Esaya 55

Beno kwiza, beno nyonso yina kele na mpwila

1 Beno nyonso yina kele na mpwila,

beno kwiza na kisika yina kele na maza,

ya vwanda muntu yina kele ve na mbongo.

Beno kwiza, beno sumba mpe beno kudya!

Beno kwiza sumba malafu mpe miliki!

Kondwa kupesa mbongo, kondwa kusumba!

2 Samu na yinki beno ke na kubasisa mbongo ya beno na yina kele ve madya?

Samu na yinki beno ke salaka samu na madya yina ke yukutisaka ve?

Beno kuwa munu mbote, mpe beno ke kudya madya ya mbote,

beno ke vwanda na kilengi ya kudya madya ya kitoko.

3 Beno kuwa munu mpe beno kwiza na sika ya munu,

beno kuwa munu mpe beno ke zinga.

Mu ke sala na beno, ngwisani ya bantangu nyonso,

samu na kulungisa bansilulu yina mu tubaka na Davidi.

4 Tala, mu tulaka yandi mutindu mbangi ya makanda ya bantu,

mpe mutindu mfumu samu na kuyala makanda ya bantu.

5 Ya tsyelika, nge ke bokila bantu ya bayinsi yina nge vwandaka zaba ve,

mpe bantu ya bayinsi yina zabaka nge ve ke kwiza mbangu na sika ya nge,

samu na munu, Yave Nzambi ya nge,

Nzambi ya longo ya Isayeli,

yina me pesa nge nkembo.

6 Beno sosa Yave na ntangu beno lenda kutala yandi,

beno bokila yandi, ntangu yandi kele pene-pene!