1 "Mï kadra nani, damöku 'ba Wïrï atëdï henye. Mïnzö ngulu 'butë oba lamba ënnï ënyï ï’bënnï yaga da 'bïyësï kutrë. 2 Muyï tëmï zë na vo lumë, agamo’e muyï na vo kö’du yɔlɔ. 3 Ma vo lumë ne oba lamba 'bënnï obannï kya 'ba yënï wa’do dë nnï aba. 4 Ma vo kö’du yɔlɔ ne’e, obannï maṛanjiye ndɔ yënï aba mï mo. 5 'Bïyësï alïkö dënï tisi ta bi tayi, mïnzö ne’e, ayetonnï nano o’donnï gbɔ."

6 "Ëdï mï kutë yɔndɔ kudu aa yaga iya henye, ‘'Bïyësï ëdï kinye, ayiye dɔ mo kutrë.’ 7 Mïnzö 'butë ne ënyï alironnï, akɔ’jɔ lamba ënnï gbɔ. 8 Mïnzö ma lumë ne iyannï zi ma vo kö’du yɔlɔ ne’e henye, ‘Ï’dïye kya 'ba yënï 'be’e, tisi zi ze, ga kö’du 'beze inde rë nï ku.’ 9 Vo kö’du yɔlɔ ne aya’bannï dɔ mo iyannï henye, ‘'E’e, anza dë kyɔ ga kö’du 'e ehe ze, ï’bë’e bi 'ba wakogo kyamo kogo ga kö’du’e.’ 10 Mïnzö ma lumë ne ënyï ï’bënnï gbɔ kya 'ba yënï kogo. Mati ëdïnnï tï’bë, 'bïyësï ɔkɔ gbɔ ta gë zë. Zë mati nzɔ muyï ne ënyï ï’bënnï mo aba mï karama 'ba oze isinnï ha loko gbɔ. 11 Yaa, mïnzö agamo ne ɔkɔnnï, ënyïnnï kudu iyannï henye, ‘Kyedre, kyedre, ayëhu ha loko zi ze tödu.’ 12 'Bïyësï aya’ba dɔ mo iya henye, ‘'E’e, mayɔlɔ 'e dë.’" 13 Yësu ï’dï dɔ mo iya henye, "Ëdïye komo kï’dï aba ga kö’du ayɔlɔ’e ko’do mo kadra mo aba dë."

14 "Mï kadra nani aba, damöku 'ba Wïrï atëdï henye. Kora maako ëdï omba ku zi tï’bë bi yingɔ, mo ako’jo vo kalima 'bënï ne’e ise ga wasisi 'bënï zi zë zi tëdïnnï na vo gɔ mo kongɔ. 15 Mo ï’dï zi ma kölö wa mati mo akatɔ’bɔ ko’dɔ mo. Zi ma kölö, mo ï’dï kɔhi dahabo ŋbiriṛi kpulukumuyï. Zi agamo, mo ï’dï kpulukurïyö, zi ma wota mo kpulukukölö, ënyï ï’bë gbɔ bi yingɔ. 16 Vo kalima mati oba 'bënï kɔhi ŋbiriṛi kpulukumuyï ne kandi ï’bë o’dɔ lɔɔ mo aba, i’ja dɔ mo kpa kpulukumuyï. 17 Tëmï gërï kölö ne vo kalima mati oba kpulukurïyö ne, i’ja dɔ mo kpa kpulukurïyö. 18 Vo kalima mati ïrï 'bënï kpulukukölö ne, ï’bë ole wogo mï kaŋo oho kɔhi 'ba kyedre 'bënï ne gbɔ mï mo."

19 "Gɔ mo ëhï na konda, kyedre 'ba vo kalima ne’e ayi hulëhu alimannï ga kɔhi ne kiti mo zë ëtï. 20 Vo kalima mati ïrï kɔhi 'bënï kpulukumuyï ne, ödu ï’dï kpulukumuyï agamo. Mo iya henye, ‘Ï’dï zi ma kɔhi ŋbiriṛi kpulukumuyï, kyedre, ongɔ te, nenye aga kpulukumuyï vere mati mi’ja.’ 21 Kyedre 'bɔmo iya zi mo henye, ‘O’dɔ ku laka, yï vo kalima 'ba kö’du koma laka ra. Ëdï mï koma aba zi kɔhi tisi ne ki’ja mo here, ma kï’dï yï na vo da kɔhi ma kyedre. Ayi loko ta, dayanyi mï rakyenyi ne yï aba.’"

22 "Vo kalima mati ï’dï 'bɔmo kpulukurïyö ne ayi loko iya henye, ‘Ï’dï zi ma kɔhi kpulukurïyö, kyedre ongɔ te, kinye kya 'ba kpulukurïyö agamo mati mi’ja.’ 23 Kyedre 'bɔmo iya zi mo henye, ‘O’dɔ ku laka yï vo kalima 'ba kö’du koma laka ra. Ëdï mï koma aba zi kɔhi tisi ne ki’ja mo here, makï’dï yï na vo da kɔhi ma kyedre. Ayi loko ta, dayanyi mï rakyenyi ne yï aba.’"

24 "Vo kalima mati ïrï 'bënï kpulukukölö ne, ayi ödu loko iya henye, ‘Kyedre, mayɔlɔ yï kora vo kala kyigɔ ra, ëdï wakumu kpa ïyï dë, ëdï wa 'ba yaka toto kpa kazi kofo kïlï. 25 Ma na tere, mï’bë moho kɔhi 'bëyï ne mï kaŋo ongɔ te, kinye wë yï ëdï.’ 26 Kyedre 'bɔmo iya zi mo henye, ‘Yï vo kalima vo wëdï kyënyë. Ayɔlɔ dë mëdï wakumu kpa mïyï dë, wa toto ta yaka kazi kofo kïlï? 27 Laka, ï’dï kɔhi ama ne kyere mï loko 'ba kɔhi sesi, ma koba biya hulëhu dɔ mo mati i’ja ne aba ëzë ma’ba ku liŋɔ.’"

28 "Yaanya aba oba’e kɔhi ne 'de kazi mo ï’dïye zi ma kpuluku’butë aba ne. 29 Ga kö’du vïdï biya mati ëdï wa aba, le kyɔ akï’dï, mo atëdï mo aba kyɔ. Ta da mati mo ëdï mo aba. Vïdï mati anza wa aba dë, gbï le nje ma tisi mati mo ëdï mo aba, akoba 'de kazi mo. 30 Vo kalima lumë ne, u’du’e mo yaga mï bi köndu ani mo akudu hë nï konyo aba."

31 "Mati Wisi a Vïdï ayi mï bikanyi kyedre malayika ëtï, mo akalima da kyïtï, 32 vïdï 'ba damöku ne akatoto biya komo mo. Mo akinye mï zë mï gboko rïyö, kaa vo tïmëlë yako inye tïmëlë tara wanya here. 33 Mo akï’dï vïdï ma laka 'e da kala nï ma tïrï, ma kyënyë’e da kala nï ma gali."

34 "Yere akiya zi vïdï ma da kala nï ma tïrï ne henye, ‘'Ayiye, 'e mati 'bu ma ï’dï ya’da ku zi ye ne. Ayiye mï damöku mati akɔ’jɔ ku kyere zi ye, ko’dɔ 'ba dakaŋo aba. 35 Ma na o’bo, ï’dïye wakonyo zi ma. Ma na kɔdrɔ, ï’dïye wini zi ma kuwë. Ma na vo leze, oba’e ma liŋɔ 'be’e. 36 Ma na ga mbiṛö usu’e bɔngɔ ra ma. Ma na rakɔɔ, ongɔ’e ga ma. Ma mï kamba, ëdïye tï’bë ma kongɔ.’"

37 "Vïdï ma laka ne akaya’bannï dɔ mo zi mo, akiyannï henye, ‘Ndala aba ya Yere, dongɔ yï na o’bo, dïdï wakonyo zi yï, mandere kɔdrɔ aba, dïdï wini zi yï kuwë? 38 Ndala aba di’ja yï na tu’dë maako dïrï ze yï liŋɔ 'beze, mandere na ga mbiṛö dusu bɔngɔ rë yï? 39 Ndala aba dongɔ yï na rakɔɔ mandere mï kamba dëdï tï’bë yï kongɔ?’ 40 Yere akaya’ba zi zë akiya henye, ‘Mayada zi ye, ëzë o’dɔ’e kö’du ne gbï le nje zi vïdï ma tisi kaa ma nenye’e ne, o’dɔ’e ku zi ma.’"

41 "Mo akiya zi zë ma da galinï ne, ‘Ï’bë’e 'de tara ma karani 'e mati mï wa sënë a Wïrï. Ï’bë’e 'de mï wa’do ma kazi ndundu, mati akɔ’jɔ ku zi Satani malayika 'bënï ëtï. 42 Ma na o’bo ï’dïye wakonyo dë zi ma. Ma na kɔdrɔ ï’dïye wini dë zi ma kuwë. 43 Ma na vo leze, ïrïye ma dë kala aba mï liŋɔ 'be’e. Ma na ga mbiṛö usu’e bɔngɔ dë ra ma. Ma na rakɔɔ mï kamba ongɔ’e ga ma dë.’"

44 "Akaya’bannï dɔ mo zi mo, akiyannï henye, ‘Ndala aba ya Yere, dongɔ yï na o’bo, na kɔdrɔ, na vo leze, na ga mbiṛö, na rakɔɔ, mï kamba, dakɔnyi yï dë?’ 45 Yere akaya’ba dɔ mo akiya henye, ‘Mayada zi ye, ëzë omba’e dë zi kɔnyi gbï le nje vïdï ma tisi nenye’e ne, omba’e dë ne ma ra kɔnyi.’ 46 Vïdï kyënyë ne’e atï’bënnï mï wa’do ma ŋburu ŋburu riti aba, vïdï ma laka akatï’bë 'bënnï mï dïdï ma ŋburu ŋburu."