïdï maako, mo maako ma tisiwa mï damöku 'ba Wïrï kyedre ta da Yowani. 12 Mï kadra ma Yowani Bapatisi ayëtï kö’du 'bënï le mï ko’do nenye damöku 'ba Wïrï ëdï tövu kyedre kyigɔ aba. Kora vo wehe ko’dɔ’e ï’dï rë nnï zi kuru mo na gbörökötö. 13 Here le mï kadra 'ba Yowani nëbïye biya kö’du kï’dï 'ba Mosa ame’do kö’du 'ba damöku. 14 Ëzë omba’e zi koma mï kö’du kise 'bëzë, Yowani mo Eliya, ma kö’du tayi 'bɔmo ayëtï. 15 Owo’e kö’du ne ëzë ëdïye mbili aba!"

16 "Yaanya aba, kaa a’di ma kiya ga kö’du vïdï ma ëdïnnï mï ko’do ma ndenye ne? Zë kaa gisisi ma ëdïnnï alima mï bi 'ba wakogo. Gbɔngɔ ma kölö akagbögbö hë nnï zi maako’e akiya.

17 ‘Henye, dɔlɔ kudï 'ba rakoze zi ye,

mora ɔlɔ’e dë.

Daya’bi ze ngala 'ba dakoli,

mora udu’e dë.’

18 Mati Yowani ayi, mo oro hë nï uwë a’ji dë vïdï biya iyannï henye, ‘Mo ëdï dakyikyi aba.’ 19 Mati Wisi a Vïdï ayi, mo onyo wa, uwë a’ji. Mora vïdï iyannï henye, ongɔ’e bi te da kora ne. Mo onyo wa takanyi. Uwë a’ji kpa takanyi mo aboka 'ba vo 'be’bele kö’du’e vo kö’du kyënyë ko’dɔ’e ëtï. Mora kö’du yɔlɔ a Wïrï ëdï na yada zi tëdï tïnyö tëmï wa ma o’dɔ rë nï."

20 Vïdï ma mï gawo ma Yësu o’dɔ kö’du ko’do kyedre ënï mï zë ne, 'de otɔ dë nnï dë tëmï kö’du kyënyë 'bënnï, here mo iya zë na kyënyë. 21 "Atëdï zi ye kyënyë Korɔzini! Atëdï zi ye kyënyë Beteseyida! Ëzë kö’du ko’do ma o’dɔ mï ye ne o’dɔ mï Tiyere, Sidoni aba kani vïdï nani usunnï bɔngɔ 'ba lubë ku rë nnï zi yada henye ere zë otɔnnï dë nnï ku tëmï kö’du kyënyë 'bënnï. 22 Ma yada zi ye henye, mï ko’do 'ba vurë aba, Wïrï akila vïdï 'ba Tiyere, Sidoni aba tada’e. 23 Yï Kaparanamo! Omba’e zi re 'e kïnjë komorïyë? Aku’du’e akaŋo mï wa’do 'ba gehena. Ëzë kö’du ko’do ma o’dɔ mï ye ne mo’dɔ mï Sɔdɔmo, atëdï zɔ kadra ndenye aba. 24 Akatɔ’bɔ yɔlɔ’e henye, mï ko’do 'ba vurë aba Wïrï rasösu ndra kö’du Sɔdɔmo tada’e!"

25 Mï kadra nani Yësu iya henye, "'Bu Yere 'ba komorïyë dakaŋo aba! Mo’dɔ öwö’dï zi yï ga kö’du zi vo kazi kö’du yɔlɔ’e, wa ma oho kazi vo kö’du yɔlɔ’e vo yandi ëtï ayada ku zi gisisiye. 26 Ɔɔ, 'bu, nenye hala wa ma omba kani zi rë nï ko’dɔ. 27 'Bu ma ï’dï wa ku biya zi ma. Vïdï maako ayɔlɔ Wisi dë nje 'Bu. Vïdï maako ayɔlɔ 'bu dë nje Wisi, zë ma Wisi inzi zi nnï yada."

28 "Ayiye zi ma 'e biya ma na riti kazi wayeto kïnjë makï’dïye alawo. 29 O’dɔ 'e lɔɔ 'bama, ayandi 'e kazi ma, ga kö’du ma vo watɔwɔ raya’ba aba. Here aki’ja’e ralawo. 30 Lɔɔ 'bama ayeto dë. Kïnjë mo na pëlë."