Ba-Ebeleyo 12

5 Beno me zimbana nkindusulu yina Nzambi zabisaka beno mutindu bana ya yandi:

«Mwana ya munu, yindula mbote

kana Mfumu ke na kusungika nge,

mpe kuvwanda ve ya kulemba

ntangu yandi ke sembaka nge.

6 Ya tsyelika, Mfumu ke sungikaka

muntu yina yandi ke zolaka,

mpe ke pesaka kitumbu

konso mwana yina yandi ke yambaka✝12.6 Bng 3.11-12.»

7 Ni samu na kusungika beno, Nzambi ke sembaka beno. Nzambi ke na kubakila beno mutindu bana ya yandi. Ya kele na mwana yina tata ke sungikaka ve? 8 Kana Nzambi ke sungikaka beno ve mutindu ya kele samu na bana nyonso ya yandi, beno kele ve bana ya yandi ya tsyelika, kasi bana ya makangu. 9 Beto fwana kubambuka moyo na batata ya beto awa na ntoto. Bawu ke sungikaka beto, mpe beto ke zitisaka bawu. Na yina, beto fwana kutumama ya kulutila na Tata ya beto ya mazulu, mpe beto ke zinga. 10 Batata ya beto ke salaka yawu kaka na mwa ntangu mutindu bawu zola. Kasi Tata ya beto ya mazulu ke sungikaka beto samu na mbote ya beto, samu ti yandi sadisa beto na kukuma bantu ya longo mutindu yandi. 11 Ba ke na sungika beto ntangu yayi, mpe yawu ke na kupesa ve beto nsayi, kasi mawa. Kasi na bantangu ke kwiza, bayina ndimaka masembo ke kuzwa kizunu mpe ke zinga na ludedomo.