1 ዓያና ጌኤሺ፦ «ጋፒንፆ ዎዶ'' ባንሢ ማዓኣና ፔቴ'' ፔቴ'' ዓሳ ዻቢሻ ዓያናና ፑርታ ዓያናናይዳፓ ማዔ ዔራቶ ዔኪ ፆኦሲ ካኣዦ ሃሻ''ንዳኔ» ጌይ ፔጋሲ ኬኤዛኔ። 2 ዬያጉዴ ዔርዚፃ ኬስካሢ ዔያቶኮ ዒና'' ዖይዼ ዓንጊና ሚቺንቴ ዑሢጉዲ ዶጬያ ማዔ፥ ጎኔ ማሊሲ ሉኡቂ ኬኤዛ ዓሶይዳፓኬ። 3 ዬያጉዴ ዓሳ ዔፒ ላኣጋኔ፤ ሓሣ ፆኦሲ ጉሙርቃ ዓሶና ጎኑሞ ዔራ ዓሳ ፆኦሲ ጋላቲ ጋላቲ ሙዑዋጉዲ ፆኦሲ ማዤ ሙዖ «ሙዒፖቴ» ጌይ ጌይ ላኣጋኔ። 4 ጋዓንቴ ፆኦሲ ማዤ ባካ ቢያ ኮሺኬ፤ ፆኦሲ ጋላቲ ሙይንቴያ ማዔቴ ሃሺ''ንታ ባኣዚ'' ባኣሴ። 5 ዎይቲ ጌዔቴ ፆኦሲ ቃኣላ'' ጌዔ ጎይፆ ዒንሢኮ ሺኢጲፆና ሙይንታኒ ዳንዳዓያ ማዓንዳኔ።

6 ሓያ ባኮ ኪሪስቶሴ ጉሙርቃ ዓሶም ኔ ኬኤዚ ዔርዜቶ ፆኦሲ ጉሙርቂፆ ቃኣሎ''ና ኮዦ ዔርዚፆና ዋይዚ ዋይዚ ዲጬያ፥ ዬሱስ ኪሪስቶሴም ኮሺ ማዻያ ማዔሢ ዬያና ኔ ማርካሳንዳኔ። 7 ጋርቼ ላኣሎኮ ፓሡዋ ሓይሶና ሃያ ዓጮ''ኮ ጉሪ ማዔ ሃይሶይዳፓ ሃኪ፥ ዓያና ዛላ ባኣዚ'' ማዺ ማዺ ዔሬ። 8 ዑሢ ዶዲሻኒ ማዺንታ ማዾ ዻካ'' ዎዴሮ ማኣዳ''ኔ፤ ዓያና ዛላ ባኣዚ'' ማዺ ማዺ ዔሪሢ ጋዓንቴ ሓሢያ ማዖም ሃጊያ ማዓንዳ ናንጎም ዎዛ ዓኣያ ማዔሢሮ ቢያሢም ማኣዳ''ያኬ። 9 ዬይ ዓሲ ቢያ ዔራኒ ኮይሳ ጎኔ ሓይሴኬ። 10 ኑኡኒያ ሜታዺ ማዾና ላቢ''ንታሢ ዬያሮኬ፤ ዓይጎሮ ጌዔቴ ኑኡኒ ሃጊ ማዓንዳ ዎዞ'' ጌሣሢ ዓሶ ቢያ፤ ባሼና ሓሣ ፆኦሲ ጉሙርቃ ዓሶ ቢያ ዻቂሻያ፥ ባይቁዋ፥ ፆኦዛሢዳታሢሮኬ።

11 ሃንሢ ባኮ ዓሶ ዓይሤ፤ ሃሣ ዔርዜ። 12 ኔኤኒ ዼጌ ማዔሢሮ ዖኦኒያ ኔና ቦሆፓ፤ ኔኤኒ ጋዓንቴ ጌስታ ጌኤዞና፥ ናንጋ ናንጎና፥ ናሹሞና፥ ፆኦሲ ጉሙርቂፆና ሃሣ ኔ ናንጎ ዒኢሳ ባኣዚ''ፓ ጌኤሺ'' ካፒሢና ኪሪስቶሴ ጉሙርቃ ዓሶም ኮሺ ማላታ ማዔ። 13 ታኣኒ ኔ ኮራ ሙካንዳያ ሄላ''ንዳኣና ጌኤዦ ማፃኣፖ ዴሮ''ም ናባቢሢና፥ ኬኤዚሢና፥ ዔርዚሢና ዶዴ። 14 ፆኦሲ ማሊፃ ኔኤም ኬኤዚንቴ ዎዶ''ና ሓሣ ሺኢጲፆ ማኣሮ ዎይሣ ጪማ ኔ ዑፃ ኩጮ ጌሤ ዎዶ''ና ኔኤም ዒንጊንቴ ዓያኖ ዒንጊፆ ማዾይዳ ፔኤሺፆ ዋሊ''ፖ። 15 ኔኤኮ ዲጪፆ ዓሳ ቢያ ዴንቃንዳጉዲ ዬንሢ ባኮንሢ ዶዲ ማዼ፤ ሃሣ ዬንሢ ባኮ ዒናፓ ማዼ። 16 ኔ ዛሎ''፤ ሃሣ ኔ ዔርዛ ዔርዚፆ ዛሎ'' ኔና ዔሬ፤ ዬንሢ ባኮንሢ ዶዲ ማዼ፤ ዬያ ኔ ማዼቴ ኔናንታ ኔኤፓ ዋይዛ ዓሶንታ ኔ ዻቂሻንዳኔ።