1 ታኣኒ ቢያ ባኣዚ'' ማዻኒ ዳንዳዓ ዓሲቱዋዓዳ? ፆኦሲ ማዾ''ማኣ ታ ዳኪንቴያቱዋዓዳ? ኑ ጎዳሢ ዬሱሴ ታ ዛጊባኣዓዳ? ጎዳ ዬሱሴም ታ ማዼ ማዾ''ኮ ዓኣፓ ዒንሢቱዋዓዳ? 2 ጎዳ ታና ፆኦሲ ማዾ''ም ዳኬያ ማዔሢ ዔርዛ ማላታ' ዒንሢ ማዔሢሮ ሃንጎዋታ ታና ፆኦሲ ማዾ''ም ዳኪንቴያኬ ጌይባኣቴያ ዒንሢም ጋዓንቴ ታ ጎኔና ፆኦሲ ማዾ''ም ዳኪንቴሢኬ።

3 ፆኦሲ ማዾ''ም ዳኪንቲፆ ዛሎ'' ታና ዾንካ ዓሶም ታ ሂዚ ጋዓኔ፦ 4 ሙዖ ባኣዚ''ና ዑሽኮ ባኣዚ''ና ታኣም ኮይሱዋያዳ? 5 ፆኦሲ ማዾ''ም ዳኪንቴ ሜሌ''ዞንሢና ጎዳ ዬሱሴኮ ጌርሲንሢና ጴፂሮሴንሢናጉዲ ኪሪስቶሴ ጉሙርቃ ላኣሊ ዔኪ ዎላ'' ሃንታኒ ኮይሱዋኣሢ ታና ሌሊዳ? 6 ሃሣ ኑና ዎይሣኒ ማዺ ላቢ'' ናንጋኒ ኮይሳሢ ባርናባሴና ታኣና ሌሊዳ? 7 ዒንጎ ሚኢሼ ባኣንቴ ፔ ሚኢሼና ፖኦሊሴ ማዒ ማዻይ ዖናዳይ? ሃሣ ዎይኖ ቱካ''ዖ ዓኣፓ ካፃዛ ሙዑዋኣሢ ዖናዳይ? ቆልሞ ሄንቃያታዖ ዲኢቆ ዑሽኩዋይ ዖናዳይ?

8 ሓያ ታ ጋዓሢ ዓሲ ማሊሢና ሌሊዳ? ሙሴ ዔርዜ ዎጋ'' ሂዚ ጎውዋዓዳ? 9 ዎጎይዳ፦ «ሃኣኮ ሺርካ ጌሜኮ ዻንጎ ቱኪ''ፖ» ጌይንቲ ፃኣፒንቴኔ። ሂዳዖ ፆኦሲ ዬያ ጌዔሢ ጌማቶም ማሊዳ? ✝ 10 ዒዚ ዬያ ጌዔሢ ጎኔና ኑ ዛሎ''ቱዋዓዳ? ጎኔኬ፥ ዬይ ፃኣፒንቴሢ ኑ ዛላኬ፤ ዓይጎሮ ጌዔቴ ጎሽካሢ ሃሣ ሃኣኮ ሺርካሢ ሃኣኮይዳፓ ዒዛም ሄላ''ንዳያ ዓኣሢ ዔሪ፥ ሃጊ ማዓንዳ ዎዛ ጌሣሢሮኬ። 11 ኑኡኒ ዒንሢም ዓያና ባኣዚ'' ዜርቃዖ ዒንሢዳፓ ዓሲ ዒንጋ ባኣዚ'' ዴንቄቴ ዬይ ዼኤፒ ባኣዚ''ዳ? ✝ 12 ሃንጎዋታ ዬያ ባኮ ዒንሢዳፓ ዴንቃያ ማዔቴ ዓካሪ ኑኡኒ ዬያፓ ባሼ ዴንቃኒ ኮይሱዋዓዳ?

ኑኡኒ ጋዓንቴ ዬያይዲባኣሴ፤ ኑኡኒ ዬያ ሃሼ''ሢ፥ ኪሪስቶሴ ኮዦ ሃይሶ ማዾ''ኮ ዹቆ ማዑዋጉዲ ቢያ ባኣዚ'' ጊቢ'' ኑ ዳንዳዖም ጌይኬ። 13 ጌኤዦ ማኣሮይዳ ማዻ ዓሳ ሙዖ ዒኢካፓ ዴንቃሢንታ ሹጮና ማዦና፥ ፆኦሲም ዒንጎ ቤዞይዳ ማዻ ዓሳኣ ዒንጎ ባኮይዳፓ ዔኪ ሙዓሢ ዒንሢ ዔሩዋዓዳ? ✝ 14 ዬያጉዲ ኮዦ ሃይሶ ኬኤዛ ዓሳ ዔያታ ሙዓንዳ ባኮ ዬኖ ማዻ ማዾ''ይዳፓ ዴንቃንዳጉዲ ጎዳ ዓይሤኔ። ✝

15 ታኣኒ ጋዓንቴ ዬያ ታኣም ኮይሳ ባኮይዳፓ ፔቴ''ታዖ ዔኪባኣሴ፤ ዬይ ታኣም ሃሢ ያዺ ማዓንዳጉዲ ጌይቱዋሴ ሃያ ታ ዒንሢም ፃኣፓሢ፤ ታ ጫርቂ ጌስቴ ባኮ ጉሪ ማሃያይዳፓ ታ ሃሃይቄቴ ቃራኬ። 16 ኮዦ ሃይሶ ኬኤዚፃ ታኣም ዓይሢንቴ ዓይሥሢ ማዔሢሮ ታና ሄርሺንቲሳ ባኣዚ''ቱዋሴ፤ ታኣኒ ኮዦ ሃይሶ ኬኤዚባኣያ ማዔቴ ታና ባዴዔ! 17 ኮዦ ሃይሶ ቃኣሎ'' ናሽኪ ታ ኬኤዛያ ማዔቴ ላቢ''ፆ ዛሎ'' ታኣም ዒንጊንታንዳ ባኣዚ'' ዓኣኔ፤ ዓይሥሢና ታ ኬኤዛያ ማዔቴ «ማዼ» ጌይ ዓይሢንቴሢ ኩንሤያፓዓቴም ሜሌ'' ባኣዚ'' ታ ማዼኔ ጌይሢቱዋሴ። 18 ሂዳዖ ታኣኮ ላቢ''ፆም ዒንጊንታ ባካ ዓይጌንዴዳይ? ዓካሪ ታኣም ዒንጊንታ ባካ ኮዦ ሃይሶ ታ ኬኤዛኣና ታኣም ኮይሳ ባኮ ዔኩዋዖ፥ ዔኤቢ ባኣያ ማዺሢኬ።

19 ታኣኒ ዓይጎ ዓሲኮዋ ካራሚቱዋሴ፤ ማዔቴያ ታኣም ዳንዳዒንቴ ጎይፆና ሚርጌሢ ዻቂሻኒ ጌዒ ቢያሢኮ ታ ካራሚ ማዔኔ። 20 ዓይሁዴ ዓሶ ታ ዻቂሻኒ ዓይሁዶ ዓሶና ዓይሁዴ ዓሲ ታ ማዔኔ፤ ዎዚ ታ ሙሴ ዔርዜ ዎጎም ዓይሢንቱዋያ ማዔቴያ ሙሴ ዎጎም ዓይሢንታ ዓሶ ዻቂሻኒ ጌዒ ዔያቶጉዲ ታ ማዔኔ። 21 ዎዚ ታኣኒ ፆኦሲ ዎጋ''ፓ ኬስኪባኣያ ሃሣ ኪሪስቶሴ ዎጎማኣ ዓይሢንታያታዖ ዎጋባኣ፥ ዓይሁዴቱዋ ዓሶ ዻቂሻኒ ዔያቶጉዲ ታ ማዔኔ። 22 ኪሪስቶሴ ጉሙርቂፆና ላቤ''ዞንሢ ዻቂሻኒ ታ ዔያቶጉዲ ማዔኔ፤ ዳንዳዒንቴ ጎይፆና ፔቴ'' ፔቴ''ዞንሢ ዻቂሻኒ ቢያሢና ዎላ'' ቢያ ባኣዚ'' ታ ማዔኔ።

23 ዬያ ታ ቢያ ማዼሢ' ኮዦ ሃይሶኮ ዓንጆ ዴንቃኒ ኮዦ ሃይሶ ዛሎ''ሮኬ። 24 ጳዦ ሄሌላሢዳ ቢያሢ ጳሽካዖ ዔያቶይዳፓ ፔቴ''ማ ሌሊ ቢሬሢ ዛሎ'' ዒንጎ ባኮ ዔካሢ ዒንሢ ዔሩዋዓዳ? ዬያሮ ዒንሢያ ባሺ ዔኮ ባኮ ዴንቃኒ ጳሽኩዋቴ። 25 ሄሌሎ ጳሽካ ዓሲ ጳዦኮ ቤርታ ሚርጌና ላቢ'' ጳሽኪ ጳሽኪ ዔራኔ፤ ዔያታ ዬያይዲ ላባ''ሢ፦ ባይቃ ባኣዚ''ና ዻካ'' ዎዴሮ ማዓ ቦንቾ ባኮ ዔካኒኬ፤ ኑኡኒ ጋዓንቴ ላቢ''ንታሢ' ባይቁዋያና ናንጊና ናንጋያ ማዔ፥ ቦንቾ ባኮ ዴንቃኒኬ። 26 ታኣኒ ጋዓንቴ ሄሎ''ንዶ ቤሲ ባኣንቴ ጉሪ ጳሽካ ዓሲጉዲቱዋሴ፤ ሃሣ ዢባሬ ዱላ'' ዓሶጉዲ ጉሪ ታ ላባ''ያቱዋሴ፤ 27 ዬያሮ ሜሌ'' ዓሶም ኬኤዛዖ ታኣሮ ታ ጉሪ ዓቱዋጉዲ ታ ዑፃ ፑርታ ባኣዚ'' ማዻንዳያይዳፓ ዎልቄና ቃዚ ቃዚ ታኣም ዓይሢንታጉዲ ታ ማሃኔ።