1 ኑ ኑና ጊንሣ ሄሄርሻኔ ጌይሢዳ? ሃሣ ፔቴ'' ፔቴ'' ዓሳ ማዻሢጉዲ ዒንሢምታቴያ ዒንሢዳፓ ፒዜ ማዻያ ማዒፆ ዔርዛ ዋርቃታ ኑም ኮይሳኔ ጌይሢዳ? 2 ዓሲ ቢያ ዒንሢ ዛጋያና ናባባያ፥ ኑ ፒዜ ማዻያ ማዒፆ ዔርዛ፥ ኑ ዒና'' ፃኣፒንቲ ዓኣሢ ዒንሢኬ። 3 ዒንሢ፡ ኑ ማዼ ማዻ''ፓ ጴዼያ፥ ኪሪስቶሴኮ ፃኣፒንቴ ኪኢታ ማዔሢ ዔርቴያኬ፤ ዬይ ኪኢታ'' ፃኣፒንቴሢ ናንጊና ናንጋ ፆኦሲ ዓያኖና ማዓንዳኣፓዓቴም ዓሲ ፃኣፓ ባኣዚ''ናቱዋሴ፤ ሃሣ ዬይ ዓሲ ዒናይዳ ፃኣፒንቴያኬ፤ ዓርሲንቴ ሹቺዳ ፃኣፖናያቱዋሴ። ✝3፥3 ኬሲ. ማፃ 24፥12፤ ዔር. 31፥33፤ ሂዚ. 11፥19፤ 36፥26።

4 ዬያ ኑ ጋዓሢ ኪሪስቶሴ ዛሎ''ና ፆኦሲ ጉሙርቂኬ። 5 ኑ ማዻ ማዾ'' ማዻንዳጉዲ ዎልቄ ኑም ዒንጋሢ ፆኦሲ ማዓንዳኣፓዓቴም ኑኡኒ ኑ ቶኦኪና ዓይጎዋ ማዻኒ ዎልቄ ኑኡኮ ባኣሴ። 6 ዓኮ ጫኣቁሞ ዎዶ'' ማዾ'' ኑ ማዻንዳጉዲ ማሄሢ ፆኦሲኬ፤ ዬይ ፃኣፒንቴ ዎጎናቱዋንቴ ዓያኖ ጌኤዦ ዛሎ''ና ማዔያኬ፤ ፃኣፒንቴ ዎጋ'' ዎዎዻኔ፤ ዓያኖ ጌኤዣ ጋዓንቴ ሼምፖ ዒንጋኔ። ✝3፥6 ዔር. 31፥31።

7 ፃኣፒንቴ ዎጎ ቆኦቂ ኮሾ''ናሢ ዓርሲንቴ ሹጮይዳኬ፤ ዎጋ ዒንጊንቴ ዎዶ''ና ፆኦሲ ቦንቻ ፔጋዺ ጴዼኔ፤ ሙሴኮ ዓኣፖ ካሮ''ይዳ ፖዔ ፖዓ ባይቂ ባይቂ ዓኣዻያ ማዔቴያ ዒስራዔኤሌ ዓሳ ሙሴኮ ዓኣፖ ካሮ'' ኮሺ'' ዛጋኒ ዳንዳዒባኣሴ፤ ዓካሪ ዎዻ ዎጋ'' ዬያጉዴ ቦንቾና ጴዼያ ማዔቴ፥ ✝3፥7 ኬሲ. ማፃ 34፥29። 8 ዓያኖ ጌኤዦ ዛሎ''ና ማዺንታ ማዻ'' ዎዚ ባሼ ቦንቾ ዓኣያ ማዓንዳይ! 9 ዓሶ «ዻቤኔ» ጌዒ ዎጋ ማዻ'' ዬያይዲ ቦንቺንታያ ማዔቴ ዓሶ ዻቂሻ ማዻ'' ዎዚ ባሼ ቦንቾ ዓኣያ ማዓንዳይ! 10 ቤርታ ቦንቺንቴያ ማዔ ማዻ'' ሃሢ ባሼ ቦንቺንቴ ማዾ''ና ዎላ'' ቤኤዚ ዛጎዛ ቦንቾ ባኣ ባኣዚ'' ማዒ ጴዻኔ። 11 ዬይ ባይቃያ ማዔ ባካ ዬያጉዴ ቦንቾና ዓኣያ ማዔቴ ናንጊና ባይቁዋዖ ናንጋ ባኮኮ ባሼ ቦንቾ ዓኣኔ ጌይሢኬ።

12 ዬያጉዴ ሃጊ ማዓንዳ ዎዛ ኑኡኮ ዓኣሢሮ ዑሣ ዓኣዼ ጫርቂ ኑ ኬኤዛኔ። 13 ሙሴኮ ዓኣፖ ካራ'' ፖዓሢ ሓሻኣና ዒስራዔኤሌ ዓሳ ዒዛኮ ዓኣፖ ካሮ'' ዴንቁዋጉዲ ዓኣፖ ካሮ'' ዒ ካንቃኔ፤ ኑኡኒ ጋዓንቴ ዒዛ ጉዲቱዋሴ። ✝3፥13 ኬሲ. ማፃ 34፥33። 14 ዒስራዔኤሌ ዓሶኮ ዒና'' ዔኩዋያ ማዒ ጎኔና ዶጪ ዓኣኔ፤ ሃኖ'' ሄላ''ንዳኣና ሚናኣ ጫኣቃሢ ማፃኣፖ ዔያታ ናባባኣና ዒና'' ዔያቶኮ ዬኖ ካንቆ ዓፒሌሎና ካንቂንታያኬ፤ ጋዓንቴ ዬና'' ካንቃ ባኬላ ባይቃንዳሢ ኪሪስቶሴ ዛሎ''ና ሌሊኬ። 15 ሃኖ'' ሄላ''ንዳኣና ሙሴ ዔርዜ ዎጎ ማፃኣፖ ዔያታ ናባባኣና ዒና'' ዔያቶኮ ዬኖ ባኬሎና ካንቂንታኔ። 16 ጋዓንቴ ዬና ባኬላ ሺኢካኒ ዳንዳዓኔ፤ ጌኤዦ ማፃኣፖይዳ፦ «ሙሴ ጎዳ ባንሢ ማዓዛ ካንቃ ባኬላ ሺኢኬኔ» ጋዓኔ። ✝3፥16 ኬሲ. ማፃ 34፥34። 17 ዬያሮ ጎዳ ጌይንቴሢ ዓያኖኬ፤ ጎዳኮ ዓያና'' ዓኣ ቤስካ ዓይሉሞ ባኣሴ። 18 ዬያሮ ኑ ቢያሢ ጎዳኮ ቦንቾ ካንቂንቲባኣ ዓኣፒ ካራና ፖዒ፥ ፔጋሲ ዻዋኔ፤ ዓያና ማዔ ጎዳይዳፓ ጴዻ ሃይ ቦንቻ ቦንቾይዳ ቦንቾ ኑም ቃሲ'' ቃሲ'' ዓዳ'' ጎዳ ኑ ማላንዳጉዲ ማሃኔ።