Mateus 23

Kö’du kyënyë 'ba Farasiye

1 Yësu ame’do zi vïdï kayo ne’e, vo lö’bö 'bënï ëtï iya henye, 2 "Vo komoyandi 'ba vo kö’du kï’dï nnï Farasi ëtï, ëdïnnï kyigɔ aba zi yëtï zi ye kö’du kï’dï 'ba Mosa. 3 Owo’e kö’du mati zë iyannï zi ye zi ko’dɔ, kö’du ko’dɔ 'bëzë anza dë na laka zi ye gɔ mo kïrï. Zë ayadannï kö’du wa zi ye ko’dɔ mo, zë o’dɔnnï dë. 4 Zë ï’dïnnï wa yeto ma kyedre mati vïdï ɔ’bɔ dë zi kïnjë mo ne da vïdïye. Zë ombannï dë zi kɔnyi zë zi kïnjë le nje da gisi kala nnï aba."

5 "Zë o’dɔnnï wa mati vïdï zi kongɔ. Zë idannï kɔ’di piri konda ga bɔngɔ 'bënnï zi yada zë na laka. Zë ï’dïnnï bɔngɔ kanyi kölökpö gë nnï zi yada zë na vo mötu. 6 Zë o’dɔnnï lɔvɔ bi ma laka ne, bi 'ba karama, bi lima mati na laka aba mï bi 'ba mötu. 7 Zë o’dɔnnï lɔvɔ zi mëtënnï watɔwɔ aba mï bi 'ba wakogo. Zë o’dɔnnï lɔvɔ zi ko’jo vo komoyandi."

8 "Akɔ’jɔ yï dë, ‘Vo komoyandi,’ ga kö’du 'e biya ta dakota kölö, vo komoyandi nje kölö. 9 Akɔ’jɔ vïdï maako dë dakaŋo kinye na ‘'bu,’ ga kö’du ëdïye nje 'bu kölö aba komorïyë. 10 Ako’jo yï dë na ‘vo komoyandi,’ ga kö’du vo komoyandi kölö 'bëyï ra Korisitɔ. 11 Ma kyedre kölö mï kutë’e mëdï na vo kalima. 12 Mo mati o’dɔ rë nï na kyedre, maya’ba rë nï hulëhu, mo mati o’dɔ rë nï hulëhu, ako’dɔ mo kyedre."

Yësu ayada kö’du kyënyë ko’dɔ 'ba vo komoyandiye

13 "Hala atëdï na kyënyë zi ye, vo komoyandi 'ba vo kö’du kï’dï Farasi ëtï. 'E vïdï komokandi ne’e, isiye ha loko 'ba damöku 'ba Wïrï kazi vïdï ödunnï, kpa ödu’e dë. Ayata’e vïdï mati ëdï rë nnï kï’dï zi tödu ne kpa."

14,15 "Atëdï na kyënyë zi ye vo komoyandi 'ba kö’du kï’dï Farasi ëtï. 'E vo komokandi ra. Umu’e kyëtï ranga kayo kpuru tëmï dakaŋo kutu kutu biya lasi aba, zi vïdï maako ki’ja zi gërï 'be’e ne kïrï. Ëzë i’ja’e vïdï ne ku, o’dɔ’e mo ndra na kyënyë tada’e, zi tï’bë mï gehena kaa 'e."

16 "Riti atëdï na kyënyë zi ye, alaga’e dagba zi vïdï, mora 'e na vo komoköndu. Ayandiye iya 'e henye, ëzë vïdï maako alömu ru yëkëlu aba, mo anza dë na kida lömu 'bënï ne aba. Ëzë mo alömu ru dahabo mati mï yëkëlu ne aba, mo ku na kida. 17 'E vo komoköndu lumë’e, vala ra na kyedre, dahabo kɔdɔ yëkëlu ra o’dɔ, dahabo na laka? 18 Ayandiye kpa iya’e henye, ‘Ëzë vïdï maako alömu ru karasa aba, mo anza dë na kida lömu 'bënï ne aba. Ëzë mo alömu rë nï ku wa ma ï’dï da karasa ne aba, mo ku na kida.’ 19 'E vo komoköndu ne’e, ma vala ra na kyedre wakï’dï kɔdɔ karasa ra, o’dɔ wakï’dï na koho? 20 Ëzë vïdï maako alömu ru karasa aba, mo ëdï lömu kpa wa mati biya ï’dï dɔ mo ne. 21 Ëzë mo alömu ru yëkëlu aba, mo ëdï lömu mo aba, ehe Wïrï mati ëdï alima mï mo. 22 Ëzë vïdï maako alömu komorïyë aba, mo ëdï lömu kyïtï 'ba Wïrï mati mo alima dɔ mo."

23 "Atëdï na riti zi ye vo komoyandi 'ba vo kö’du kï’dï nnï Farasi ëtï. 'E vo komokandi ne’e, ï’dïye zi Wïrï 'butë, wokonyo tisiwa kaa kököwu. Mora o’dɔ’e wa ma laka ndra 'ba ködu kï’dï dë, kaa tïnyö, mïkyëyï, koma aba. 24 O’dɔ re 'e na vo dagba zi vïdï, mora 'e na vo komoköndu, oba’e kɔŋɔ tisi yaga tëmï wa kuwë 'be’e, ondrɔ’e jemele."

25 "Atëdï na riti zi ye vo komoyandi 'ba vo kö’du kï’dï Farasi ëtï. 'E vo komokandi ne’e, akaka’e ra sikɔ 'be’e gbenje aba ta rɔ mo yaga, mï zë ndɔ na wakoyi mï kumbë aba. 26 Farasi vo komoköndu, akyitɔ wa mati ëdï mï sikɔ dagba, ma ta yaga akakyitɔ kpa 'da."

27 "Atëdï na riti zi ye vo komoyandi 'ba vo kö’du kï’dï Farasi ëtï. 'E vo komokandi ne’e, 'e kaa da wogo mati akɔ’jɔ rë zë na kanyi, lunzu ṛï’dï kanyi aba, ongɔ na laka tarë zë yaga, mï zë ndɔ na yingɔ keŋe yöku aba. 28 Tëmï gërï kölö ne, ta ra’e yaga na laka zi vïdï biya, mï ye ndɔ na komokandi kö’du lïtë aba."

Yësu ame’do kö’du riti 'bëzë

29 "Atëdï na riti zi ye vo komoyandi 'ba vo kö’du kï’dï Farasi ëtï. 'E vo komokandi ne’e, o’ba’e ogo na laka zi nëbïye, ayada’e tɔwɔ zi wogo zi vïdï mati alimannï kyere na lima ma laka. 30 Iya’e henye, ëzë ëdïye kyere mï kadra 'ba 'bu’e vu’e nani, o’dɔ’e kö’du mati zë o’dɔnnï nëbï ne’e, kofo mo gɔ mo ne dë. 31 Omba’e dɔ mo tïnyö, 'e ra na kozo 'ba vïdï ma ofonnï nëbï ne’e. 32 Ï’bë’e zɔ dagba wa mati 'bu’e vu’e ayetonnï ne kinde mo."

33 "'E wiri ne’e, 'e gisi 'ba wiri ne’e, hala asösu’e zi taho. Kazi vurë re 'e, atï’bë’e biya mï gehena. 34 Mayada zi ye makutu nëbï ne’e, kora vo kö’du yɔlɔ, vo komoyandi ëtï, akofo’e kyamo’e, akatötö’e agamo’e akakpökyïye agamo’e mï bi 'ba mötu’e, akore’e zë tëmï gawo ta da gawo. 35 Riti biya kö’du vïdï mbiya mati ofo’e ne akalëpï de 'e tëmï kozo 'ba Abele zi kozo 'ba Zakariya wisi 'ba Berahiya mati ofo’e mï kutë yëkëlu karasa aba. 36 Mayada zi ye tïnyö, riti biya 'ba wakofo ne akalëpï da vïdï 'ba ko’do nenye."

Yësu o’dɔ lɔvɔ Yerusalema

37 "Yerusalema, Yerusalema ofo’e nëbïye, u’du’e vo lö’bö mati Wïrï utu zi ye ne ṛï’dï aba. Da ndö momba zi kala ma kï’dï mo kpo ra vïdï 'be’e biya, kaa ma yëru mati atoto gisisi ënï hu förö nï, ila’e ma dë. 38 Loko 'be’e ne akila na mï mbiya. 39 Tëmï ndenye dagba ani, mayada zi ye henye, ongɔ’e ma dekpe löhu le akiya’e henye, ‘Wïrï ï’dï ya’da zi mo mati ayi mï ru 'ba Yere.’"