1 Tapëtï ko’do modaka aba, Yësu oba Petero, Yemisi öndu nï Yowani aba, ënyï ï’bënnï rïyë da döku konda na bi dë nnï. 2 Mati zë ëdïnnï bi kongɔ rakofɔ ayi zi Yësu, komo mo ëdï alaka kaa kadra, bɔngɔ 'bɔmo ofɔ rë nï na kanyi. 3 Vo lö’bö wota ne’e, ongɔnnï Mosa nnï Eliya aba, ëdï ame’donnï Yësu ëtï. 4 Petero ame’do rïyë zi Yësu, iya henye "Yere, ëdï na laka ze kinye. Ëzë omba, ma kuvö gövö wota kinye. Kölö zi yï, kölö zi Mosa, mora kölö zi Eliya." 5 Mati mo ëdï gba ame’do, fɔli laaka ayi ɔrɔ rïyë dë zë, gu aa tëmï fɔli iya henye, "Nenye gogo wisi ama ra, ma na rakyenyi mo aba. Owo’e dɔ mo." 6 Mati vo lö’bö owonnï me’do ne, zë na tere umë rë nnï na mï yöfu dakaŋo. 7 Yësu ënyï ayi ise rë zë, iya henye, "Ënyïye rïyë, ere 'e dë." 8 Here zë ongɔnnï bi rïyë i’jannï vïdï maako dë, du Yësu kutï nï aba. 9 Mati zë ëdï tasinnï akaŋo ta da döku, Yësu iya zi zë henye, "Ayada’e dë zi vïdï maako kö’du mati ongɔ’e ne, le ëzë Wisi a Vïdï ënyï ku tëmï koli." 10 Vo lö’bö ako’jonnï ha Yësu iyannï henye, "Kö’du a’di vo komoyandi 'ba kö’du kï’dïye, iyannï henye ere, Eliya ra atayi dagba?" 11 Yësu aya’ba da me’do zi zë iya henye, "Eliya ra ëdï tayi dagba, mo akakɔ’jɔ wasisi nzɔ. 12 Mayada zi ye henye, Eliya ɔkɔ ku nzɔ, vïdïye ra ayɔlɔnnï mo dë o’dɔnnï mo kaa zë omba nnï. Tëmï gërï kölö ne zë ako’dɔnnï Wisi 'ba Vïdï kpa here." 13 Vo lö’bö ënyï ayɔlɔnnï mo ëdï ame’do zi nnï ne, kö’du 'ba Yowani Bapatisi.

14 Mati zë a’bannï zi vïdï kayo ne’e, kora maako ayi zi Yësu alɔdrɔ da womo nï aba akaŋo komo Yësu, 15 iya henye, "Yere, ï’dï mïyï mëyï ra wisi ama ne. Mo ëdï kɔɔ nökï aba na kyënyë, ëdï mo kumë kadra maako aba mï wa’do, mandere mï wini. 16 Mika mo zi vo lö’bö 'bëyïye, ɔ’bɔnnï dë mo kɔ’jɔ." 17 Yësu aya’ba dɔ mo, iya henye, "'E vïdï kazi koma kö’du kyënyë aba ne’e, omba 'e zi ma tëdï ëtï le ndala aba? Omba’e zi ma lima ëtï le ndala aba? Ika 'e wisi ne zi ma." 18 Yësu ï’dï kö’du zi dakyikyi ne, ënyï asi gbɔ yaga tara wisi ne, mï kadra nani akɔ’jɔ mo gbɔ. 19 Vo lö’bö ayinnï zi Yësu liya ako’jonnï hɔ mo, iyannï henye, "Kö’du a’di dore ze dakyikyi dë gɔ mo yaga?" 20,21 Yësu aya’ba da me’do zi zë iya henye, "Miya zi ye henye, ëzë ëdïye koma aba kaa kofo masatada ma tisi, akiya’e zi lutu nenye henye, ‘Ï’bë ta kinye nani!’ atï’bë. Ako’dɔ’e wa biya."

22 Mati vo lö’bö 'ba Yësu ayi atoto rë nnï ku biya mï Galilaya, Yësu iya zi zë henye, "Wisi 'ba Vïdï omba ku kï’dï mo zi vïdï 23 akofonnï mo, ko’do da wota aba mo atënyï na dïdï tëmï koli." Vo lö’bö’e na rasösu ga kö’du mati Yësu iya akofo nï ne.

24 Mati Yësu vo lö’bö 'bënï ëtï ayinnï mï Kaparanamo, vo 'be’bele kö’du 'ba yëkëlu ayi zi Petero ako’jo hɔ mo iya henye, "Vo komoyandi 'be’e ëdï 'be’bele loko 'ba Wïrï kopi?" 25 Petero aya’ba dɔ mo, iya henye "Ëdï here." Mati Petero ï’bë liŋɔ, Yësu ame’do dagba, "Simona, kö’du sösu 'bëyï a’di? Ëyï ra ëdïnnï 'be’bele kopi zi yeree 'ba dakaŋo nenye? Vo gisi 'ba dakaŋo’e ra kɔdɔ tu’dë maako’e?" 26 Petero aya’ba dɔ mo iya henye, "Vo leze’e ra." Yësu aya’ba dɔ mo iya laka, "Gisi 'ba dakaŋo’e opinnï dë. 27 Domba dë zi vo 'be’bele kö’du ne’e ko’dɔ mo zi tënyïnnï na kamo. Ï’bë mï föfö kyenze kïrï. Otɔ yaga dagba kyenze mati ïrï ku ne, ayëhu hɔ mo aki’ja kɔhi ŋbiriṛi kyɔ kö’du 'be’bele 'bama 'ba loko 'ba Wïrï 'bëyï aba. Oba zë opi na 'be’bele 'bama 'be’e aba."