1 O’jo Yësu ku Beteleme mï dakaŋo 'ba Yudiya mï kadra 'ba Heroda vo damöku. Mora vo me’do yɔlɔ maako’e ayinnï ta humïrë ɔkɔnnï Yerusalema. 2 Zë ako’jonnï henye, "Wisi ma o’jo kinye na yere 'ba Yuda’e ne, mo ëdï kila? Dongɔ kyëlu ɔmo ma ayi ta humïrë ne dayi ze zi mo yeto." 3 Mati Heroda owo kö’du ne here, mï mo ënyï umbë gbɔ mora vïdï 'ba Yerusalema maako’e mï zë umbë kpa. 4 Mora mo ako’jo vo da karasa’e 'dö vo komoyandi 'ba kö’du kida’e gbɔ ti’de mayinnï zi nï, mora mo ako’jo hë zë, mo iya henye, "Kɔdɔ here, Korisitɔ ne ako’jo kila?"

5 Zë aya’bannï da me’do iyannï henye, "Ako’jo Korisitɔ ne mï Beteleme mï dakaŋo 'ba Yudiya, ga kö’du nëbï maako ayöru kö’du ne ku kyere iya henye,

6 ‘Mï, Beteleme, mï dakaŋo 'ba Yudiya,

anza dë tisiwa aba mï yere’e 'ba Yuda ne.

Vïdï ma kyedre atasi ndö tëmï 'e

mora mo akagaga vïdï 'bama 'ba Yiserele.’"

7 Mora Heroda ako’jo vo kö’du yɔlɔ ne’e gbɔ liwo tayinnï zi nï mo ako’jo kadra 'ba tasi 'ba kyëlu nani kazi zë. 8 Mora mo utu zë gbɔ Beteleme kö’du kira nenye’e aba, "Ï’bë oma’e bi liya na laka kö’du wisi ne, ëzë i’ja’e mo ku ayi iya’e kö’du mo zi ma, tï’bë kpa mo yeto."

9 Mati zë owonnï me’do kiya 'ba Heroda ne ku zë ënyïnnï gbɔ tï’bë. Zë ongɔnnï te kyëlu ma zë ongɔnnï ta humïrë ne. Kyëlu ne alaga nduwë dagba zi zë le ï’bë ɔrɔ ga bi ma wisi Yësu ëdï dɔ mo ne. 10 Mati zë ongɔnnï ku here ne, zë gbɔ mï kyëyï kyedre aba. 11 Zë ödunnï gbɔ ï’bë i’jannï wisi ne ëdï loko ani 'dö ma mo aba. Mora zë alimannï gbɔ akaŋo zi mo yeto. Zë upönnï ha aŋboro 'bënnï ï’dïnnï wakï’dï 'bënnï gbɔ zi Yësu. Wakï’dï mora dahabo, wa kyëzï ngutru, ɔwɔ teme maako ako’jonnï ru mo "murë."

12 Wïrï ayada zi zë tëmï wïrï, ma’bannï dekpe hulëhu ta da Heroda. Mora zë a’ba ï’bënnï gbɔ dakaŋo 'bënnï ta gërï mënzë maako.

13 Mati zë ï’bënnï ku, malayika 'ba Yere alaya zi mo tëmï wïrï iya henye, "Heroda omba zi wisi ne kofo. Ënyï oba wisi ne 'dö ma mo aba aho ï’bë Ezipeto. Alima ani le ma kiya zi yï a’ba."

14 Yosepa ënyï gbɔ mï yɔndɔ nani, oba wisi ne ma mo aba aho gbɔ mï Ezipeto. 15 Zë ï’bë alimannï Ezipeto ani le mï kadra 'ba koli 'ba Heroda.

Lima 'bëzë ani ne ëdï ku kaa kö’du 'ba Wïrï iya zi nëbï iya henye, "Ma ko’jo wisi ama ku ta Ezipeto."

16 Mati Heroda ayɔlɔ ku vo kö’du yɔlɔ ne’e andëndënnï, nï ku, mï mo ënyï ata gbɔ. Mo utu vo kanya 'bënnïye gbɔ tï’bënnï mï dakaŋo ti’de 'ba Beteleme gisi kora kofo a’ba ti’de vo haliŋɔ aba. Zë ma ɔkɔnnï dë gba kɔɔ rïyö, ga kö’du kadra ma vo kö’du yɔlɔ ne’e ayadannï zi mo. 17 Kö’du ne o’dɔ rë nï tïnyö kaa nëbï Yeremaya iya henye,

18 "Kpɔrɔ kudu ëdï mï Rama,

kpɔrɔ 'ba kudu 'e 'dö kuyë aba,

Rayile ra ëdï kudu ga kö’du gisi ënïye.

Zë olinnï ku ti’de mo omba

dë zi vïdï maako yata nï ta bi kudu."

19 Tapëtï koli 'ba Heroda, malayika 'ba Yere alaya tëmï wïrï zi Yosepa mï Ezipeto iya zi mo henye, 20 "Ënyï, oba wisi ne ma mo aba, ï’bë hulëhu mï dakaŋo 'ba Yiserele, ga kö’du zë ma ï’dï rë nnï zi wisi ne kofo, olinnï ku."

21 Here Yosepa ënyï oba wisi ne ma mo aba ï’bë gbɔ hulëhu mï Yiserele. 22 Mora here, mati Yosepa owo Arakerosi ïrï pëtï 'bu nï Heroda ku na yere 'ba Yudiya, mo na tere zi tï’bë ani. Ayandi mo tëmï wïrï, here mo mï’bë gbɔ mï dakaŋo 'ba Galilaya. 23 Mora o’dɔ liŋɔ ënï gbɔ mï gawo 'ba Nazereta. Here kö’du ma nëbïye iyannï ne ayi ku tïnyö. "Akako’jo mo vïdï 'ba Nazereta."