1 ዓካሪ ታ ዒጊኖንሢዮቴ! ሓይ ቢያ ሃጊ ማዓንዳ ዎዛ'' ዒንጊንቴሢ፡ ኑም ማዔሢሮ ዓሲኮ ዑሢና ዓሲኮ ጋሮ ዓያኖና ዒኢሳ፥ ዓይጎ ባኣዚ''ዳፓኣ ኑ ቶኦኮ'' ኑ ጌኤሾም፤ ፆኦሲ ዒጊጪሢና ዒዛም ኑኡኮ ዱማዺፆ ዔርቴያ ኑ ማሆም።

2 ዒኖ'' ዒንሢኮ ኑም ዻዊ ሃሹ''ዋቴ፤ ዖኦማኣ ኑ ፑርታ ማዺባኣሴ፥ ዖናኣ ኑ ዻቢሲባኣሴ፤ ሃሣ ዖናኣ ኑ ጌሺ ዎልቆ ሙይባኣሴ። 3 ዬያ ታ ጋዓሢ፦ «ዒንሢ ዻቤኔ» ጋዓኒ ጌይቱዋሴ፤ ዓይጎሮ ጌዔቴ ሃያኮ ቤርታ ኑ ዒንሢም ጌዔሢጉዲ ዒንሢ ኑ ዒና''ፓ ባይቂባኣሴ፤ ዬያሮ ኑ ናንጌቴያ ሓይቄቴያ ቢያ ዎዴ ዒንሢና ዎላ''ኬ። 4 ዒንሢ ታ ኮሺ'' ጉሙርቃኔ፤ ሃሣ ዒንሢና ታ ኮሺ'' ሄርሺንታኔ፤ ኑ ሜታዻኣና ቢያ ዼኤፒ ዶዱሞ ታ ዴንቃኔ፤ ታ ዎዛዻ ዎዞኮዋ ጋፒንሢ ባኣያኬ።

5 ሜቄዶኒያ ኑ ሄሌ''ያናታዖ ሚርጌ ዛላና ሜታ ኑና ሄሌ''ያፓዓቴም ሃውሺሢ ኑኡኮ ባኣያ ማዔኔ፤ ዙላ''፥ ሜሌ'' ዓሳፓ ሙካ ባኮና ሃሣ ኑ ዒና'' ኑና ዒጊቻ ባኮና ኑ ሚርጌ ሜታዼኔ። ✝ 6 ጋዓንቴ ዖያ ዓሶ ዶዲሻ፥ ፆኦዛሢ ቲቶ ኑ ኮራ ዳኪፆና ኑና ዶዲሼኔ። 7 ኑ ዶዴሢ' ዒዛኮ ኑ ኮራ ሙኪፆና ሌሊ ማዒባኣንቴ ዒንሢ ዒዛ ዶዲሼያ ማዔሢያ ኑ ዋይዜሢሮኬ። ሃሣ ዒንሢ ታና ጶቂሣሢያ፥ ታ ዛሎ''ሮ ዒንሢ ዖያያ፤ ጊንሣ ሃሣ ታና ሚጪንቲ ዒንሢ ማላ ማሊፆ ኑም ዒ ኬኤዛዛ ሚርጌና ታ ዎዛዼኔ።

8 ሃያኮ ቤርታ ታ ዒንሢም ፃኣፔ ኪኢታ'' ዒንሢ ዖይሴያ ማዔቴያ ዬያ ፃኣፒፆና «ዻቤኔ» ታና ታ ጎዑዋሴ፤ ታ ታና «ዻቤኔ» ጌዔቴያ ዬይ ታ ፃኣፔ ኪኢታ'' ዻካ'' ዎዴሮ ሌሊ ዒንሢ ዖዪሴሢ ታ ዔሬኔ። 9 ሃሢ ታ ሚርጌና ዎዛዻኔ፤ ታ ዎዛዻሢያ ዒንሢ ዖዪሴሢሮቱዋንቴ ዒንሢኮ ዖዪፃ ዒንሢኮ ዻቢንቶ ዒንሢም ዔርዜም፥ ዒንሢ ዬያፓ ማዔያታሢሮኬ፤ ዓካሪ ዒንሢኮ ዖዪፃ ፆኦሲ ማሊሢጉዲ ማዔሢሮ ዓይጎዋ ኑ ዒንሢም ፑርቲሲባኣሴ ጌይሢኬ። 10 ፆኦሲ ማሊሢጉዴያ ማዔ ዖዪሢ፦ ዻቂንታ ባንሢ ዔኪ ሙካ፥ ጎሜ ቡኡፂም ጊኢጊሻሢሮ «ዓይጋ ዬይ ማዔይ» ጌይሳያቱዋሴ። ሃያ ዓጮ'' ዛሎ''ና ሙካ ዖዪሢ ጋዓንቴ ሓይቢ ዔኪ ሙካኔ። 11 ዬይ ፆኦሲ ማሊፆ ጉዴያ ማዔ ዖዪፃ፡ ዶዲ ዒንሢ ማላንዳጉዲና ዻቢንቲባኣያ፥ ጌኤሺ ዒንሢ ማዔሢ ዔርዛንዳጉዲ ዒንሢ ማሄኔ፤ ዬያጉዲ ሃሣ ጎሜ ማዔ ባኣዚ'' ዒንሢ ዒፃያ ማዓንዳጉዲ፥ ታ ዞሮ'' ዒንሢ ዒጊጪ ዔካንዳጉዲ፥ ታና ዒንሢ ጶቂሣንዳጉዲ፥ ዓያና ዓኣ ማሊሢና ፒዜ ዒንሢ ዎጋንዳጉዲና ዻቢንቴሢያ ዒንሢ ጎራ''ንዳጉዲ ዒንሢ ማሄኔ። ዬያ ባኮ ቢያና ዒንሢ ጌኤሺ ማዔሢ ዒንሢ ዔርዜኔ።

12 ዓካሪ ታ ዒንሢም ፃኣፔሢ፦ ኑ ዛሎ'' ዒንሢ ማላ ማሊፃ ፆኦሲ ቤርቶይዳ ጌኤሺ ማዒ ዒንሢም ጴዻንዳጉዲ ማዓንዳኣፓዓቴም ዻቢንቴ ዓሲና ፑርታ ባኣዚ'' ማዺንቴ ዓሲና ዛላቱዋሴ። 13 ኑ ዶዴሢያ ዬያ ዛሎ''ናኬ።

ሃሣ ኑኡኮ ዶዱማፓ ባሼ ቲቶ ዎዛዼሢሮ ሚርጌና ኑዋ ዎዛዼኔ፤ ዓይጎሮ ጌዔቴ ዒንሢ ቢያሢ ቲቶ ዶዲሺፆና ዒዛኮ ዒኖ'' ሃውሺሴሢሮኬ። 14 ዒንሢና ታ ሄርሺንታ ሄርሺንቶ ቲቶም ታ ኬኤዜኔ፤ ዒንሢ ታና ዬያና ቦርሲሲባኣሴ። ቢያ ዎዴ ኑ ዒንሢም ኬኤዛ ባካ ጎኔ ባኣዚ'' ማዔሢጉዲ፥ ዒንሢ ዛሎ'' ሄርሺንቲ ቲቶም ኑ ኬኤዜ ባካ ጎኔ ማዔሢ ዔርቴኔ። 15 ቢያሢ ዒንሢ ዓይሢንታያታሢና ዒጊቹሞና ጎጋይቂ ዒንሢ ዒዛ ሾኦቺንሢ ዔኬሢ ዒዚ ጶቂሣኣና ዒንሢ ዒ ዑሣ ዓኣዼ ናሽካንዳጉዲ ማሄኔ። 16 ታኣኒያ ጉቤ ባኣዚ''ና ዒንሢ ጉሙርቃኒ ዳንዳዒፆና ሚርጌ ዎዛዼኔ።