1 Coríntios 5

ኪሪስቶሴ ጉሙርቃ ዓሶ ባኣካ'' ማዺንቴ ቦርሲሳ ማዾ

1 ዒንሢ ባኣኮ''ይዳ ማቾ ሃሣ ዓኒ ማዒባኣያና ላሂንታ፥ ቦርሲሳ ሃይሴ ዋይዚንታኔ፤ ዬያጉዴ ማዾ ሜሌ'' ዴሮ'' ባኣካ''ታዖ ማዺንቱዋያኬ፤ ዬይያ፦ ዒንሢ ባኣካ'' ፔኤኮ ዒንዶ ሌጎ ዔኬ ዓሲ ዓኣኔ ጌይንታኔ። ✝5፥1 ላሚ. ዎማ 22፥30። 2 ዓካሪ ዬያጉዴ ቦርሲሳ ማዾ ዒንሢ ባኣካ'' ዓኣንቴ ዓይጎሮ ዒንሢ ዖቶርቃይ? ዬያይዳፓ ዬያ ባኮ ዛሎ''ሮ ዖዪ፥ ዬያ ማዾ'' ማዼሢ ዒንሢ ባኣካ''ፓ ሺኢሻንዳያ ኮይሳያታንቴኬ። 3 ዎዚ ታ ዒንሢና ዎላ''ቱዋቴያ ዓያኖና ታ ዒንሢና ዎላ''ኬ፤ ሃሢ ታ ዓዳ'' ዒንሢና ዎላ'' ዓኣያ ማዒ፥ ዬያጉዴ ዒኢቴ ማዾ ማዼ ዓሢ ዑፃ ጎዳ ዬሱስ ኪሪስቶሴ ሱ’ንፆና «ዒ ዻቤኔ» ጌይ ታ ዎጌኔ። 4 ዒንሢ ቡኪንታ ዎዶ''ና ታኣኒያ ዓያኖና ዒንሢና ዎላ''ታሢሮ፥ ኑ ጎዳሢ፥ ዬሱሴ ሱ’ንፆና ሃሣ ዒንሢ ባኣኮ''ይዳ ዓኣ፥ ጎዳ ዬሱሴ ዎልቆና፥ 5 ጎሜ ማዻ፥ ዬያ ዓሢኮ ዑፆ ዓሽካ ባይቃንዳጉዲ ዒንሢ ባኣካ''ፓ ዱማሲ፥ ፃላሄም ዒዛ ዓኣሢ ዒንጋንዳያ ኮይሳኔ፤ ዬያ ዒንሢ ማዻንዳሢ' ጎዳ ጋፒንፆ ዎጎሮ ሙካኣና ዬያ ዓሢኮ ሼምፓሢ ዻቃንዳጉዲኬ።

6 ዓካሪ ዒንሢ ሄርሺንቲ ዖቶርቃሢ ጉሪኬ፤ ሙኑቃ ፃኣዛ ዺቦ'' ሙኑቆ ቢያ ካፂሳሢ ዒንሢ ዔሩዋይ? ✝5፥6 ጋላ. 5፥9። 7 ፃኣዛ ባኣ ሙኑቃ ዒንሢ ማዓንዳጉዲ ሙኑቆ ፃኣዞ ዒንሢዳፓ ባይዙዋቴ፤ ዒንሢዳ ዬይ ባኣሢያ ታ ዔራኔ፤ ዑሣ ዓኣዺፆ ኬሎ'' ማራዓሢ ማዔ፥ ኪሪስቶሴ ኑ ጋይቴ ሹኪንቲ ሃይቄኔ፤ ✝5፥7 ኬሲ. ማፃ 12፥5። 8 ዬያሮ ፑርቱሞና ጌኔ ማዾና ኩሜ፥ ሙኑቆ ፃኣዞናቱዋንቴ ሙኑቆ ፃኣዛባኣ ላኣዶ ሙዒ ኑኡኮ ቦንቾ ኬሎ'' ፒዙሞና ሃሣ ጎኑሞና ኑ ቦንቾም። ✝5፥8 ኬሲ. ማፃ 13፥3፤ ላሚ. ዎማ 16፥3።

9 ሓያኮ ቤርታ ታ ዒንሢም ፃኣፔ ኪኢቶ''ይዳ፦ «ማቾ ሃሣ ዓኒ ማዒባኣያና ላሃ ዓሶና ዎላ'' ፔቴ'' ማዒፖቴ» ታ ዒንሢም ጌዔኔ። 10 ዬያ ታ ጋዓዛ ሃያ ዓጮ''ይዳ ዓኣ ማቾ ሃሣ ዓኒ ማዒባኣ ዓሶና ላሃ ዓሶና ሚኢሾሮ ጎጋይቃ ዓሶና ዬያጉዲ ዉዞና ጎኔ ፆኦሲ ማዒባኣ ባኮ ካኣሽካ ዓሶና ዎላ'' ፔቴ'' ማዒፖቴ ጌይሢቱዋሴ፤ ያዺ ማዔያታቴ ሃያ ዓጮ''ይዳፓ ኬስካንዳያ ዒንሢም ኮይሳኔ ጌይሢኬ። 11 ታኣኒ ጋዓንቴ ዒንሢም ፃኣፔሢ፦ «ኪሪስቶሴ ጉሙርቃ ዓሲኬ» ጌይ ጌይ ማቾ ሃሣ ዓኒ ማዒባኣያና ላሃዞንሢና ሚኢሾሮ ጎጋይቃዞንሢና፥ ዬያጉዲ ጎኔ ፆኦሲ ማዒባኣ ካኣዦ ካኣሽካ ዓሶና ዓሲ ጫሽካ ዓሶና ማሢንታ ዓሶና ሃሣ ዉኡቃ ዓሶና ዎላ'' ፔቴ'' ማዒፖቴ ጌይኬ። ዬያጉዴ ዓሶና ዎላ'' ሙኡዚ''ታዖ ሙይፖቴ።

12 ኪሪስቶሴ ጉሙርቁዋ፥ ዙላ'' ዓኣ ዓሶ ዑፃ ዎጋኒ ታኣም ኮይሳያቱዋሴ፤ ኪሪስቶሴ ጉሙርቃ ዓሶይዳ ጋዓንቴ ዒንሢ ዎጋኒ ዳንዳዓያቱዋይ? 13 ኪሪስቶሴ ጉሙርቁዋ ዓሶይዳ ዎጋሢ ፆኦሲኬ፤ ዓካሪ ማፃኣፓ ጋዓሢጉዲ «ፑርቶ ዓሢ ዒንሢ ባኣካ''ፓ ሺኢሹዋቴ።»