1 ዒንሢ ኮይላ'' ዓኣዖ «ሴልቃያ»፤ ዒንሢ ኮይላ''ፓ ሃኪ ዴንዳዖ ጋዓንቴ «ጫርቃያ» ጌይንቴሢ፥ ታኣኒ ጳውሎሴ ኪሪስቶሴኮ ኮሹሞና ሼሌዑሞና ማዒ ታ ዒንሢ ሺኢቃኔ፤ 2 ታ ዒንሢ ሺኢቃሢ' ዒንሢ ኮራ ታ ሙኬ ዎዶ''ና ዬያይዲ ጫርቂ ጌስታንዳጉዲ ታና ማሂፖቴ ጌይኬ፤ ዓሲ ማሊሢና ኑ ሃንታያ ማሂ ኑና ፓይዳ፥ ፔቴ'' ፔቴ'' ዓሶ ቤርታ ጋዓንቴ ጫርቂ ጌስታኒ ታ ማላኔ። 3 ዎዚ ኑ ሃያ ዓጫ'' ናንጋያ ማዔቴያ ኑ ዖልታሢ ሃያ ዓጮ'' ዓሳ ዖልታ ጎይፆቱዋሴ። 4 ኑኡኮ ዖሎ ዓንጋማ፡ ዖሎሮ ኬልቂ ዴዖና ኬኤሎ'' ዶይሳኒ ዳንዳዓ፥ ፆኦሲ ዎልቄ ዓኣ፥ ዓንጋሞ ማዓንዳኣፓዓቴም ሃያ ዓጮ'' ዖሎ ዓንጋሞጉዲቱዋሴ። 5 ዓሲ ፆኦሲ ዔሩዋጉዲ ሉኡዙሞና ማርሞ ማርማሢንታ ዖቶርሞ ማሊፆዋ ጉቤ ኑ ባይዛንዳኔ፤ ዓሲኮ ማሊፆ ጉቤ ኑ ዲዒ ዲዒ ኪሪስቶሴም ዓይሢንታንዳጉዲ ማሃኔ። 6 ዒንሢኮ ዓይሢንቲፃ ጎኔ ማዔሢ ኑ ዔሬሢኮ ጊንፃ ዓይሢንቲ ዒፃ ባኣዚ'' ዓይጎዋ ጉቤ ኑ ፑርታና ዎጋኒ ጊኢጌኔ።

7 ዒንሢ ዛጋሢ ፔጌና ጴዻ ባኣዚ'' ሌሊኬ፤ ዓይጎ ዓሲያ ታኣኒ ሌሊ ኪሪስቶሴሮኬ ጌዒ ጉሙርቃቶ ፔና ጊንሣ ሺርሺ ዛጎንጎ፤ ኑኡኒያ ዒዛጉዲ ኪሪስቶሴሮ ማዔሢ ዔሮንጎ። 8 ጎዳ ኑም ዒንጌ ቢታንቶና ሚርጌና ታ ሄርሺንቴቴያ ታና ቦርሱዋሴ፤ ዎይቲ ጌዔቴ ዬይ ቢታንታ ኑም ዒንጊንቴሢ ዒንሢኮ ጉሙርቂፆ ዶዲሻኒ ማዓንዳኣፓዓቴም ባይዛኒቱዋኣሢሮኬ። 9 ታኣኮ ኪኢታ'' ታ ዒንሢ ዒዒጊቻኒ ኬኤዛያ ማሎፓ። 10 ፔቴ'' ፔቴ'' ዓሳ «ጳውሎሴኮ ኪኢታ'' ዴኤፃያ ሃሣ ዶዲኬ፤ ጋዓንቴ ዒዛ ኑ ዛጋኣና ዑፃ ላኣፓ፥ ጌኤዛኣ ዒዛኮ ፓሡዋያኬ» ጋዓያ ናንዳኔ። 11 ዬኖ ጋዓ ዓሳ ዒንሢዳፓ ሃኬ ዓኣዖ ኑ ፃኣፓ ኪኢቶ''ና ዒንሢ ኮይላ'' ዓኣዖ ኑ ማዻ ማዾ''ናኮ ባኣካ'' ዱሙሞ ባኣያታሢ ዔሮንጎ።

12 ኑኡኒ ጋዓንቴ ፔ ቶኦኮ'' ጋላታ ዓሶና ኑና ዎላ'' ፔቴ'' ማሃኒ፥ ሃሣ ጊንሣ ቤኤዚ ዛጋኒ ፔቴ''ታዖ ኑ ማሊሢዳ ባኣሴ፤ ዔያታ ፔና ፔኤና ቤኤዚ ዛጋሢሮ ዔያቶኮ ዒና ባኣያኬ። 13 ኑኡኒ ጋዓንቴ ፔቶ'' ዑሣ ዓኣዼ ሄርሺንቱዋሴ፤ ኑኡኒ ሄርሺንታሢ' ፆኦሲ ኑና ማዾንጎ ጌዔማ ጎይፆ ዴንዲ ዒንሢ ሄላ''ንዳኣና ማዼ ማዾ''ናኬ። 14 ዒንሢ ሃሢ ዓኣሢ ኑ ማዻንዳጉዲ ጌይንቴ ቤዞይዳ ማዔሢሮ ኪሪስቶሴኮ ኮዦ ሃይሶ ኬኤዛኒ ኑ ዔኪ ዒንሢ ኮይላ'' ሙኬ ዎዶ''ና ያፓ ኑ ዑሣ ዓኣዺባኣሴ። 15 ዬያሮ ፆኦሲ ኑም ጌዔ ቤዛፓ ኑ ዓኣዺ ሜሌ'' ዓሲ ማዼ ማዾና ኮይሱዋ ጎይሢ ዑሣ ዓኣዼ ኑ ሄርሺንታዓ፤ ጋዓንቴ ዒንሢኮ ጉሙርቂፃ ዶዳንዳጉዲና ኑኡኮዋ ማዻ'' ፆኦሲ ኑም ዒንጌ ቤዞ፥ ዒንሢ ባኣካ'' ባሼና ዳልጋንዳኔ ጌዒ ሃጊ ማዓንዳ ዎዛ ኑ ጌሣኔ። 16 ዓካሪ ሜሌ'' ዓሳ ማዼ ቤዞይዳ ጌሊ፥ ቤርታ ማዺንቴ ማዾ''ና ሄርሺንቱዋዖ ዒንሢኮ ዙላ'' ዓኣ ዓጮ''ም ኮዦ ሃይሶ ኑ ኬኤዛኒ ዳንዳዓኔ።

17 ጋዓንቴ «ሄርሺንታሢ ጎዳና ሄርሺንቶንጎ።» ✝10፥17 ዔር. 9፥24። 18 ዓይጎሮ ጌዔቴ ዓሲ ጋላቲንቴያ ማዓኒ ዳንዳዓሢ ፆኦሲ ዒዛ ጋላቴቴ ማዓንዳኣፓዓቴም ፔና ፔኤሮ ዒ ጋላቴቴቱዋኣሢሮኬ።