1 Mï ko’do kölö, Yësu ila liŋɔ ënyï ï’bë da götï 'ba föfö alima gbɔ akaŋo. 2 Vïdï kayo ma atoto rë nnï kpo ta rɔ mo gbɔ kyɔ, mo ëkyï mï töŋbö alima gbɔ mï mo, vïdï kayo ɔrɔ 'bënnï yaga da götï. 3 Mo alima kö’du yëtï zi zë kyɔ tëmï mala. Yësu iya henye, "Kadra maako aba kora maako ï’bë kofo kïlï. 4 Mati mo ïlï kofo mï yaka, kya mo alëpï da gërï, ali ayi onyonnï 'de. 5 Kya mo alëpï mï kaŋo ma ṛï’dï, kaŋo ma laka nje tisiwa aba, kandi kofo ne ötu ga kö’du kaŋo ne alo dë. 6 Mati kadra ese o’bɔ wevo ma luru ne’e, ga kö’du ngara’da ödu dë gbo na laka, kandi wevo ne’e akyïtu gbɔ. 7 Kya 'ba kofo alëpï mï kutë kono, övu mora ofo wevo mo. 8 Kya 'ba kofo alëpï mï kaŋo ma laka wevo mo ana ï’jö, kya mo lamikölö, aga mo’e 'butëmodaka, mora aga mo’e 'butëwota." 9 Yësu inde kö’du 'bënï iya henye, "Owo’e kö’du ne, ëzë ëdï 'e mbiliye aba!"

10 Vo lö’bö’e ayinnï zi Yësu ako’jonnï hɔ mo iya henye, "Kö’du a’di ëdï 'bëyï ame’do zi vïdï tëmï mala?" 11 Yësu ënyï aya’ba dɔ mo iya henye, "Kö’du koho 'ba damöku 'ba Wïrï ï’dï ku zi ye, anza dë zi zë. 12 Mora here, vïdï ma wa aba akï’dï zi mo ndra, here mo atëdï mo aba kyɔ ta da ma ëdï. Mora vïdï mati anza wa aba dë, akoba 'de kazi mo gbï le ma tisi ma mo ëdï mo aba ne. 13 Mï kö’du ma mëdï ame’do zi zë tëmï mala ëdï henye,

‘Zë ongɔnnï bi mora ï’jannï dë,

zë o’je mbili nnï.

Mora owonnï mandere ayɔlɔnnï dë.’

14 Kö’du kumë 'ba Yisaya ga kö’du 'bëzë ne henye,

‘Vïdï nenye’e akowonnï nje na kowo

mora ödu dë, dë zë.

Zë akongɔnnï bi akongɔ

mora 'de ï’jannï dë.

15 Dïdï vïdï nenye’e na kyigo.

Mbili vïdï nenye’e yaanya aba na kïsï.

Zë ombannï dë zi kö’du tïnyö kongɔ.

Ëzë mbili zë anza dë na kisi,

zë akongɔnnï komo nnï aba,

akayɔlɔnnï dë nnï aba mora akotɔ dë nnï zi ma hulëhu,

mora akakɔ’jɔ zë.’"

16 "Mora kö’du’e ne laka ga kö’du komo’e i’ja ku, mora mbiliye owo kpa ku. 17 Ëdï na laka miya zi ye nëbï kayo mora vïdï kayo a Wïrï ombannï zi ki’ja wa ma i’ja 'e ne, mora 'de ï’jannï dë, mora zë ombannï zi kowo wa ma owo’e ne, mora 'de owonnï dë.

18 "Owo’e ayandiye mï kö’du 'ba vo kofo kïlï ne. 19 Zë mati owonnï kö’du kise 'ba damöku ne, mora ayɔlɔnnï dë ëdïnnï kaa kofo mati alëpï da ga gërï. Satani ayi ïrï me’do ne yaga tëmï di’di zë. 20 Kofo mati alëpï dakaŋo ma ṛï’dï aba, ëdï zë ma owonnï kö’du ne rakyenyi aba, kandi ma owonnï. 21 'De ödu dë gbo mï di’di zë, mora ëhïnnï dë na konda. Here mati kö’du kyënyë maako ayi ga kö’du kise ne, akilannï 'de kandi. 22 Kofo ma alëpï mï kono ne, ga kö’du zë ma owonnï kö’du kise ne, kö’du sösu ga kö’du wa 'ba dakaŋo, lɔvɔ wa kyɔ ila kö’du kise ne dë tödu mï di’di zë, du anannï lɔgɔ dë. 23 Kofo ma ïlï mï kaŋo ma laka, ëdï kö’du zë ma owonnï kö’du kise ne, ïrïnnï gö zë ra anannï lɔgɔ, kya mo lamikölö, agamo’e 'butëmodaka mora agamo’e 'butëwota."

24 Yësu ayada mala ma kya mo zi zë. "Damöku 'ba Wïrï ëdï kaa henye. Kora maako ïlï kofo ma laka mï yaka ënï. 25 Yɔndɔ kölö maako aba, mati vïdï o’donnï ku biya vo wehe ayi ïlï kofo nyangölu mï kutë wana, mora ï’bë wënï 'de. 26 Mati wevo mo övu, mbili mo omba ku zi rë nï kï’dï. Nyangölu alaya gbɔ. 27 Vo kalima a kora ne ayi zi mo iya henye, ‘Kyedre, kofo laka ra ïlï mï yaka 'bëyï ne. Nyangölu ne ayi 'bënï ta kila?’ 28 Mo aya’ba da me’do zi mo, iya henye, ‘Ne vo wehe maako ra o’dɔ kö’du ne.’ Zë ako’jonnï hɔ mo iyannï henye, ‘Omba zi ze tï’bë nyangölu ne kotɔ mo 'de yaga?’ 29 Mo aya’ba da me’do, iya henye, ‘'E’e, ga kö’du ëzë atoto’e nyangölu ne akotɔ’e kya wana 'dö zë ëtï. 30 Ila’e wana 'dö nyangölu aba mövunnï bi kölö le kadra 'ba wakumu ta yaka aba. Ma kayada zi vo lɔɔ’e, zi nyangölu kotɔ dagba, hɔ mo kida na kulu zë ko’bɔ, mora da wana toto zi kï’dï mo mï lɔ’bi.’"

31 Yësu ayada mala ma aga mo zi zë, "Damöku 'ba Wïrï ëdï henye: Kora maako oba kofo masatada ïyï mï yaka ënï. 32 Kofo matisiwa aba ta da kofo biya, mati övu rïyë, gbɔ na kyedre ta da wevo biya, övu na kaga, ali ayinnï uvö loko ënnï mï ngora mo."

33 Yësu nduwë mala maako yada mo zi zë iya henye, "Damöku 'ba Wïrï ëdï henye: Mbara maako oba langa asusë mï tele 'butësowɔ 'ba lunzu ï’dï gbɔ tö’bu." 34 Yësu ayada kö’du nenyee zi vïdï kayo tëmï mala. Mo iya kö’du ako dë zi zë kazi mala. 35 Mo o’dɔ kö’du ne here zi kö’du kiya 'ba nëbï tayi tïnyö: "Ma ko’dɔ mala ëzë ma me’do zi zë. Ma kayada zi zë wa mati ayɔlɔnnï dë kyere ma damöku ï’dï rë nï ne."

36 Mati Yësu ila vïdï kayo ödu loko, vo lö’bö 'bɔmowe ayinnï zi mo, iyannï henye, "Ayada dero zi ze mï mala 'ba nyangölu mï yaka ne a’di?" 37 Yësu aya’ba dɔ mo, iya henye, "Kora ma ïlï kofo ma laka ne Wisi a Vïdï. 38 Yaka damöku, kofo ma laka ne, mora vïdï ma 'bënnï 'ba damöku ne. Nyangölu ra vïdï ma 'bënnï 'ba Satani. 39 Vo wehe ma ïlï kofo ne mo ra Satani. Wa kumu ta yaka mora ndundu 'ba daliŋɔ, mora vo kumumo’e zë ra malayika’e."

40 "Here kaa ma nyangölu atoto dɔ mo o’bɔ mï wa’do, kö’du ne ako’dɔ rë nï here mï ndundu 'ba daliŋɔ aba. 41 Ëdï here, Wisi a Vïdï akutu yaga malayika ënïye, zi toto tëmï damöku ënï yaga, vïdï ma biya ëdïnnï vïdï kï’dï zi kö’du kyënyë ko’dɔ, biya agamo’e ma ëdïnnï kö’du kyënyë ko’dɔ. 42 Zë aku’dunnï zë mï wa’do, zë akudunnï hë nnï konyo aba. 43 Vïdï a Wïrï atanyinnï kaa kadra mï damöku a 'bu nnï, owo’e kö’du ne, ëzë ëdï 'e mbili aba."

44 "Damöku 'ba Wïrï ëdï henye, kora maako i’ja wa na koho mï yaka. Mo ayöfu dɔ mo gbɔ löhu. Mo na rakyenyi, ï’bë wogo wasisi mati mo ëdï mo aba yaga, ï’bë hulëhu wogo yaka nani gbɔ.

45 "Damöku 'ba Wïrï ëdï kpa kaa henye. Kora maako ëdï bi koma kö’du dahabo ma laka. 46 Mati mo i’ja, mo ï’bë wogo wasisi mati mo ëdï mo aba biya yaga, wogo dahabo nani gbɔ.

47 "Damöku 'ba Wïrï ëdï kpa kaa henye, kya 'ba kora vo kyenze kïrï u’du wa 'ba kyenze kïrï ënnï yaga mï föfö, mora ïrï dakyïnë 'ba kyenze biya. 48 Mati wa 'ba kyenze kïrï ëdï ku ndɔ, zë otɔnnï yaga da götï alimannï gbɔ akaŋo zi mï kyenze ne yanya, ma laka ne ï’dïnnï mï baga ënnï, mati anza na laka u’dunnï zë 'de möku. 49 Atëdï mï ndundu 'ba daliŋɔ aba kaa nenye. Malayika atï’bënnï yaga akako’dɔnnï vïdï ma kyënyë’e tëmï ma laka 50 Aku’du zë mï wa’do 'ba koli ani zë akudunnï hë nnï konyo aba."

51 Yësu ako’jo hë zë, iya henye, "Ayɔlɔ’e kö’du nenye’e ku?" Zë aya’bannï dɔ mo iyannï, "Ɔɔ." 52 Here mo aya’ba dɔ mo zi zë iya henye "Vo komoyandi 'ba kö’du kï’dï ma ayandi zë kö’du 'ba Damöku 'ba Wïrï, kaa vo kyeti 'ba loko mati oba wa ma kyï ma kɔɔ aba, yaga tëmï lɔ’bi ënï."

53 Mati Yësu inde yada mala nenye’e ku, mo ila bi nani 54 ënyï ï’bë hulëhu mï gawo 'bënï Nazereta. Mo ayëtï kö’du mï bi 'ba mötu, mora zë ma owonnï kö’du yëtï 'bɔmo ne, zë rakaga aba. Zë ako’jonnï kö’du, iyannï henye, "Here mo i’ja kö’du yɔlɔ mahere ne ta kila? Mora kö’du ko’do 'bɔmo ne’e? 55 Mo ra dë wisi 'ba vo wakïsë? Mariya ra dë ma mo, Yemisi, Yosepa, Simona, mora Yudasi, zë ra dë na öndu mo’e? 56 Ëmï mo’e ra dë ëdïnnï alima kinye ne? Mo i’ja kö’du nenye biya ta kila?"

57 Mora here, zë ombannï mo dë. Yësu iya zi zë henye, "Nëbï oro ta ga bi ne biya nje mï gawo 'bɔmo vo dakota 'bɔmo ëtï. 58 Mo o’dɔ kö’du ko’do dë ani, ga kö’du zë anza nnï dë kö’du koma aba."