1 Mati Yësu inde kö’du ne’e yandi mo ku biya, mo iya zi vo lö’bö 'bënïye henye, 2 "Mï ko’do rïyö aba kaa ayɔlɔ’e atëdï karama 'ba laga 'ba koli, Wisi a Vïdï akï’dï zi tötö mo." 3 Kyedre 'ba vo karasa nnï vïdï kyedre’e ëtï atoto rë nnï mï loko kyedre 'ba Kayafa vo da vo da karasa’e. 4 O’dɔnnï yeṛe zi Yësu kïrï zi kofo mo na liwo. 5 Zë iyannï henye, "Do’dɔ’e dë mï kadra karama. Kazi vïdï ënyïnnï na wehe."

6 Mati Yësu ëdï mï Beteniya liŋɔ 'ba Simona, kora mati na riti kɔɔ mönyu aba ne. 7 Mati Yësu ëdï wakonyo, vïdï mbara ayi zi mo yënï ogo kɔhi kyedre aba, mo ope gbɔ dɔ mo. 8 Mati vo lö’bö 'bɔmo ongɔnnï kö’du ne here, ënyïnnï na kamo. Zë ako’jonnï kö’du iyannï henye, "Kö’du a’di ayaŋa wa ne biya here gɔ mo? 9 Yënï këzï ngutru nenye akogo yaga kɔhi kyedre aba, kï’dï zi vo leriye."

10 Yësu ayɔlɔ kö’du mati zë ëdïnnï kiya ne, iya zi zë henye, "Kö’du a’di ëdïye sawiya ko’dɔ zi mbara ne? Kö’du teme laka ra mo o’dɔ zi ma. 11 Atëdïye 'duwï vo lere ëtï mï kutë’e, anza’e dë 'duwï ma aba. 12 Kö’du mati mo o’dɔ zi yënï këzï ngutru nenye kope ra ma, zi kɔ’jɔ ma nzɔ zi kusu. 13 Yaanya aba mayada zi ye, bi ma yöyo laka nenye ayëtï zi mo mï dakaŋo ne biya, wa mati mo o’dɔ ne atëdï na kö’du sösu ga kö’du mo."

14 Ma kölö tëmï vo lö’bö 'butë dɔmorïyö ne ru mo Yudasi Sikereto ï’bë zi vo da karasa’e 15 ako’jo hɔ mo iya henye, "Akï’dïye a’di zi ma, ëzë masusu Yësu zi ye?" Zë itinnï kɔhi ŋbiriṛi 'butëwota ï’dïnnï gbɔ zi mo. 16 Ta gɔ mo Yudasi ëdï gërï ma laka koma zi Yësu kï’dï zi zë.

17 Mï dagba ko’do 'ba karama 'ba laga 'ba koli, vo lö’bö ayinnï zi Yësu ako’jonnï hɔ mo iyannï henye, "Kila omba ze zi wakonyo 'ba karama 'ba laga 'ba koli ne, kɔ’jɔ mo nzɔ zi bi yï?" 18 Mo iya zi zë henye, "Ï’bë’e zi kora maako ayada’e zi mo henye, ‘Vo komoyandi iya henye, kadra ama ɔkɔ ku, ma vo lö’bö 'bama ëtï dako’dɔ karama 'ba laga 'ba koli liŋɔ 'bëyï.’" 19 Vo lö’bö o’dɔnnï kaa mati Yësu ayada zi zë, akɔ’jɔnnï wakonyo 'ba laga 'ba koli gbɔ.

20 Kɔsi kadra aba, Yësu vo lö’bö 'butë dɔmorïyö ne ëtï, alimannï gbɔ akaŋo wakonyo. 21 Mati ëdïnnï wakonyo, Yësu iya zi zë "Mayada zi ye, vïdï ma kölö tëmï 'e akasusu ma." 22 Vo lïtu’e na rasösu ayetonnï hɔ mo ko’jo ma kölö ta ga oka nï, "Tïnyö, Yere, iya dë ma ra?" 23 Yësu ënyï aya’ba dɔ mo zi zë iya henye, "Ma kölö mati usu kala nï ma aba mï gbenje ne akasusu ma. 24 Wisi a Vïdï akoli kaa mati kö’du yöru iya mo akoli, atëdï na riti zi vïdï mati asusu Wisi a Vïdï zi kofo ne. Atëdï na laka zi vïdï ne lima kazi ko’jo mo."

25 Yudasi vo susu ënyï ame’do rïyë iya henye, "Tïnyö vo komoyandi ayɔlɔ anza dë ma ra?" Yësu aya’ba dɔ mo iya henye, "Kaa mati iya ne."

26 Mati zë ëdïnnï wakonyo, Yësu oba nzoyi mangɔlɔ’bɔ o’dɔ mötu 'ba öwö’dï, owe mï mo ï’dï zi vo lö’bö 'bënïye. Mo iya zi zë henye, "Oba onyo’e, nenye ida ra ma ra." 27 Mo oba köfö o’dɔ öwö’dï zi Wïrï, ï’dï zi zë, iya henye, "Uwë’e, 'e biya ta ge’e. 28 Nenye yama ma mati na da kö’du kï’dï a Wïrï, yama mati alikɔ yaga ko’du vïdï kayo kila tëmï kö’du kyënyë. 29 Mayada zi ye makuwë a’ji nenye dekpe löhu le mï damöku a 'Bu ma." 30 Aya’binnï ngala ënyï ï’bënnï gbɔ da Döku 'ba Olivo.

31 Yësu iya zi zë henye, "Yɔndɔ nenye aba ataho’e biya akila’e ma kaa mati kö’du yöru iya henye, ‘Wïrï akofo vo tïmëlë yako, tïmëlë ne akapere rë nnï.’ 32 Ta pëtï tënyï 'bama tëmï koli, makatï’bë dagba komo’e mï Galilaya." 33 Petero ënyï ame’do rïyë iya zi Yësu henye, "Mila yï dë, ëzë ma kayo ne’e, ilannï yï le." 34 Yësu iya zi Petero henye, "Mayada zi yï gba kazi zanga ayapa mï yɔndɔ ne akiga hë yï, akiya da wota henye ere, ayɔlɔ ma dë." 35 Petero ënyï aya’ba dɔ mo iya henye, "Ëzë le zi ma koli kö’du yï, mila yï dë." Vo lö’bö agamo’e iyannï kpa kö’du kölö ne.

36 Yësu ënyï ï’bënnï vo lö’bö 'bënï ëtï mï bi mati ako’jo Getesemina, mo iya zi zë henye, "Alima’e kinye mëdï dero tï’bë dagba amötu." 37 Mo oba nï aba Petero, gisi 'ba Zebedeyo rïyö. Yësu kö’du sösu riti aba, 38 mo iya zi zë henye, "Kö’du sösu mï di’di ma ne ku na kyedre, omba ku kara zi ma kofo. Alima’e kinye bi kida ma aba." 39 Mo ënyï ï’bë tisi dagba kɔwɔ, umë rë nï na komokomo akaŋo amötu iya henye, "'Bu ma, ëzë atɔ’bɔ oba riti ne 'de ta da ma. Anza kö’du komba 'bama, kö’du komba 'beyï ra."

40 Mo ënyï a’ba zi vo lö’bö wota ne’e, i’ja zë ako’do, mo iya zi Petero henye, "Hala 'e wota ne ɔ’bɔ’e dë zi bi kida ma aba gbï le nje kadra kölö?" 41 Alima’e nzɔ bi kida mötu aba, kazi alëpïye mï kö’du yɔnzɔ. Di’di ra omba, ida ra kazi kyigɔ.

42 Yësu ënyï ï’bë kpa löhu mï da rïyö a mötu, iya henye, "'Bu ma, ëzë köfö 'ba riti nenye oba dë, ma ki’ja riti mï da kö’du komba 'bëyï." 43 Mo a’ba i’ja vo lö’bö ne’e, kpa löhu ako’do, zë ɔ’bɔnnï dë zi lima na ngö. 44 Yësu ënyï ila zë löhu ï’bë 'de amötu ma da wota mo iya kpa kö’du kölö ne. 45 Mo a’ba zi vo lö’bö’e iya henye, "Ëdïye gba a ko’do re 'e alawo? Ongɔ’e te, kadra 'ba zi Wisi a Vïdï kï’dï, zi vïdï kyënyë’e ɔkɔ ku. 46 Ënyï dï’bë’e. Ongɔ’e te, kora mati asusu ma ne ëdï nenye."

47 Mati Yësu ëdï gba ame’do, Yudasi mo kölö tëmï vo lö’bö 'butë dɔmorïyö ne’e, ɔkɔ gbɔ. Mo aba vïdï kayo ëdïnnï kulu, mɔvɔ aba kala nnï, kyedre 'ba vo karasa vïdï kyedre ëtï ra utunnï zë. 48 Yudasi o’dɔ dakyïnë kö’du maako zi vïdï kayo ne’e zi yɔlɔ, iya henye, "Kora mati munzu hɔ mo ne, mo ra omba’e, ïrïye mo." 49 Yudasi ï’bë mbïyï zi Yësu, iya henye, "Rakyëyï mëdï yï aba vo komoyandi," unzu hɔ mo gbɔ.

50 Yësu aya’ba dɔ mo iya henye, "Aboka ma, o’dɔ kö’du mati ayi gɔ mo kandi." Zë ayinnï, ïrïnnï Yësu anda’bannï mo gbɔ gö. 51 Ma kölö tëmï vo lö’bö mati Yësu aba ne, otɔ kulu 'bënï tëmï sirikpa iga mbili vo lö’bö 'ba vo karasa, ikye yaga. 52 Yësu iya zi mo henye, "Aya’ba kulu 'bëyï ne hulëhu ga bi mo. Zë biya mati ïrïnnï kulu ne, akofo zë kulu aba. 53 Ayɔlɔ’e dë makako’jo 'Bu ma kö’du wa kɔnyi, kandi mo akutu kyɔ ta da malayika kpuluku’butë dɔmorïyö 'ba vo wehe? 54 Kö’du ne ako’dɔ rë nï zi tëdï kaa mati kö’du yöru iya mo’dɔ rë nï."

55 Yësu ënyï ame’do zi vïdï kayo ne’e, iya henye, "Ayiye kulu mɔvɔ aba kala’e, zi ma kïrï mo kaa ma vo kö’du kï’dï pere? 'Duwï ma lima akaŋo kö’du yandi mï yëkëlu, ïrïye ma dë. 56 Kö’du nenye biya o’dɔ rë nï zi wa mati nëbïye ayörunnï, mï kö’du yöru zi tayi tïnyö." Vo lö’bö biya ilannï mo ahowënnï.

57 Zë mati ïrïnnï Yësu ne, obannï mo tï’bë mo aba liŋɔ 'ba Kayafa kyedre 'ba vo karasa, bi mati vo komoyandi 'ba vo kö’du kï’dïye nnï vïdï kyedre ëtï atoto rë nnï ga bi kölö. 58 Petero usu gɔ mo ta bi kɔwɔ le bi 'ba vurë, liŋɔ 'ba kyedre 'ba vo karasa. Mo ï’bë ödu bi 'ba vurë alima gbɔ akaŋo vo kanya ëtï, kongɔ wa a’di ako’dɔ zi Yësu.

59 Vo da vo karasa 'e vïdï 'ba vurë’e kikye ëtï ayɔnzɔnnï zi mbërë kiga ra Yësu zi mo kofo, 60 zë i’jannï kö’du kyënyë maako dë, vïdï kayo ayinnï le ndɔndɔ kiga gumu. Ndundu mo aba vïdï kora rïyö ayinnï, 61 iyannï henye, kora nenye iya henye, "Ma kiha akaŋo yëkëlu 'ba Wïrï ne, yaa ko’do da wota aba ko’ba mo löhu."

62 Kyedre 'ba vo karasa ënyï rïyë iya zi Yësu henye, "Anza da kö’du ya’ba aba dë, ga kö’du wasusu rë yï ne?" 63 Yësu alima ti. Löhu kyedre 'ba vo karasa ame’do zi mo, iya henye, "Mï ru 'ba Wïrï dïdï yaanya aba mï’dï yï ku mï lömu, ayada zi ze ëzë yï Korisitɔ, Wisi 'ba Wïrï ra." 64 Yësu aya’ba dɔ mo zi mo iya henye, "Mo ra kaa iya ne. Miya zi ye henye, tëmï kadra ma dagba ani, akongɔ’e Wisi a Vïdï ta bi lima da kala tïrï 'ba Wïrï kyigɔ tayi tëmï fɔli 'ba komorïyë." 65 Mati kyedre 'ba vo karasa owo kö’du ne here, ënyï na kamo iza bɔngɔ 'bɔmo iya henye, "Ne kö’du sawiya ra. Domba kya kö’du 'ba vo hu kö’du dɔ rɔ dekpe. Owo’e kö’du sawiya ne ku. 66 Asösu’e a’di ra?" Zë aya’bannï dɔ mo iyannï henye, "Mo o’dɔ kö’du kyënyë ku, mofo mo." 67 Zë o’binnï oro komo mo, u’bönnï mo, zë maako’e isannï mo, 68 iyannï henye, "Ayada zi ze Korisitɔ, ëzë yï nëbï ra, ayada ëyï ra isa yï."

69 Mati Petero ëdï lima yaga mï liŋɔ 'ba Kalafa, vo lö’bö kölö tëmï mbara 'ba kyedre 'ba vo karasa ayi zi mo iya henye, "Yï kpa Yësu aba tëmï Galilaya." 70 Mo iga hë nï ta da komo vïdï kayo ne’e biya. Mo aya’ba dɔ mo iya henye, "Ma yɔlɔ kö’du ma ëdï ame’do gɔ mo ne dë, 71 ënyï asi wënï yaga ha loko bi 'ba vurë. Mbara vo lö’bö agamo ongɔ mo iya zi vïdïye henye, mo Yësu 'ba Nazereta aba." 72 Löhu Petero iga hë nï aya’ba dɔ mo iya henye, "Malömu tïnyö mayɔlɔ kora ne dë." 73 Tisi yaa ta gɔ mo vïdï kora mati ëdïnnï tɔrɔ ani ne, ayinnï zi Petero iyannï henye, "Yï ma kölö tëmï zë, dayɔlɔ ze tëmï gërï me’do 'bëyï." 74 Petero iya henye, "Ma lömu kö’du tïnyö ra mëdï ayada, ëzë anza dë here, Wïrï mï’dï riti zi ma. Ma yɔlɔ kora ne dë." Zanga ënyï ayapa, 75 Petero asösu kö’du ma Yësu ayada zi nï iya henye, "Gba kazi yapa 'ba zanga, akiya da wota henye ere, ayɔlɔ ma dë." Mo ënyï asi gbɔ yaga akudu na kyënyë.