Tiago 1

Koma kö’du yɔlɔ aba

1 Kazi Yemisi, vo lïtu 'ba Wïrï ehe 'ba Yere Yësu Korisitɔ. Wamëtë biya zi vïdï a Wïrï mati opere rë nnï mï damöku ne biya.

2 Öndu ma’e ëmï ma ëtï, ëdï 'e na rakyenyi ëzë kyïnë 'ba kö’du yɔnzɔ biya ayi le gërï 'be’e, 3 ga kö’du ayɔlɔ 'e koma 'be’e yɔnzɔ, atëdï nduwë zi ye. 4 Ayɔlɔ 'e nduwë 'be’e, ako’dɔ 'e ndɔ na kyigɔ. 5 Mora ëzë vïdï maako tëmï 'e omba kö’du yɔlɔ, mo ma mötu zi Wïrï, mati akï’dï zi mo kyɔ ndra, kazi kö’du kyënyë ki’ja mï mo.

6 Mora ëzë mo amötu, mo moma kazi da jijiji. Vïdï mati dɔ mo jijiji ëdï kaa kagba 'ba wini mï ranga mati ëdï kope ehe buluk ïnjë. 7 Vïdï ma here ne’e ma asösunnï dë na kïrïnnï wa kazi Wïrï. 8 Zë ɔrɔnnï dë da gërï kölö.

Leri wa kyɔ aba

9 Öndu mati na vo leri, mo mëdï rakyenyi aba ga kö’du mo ëdï vo da wa kayo. 10 Mora vo da wa kayo, mo mëdï rakyenyi aba ga kö’du mo vo leri. Wa kayo 'bɔmo akalaga kaa döru 'ba wevo 'ba möku. 11 Kadra asi nzere, bi kyïtu o’bɔ weno ne, döru mo alëpï, ehe teme 'bɔmo ne ayaŋa gbɔ. Mï gërï kölö ne, vo wa kayo akayaŋa mï lɔ’ɔ 'bɔmo.

12 Vo rakyenyiye ra mati alimannï koma aba hu wa yɔnzɔ. Ëzë zë ɔrɔnnï na kyigɔ mï wa yɔnzɔ, akïrïnnï biriti 'ba dïdï mati Wïrï alömu ku zi zë mati o’dɔnnï lɔvɔ mo. 13 Ëzë ayɔnzɔ vïdï, mo miya dë henye, "Wa yɔnzɔ nenye ayi kazi Wïrï." Ga kö’du Satani ɔ’bɔ yɔnzɔ Wïrï dë, ehe Wïrï ɔ’bɔ yɔnzɔ vïdï maako dë. 14 Mora ayɔnzɔ vïdïye, mati kö’du komba kyënyë 'bëzë otɔ zë ku 'de, ehe kuyï zë akpa kö’du ko’dɔ 'bëzë aba. 15 Here kö’du sösu kyënyë 'bëzë ne ɔmɔ, ehe o’jo kö’du kyënyë, ehe kö’du kyënyë, mati ovu ku kyedre, o’jo koli.

16 Öndu ma’e ëmï ma ëtï, mo’ba 'e dë. 17 Wa kï’dï biya laka ne, ehe wakï’dï biya ŋbala ne ayi ta komorïyë, ayi akaŋo kazi Wïrï 'Bu 'ba bi kanyi 'ba komorïyë. Mo ofɔ dë kaa galili. 18 Mï kö’du ko’dɔ ɔmo, mo ika ze zi tëdï nenye kpuru tëmï me’do 'ba tïnyö, here zi ze tëdï na vo dagba mï kutë wa ko’dɔ ɔmo’e biya.

Kowo ko’dɔ aba

19 Öndu ma’e ëmï ma ëtï, asösu 'e kö’du nenye. Vïdï biya më’dï kandi zi me’do kowo, mora liya zi me’do ehe liya zi tayi na kamo. 20 Kamo 'ba vïdï köndu o’dɔ kö’du laka dë, mati Wïrï omba. 21 Here ayaŋa 'e kö’du ko’dɔ ma kyënyë, ehe biya rasesi tëmï kö’du mati eme dë, mati kyɔ mï kutë 'e. Ra kï’dï zi Wïrï, ehe një me’do mati mo ïyï mï di’di 'e, mati atɔ’bɔ yɔmɔ 'e.

22 O’ba’e re 'e dë nje mbiliye koze aba da me’do ɔmo. Ta gɔ mo, ï’dï 'e mï gɔ mo yɔnzɔ. 23 Vïdï mati oze mbili nï da me’do, mora ï’dï dë mï gɔ mo yɔnzɔ, ëdï kaa kora mati ongɔ bi mï ngana, ehe ongɔ rë nï kaa mati nëdï, 24 ehe ï’bë gbɔ 'de, kandi atölu tëmï mo wa mati mo ongɔ ne alaya kaa a’da. 25 Mora kora mati ongɔ bi kara mï kö’du kï’dï ma tïnyö, mati inga vïdï na da ngölö, ehe mo nduwë mbili nï koze gɔ mo, anza dë nje kowo mo mora kpa ko’dɔ mo, Wïrï akï’dï ya’da zi mo mï wa mati mo o’dɔ.

26 Ëzë vïdï mati ongɔ rë nï 'ba yënï, ehe asesi ndende nï dë, mo ëdï rë nï ko’ba, ehe yënï 'bɔmo ne o’dɔ waako dë. 27 Yënï mati Wïrï 'Bu ze omba ëdï ŋbala kazi ndɔndɔ ëdï henye: Zi ga gisiwala ehe ga mbara lu’bë kongɔ tëmï riti 'bëzë, ehe rasesi kazi wa kyënyë 'ba damöku ne.