1 ጉሙርቂሢ ጌይሢ ሃጊ ማዓንዳ ዎዛ ጌሢ ኑ ካፓ ባኮ ኑ ዴንቃንዳያታሢ ዔሪሢ፤ ሃሣ ኑ ዛጊባኣ ባኮ ዓኣያ ማሂ ዛጊሢኬ። 2 ቤርታኣ ዓሶም ማርካዺንቴሢ' ዔያታ ጉሙርቄሢሮኬ።

3 ሳዖንታ ጫሪንጮንታ ጊዳ'' ዓኣ ባካ ቢያ ፆኦሲ «ማዖንጎ» ጌዔሢና ማዢንቴያ ማዔሢ ኑ ዔራሢ ጉሙርቂሢናኬ፤ ዬያሮ ኑም ሃሢ ጴዻ ባካ ቢያ ጴዹዋ ባኣዚ''ዳፓ ማዢንቴሢ ዬያና ኑ ዔራኔ። ✝

4 ዓኣቤኤሌ፡ ቃኣዔኤሌ ፆኦሲም ዒንጌ ዒንጊፆይዳፓ ባሻያ ፆኦሲም ዒንጌሢ ጉሙርቂሢናኬ፤ ፆኦሲ ዓኣቤኤሌ ዒንጌ ዒንጊፆ ዎዛና ዔኬ ዎዶ''ና ዓኣቤኤሌ ጉሙርቂፆና ፂሎ'' ማዔሢ ማርካዺንቴኔ፤ ዓኣቤኤሌ ሓይቄያ ማዔቴያ ሃኖ'' ሄላ''ንዳኣና ዒዛኮ ጉሙርቂፆ ዛሎ''ና ዒ ኬኤዚ ኬኤዚ ዓኣኔ። ✝

5 ሄኖኬ ሃይቢ ሃይቁዋጉዲ ሌካ ጫሪንጮ ዔውቴሢ ዒ ጉሙርቄሢሮኬ፤ ፆኦሲ ዒዛ ዔኬሢሮ ዒ ጴዺባኣሴ፤ ዒ ዔውታንዳሢኮ ቤርታ ፆኦሲ ዒ ዎዛሴያ ማዔሢ ማርካዺንቴኔ። ✝ 6 ጉሙርቂሢ ባኣንቴ ፆኦሲ ዎዛሳኒ ዳንዳዒንቱዋሴ፤ ዓይጎሮ ጌዔቴ ፆኦሲ ባንሢ ሙካሢ ፆኦሲ ዓኣያ ማዔሢና ዒዛ ዒናፓ ኮዓዞንሢም ዒ ዒንጋንዳ ባኣዚ'' ዓኣሢ ጉሙርቃንዳያ ኮይሳሢሮኬ።

7 ሃጊ ጴዺባኣ ባኮሮ ፆኦሲ ላቲ'' ዒዛም ኬኤዜ ዎዶ''ና ኖሄ ፆኦሲ ዒጊጪሢና ማኣሮ ዓሶ ዻቂሻኒ ዋኣፆ ካኣሚሎ ኮሼ''ሢ ጉሙርቂሢናኬ፤ ዬያ ጉሙርቂፆና ዓጮ'' ዓሶ ቢያ ዻቢንቴያ ማሂ ዒዚ ሃሼ''ኔ፤ ጉሙርቂፆና ጴዻ ፂሉ''ሞዋ ዒ ዴንቄኔ። ✝

8 ዓብራሃሜ ፔ ዓጪ ማሂ ዔካንዳ ቤዞ ዓኣዻንዳጉዲ ፆኦሲ ዒዛ ዔኤሌ'' ዎዶ''ና ዓንኮ ዓኣዻቴያ ዔሪባኣያታዖ «ዔኤዔ» ጌዒ ዓይሢንቲ ዓኣዼሢ ጉሙርቂሢናኬ። ✝ 9 ሓሣ ዒዛጉዲ ሃጊ ማዓንዳ ዎዞ'' ዴንቃንዳ፥ ዪሳኣቄና ያይቆኦቤና ዎላ'' ሃጋኣ ዎዛ ማሂ ዒንጎና ዓጬ''ሎይዳ ሙኬ ዓሲ ማዒ፥ ዓፒላና ማዢንቴ ማኣሮይዳ ዒ ናንጌሢ ጉሙርቂሢናኬ። ✝ 10 ዓይጎሮ ጌዔቴ ዶዲ ቦኦኮሎና ማዢንቴ፥ ፆኦሲ ማዣኒ ዓርቂ ማዤ ካታሞ ዒ ካፓያታሢሮኬ።

11 ዓብራሃሜ ዎዚ ጋርቼያ ማዔቴያ ሃሣ ሳኣራ ዞኦኮ ማዔቴያ ሃጊ ማዓንዳ ዎዞ'' ዒንጌሢ ጉሙርቂንታያ ማሂ ዒ ዛጌሢሮ ጉሙርቂሢና ናይ ዓዶ ማዔኔ። ✝ 12 ዬያሮ ዬያ ሃይቄያጉዲ ማዔ፥ ዓብራሃሜይዳፓ ጫሪንጮ ዦኦጋሢጉዲ ሚርጌያ ሃሣ ባዞ'' ዓጫ ዓኣ ፓይዲንቱዋ ማኣሻሎጉዴ ዺቢ ዜርሢ ዒዛይዳፓ ኬስኬኔ። ✝

13 ዬያታ ቢያ ሓይቄሢ ጉሙርቃ ጎይሣ ዓኣዖኬ፤ ፆኦሲ ዔያቶም ዒንጋኒ ጫኣቄ ጫኣቁሞ ባኮዋ ዔያታ ዴንቂባኣሴ፤ ጋዓንቴ ሃኬና ዛጊ፥ ዓዳ'' ዴንቄያ ማሂ ዔያታ ዎዛዼኔ፤ ሳዖይዳኣ ሾኦቺ ሃሣ ሙኬ ዓሲ ማዔያታሢያ ዔያታ ዔሪ ማርካዼኔ። ✝ 14 ያዺ ጌዒ ማላ ዓሳ ዔያቶም ማዓ ዓጪ ዓኣያ ማዔም ዔያታ ካፓያታሢ ዔርታኔ። 15 ዬኖ፥ ዔያታ ዎንዴ ሃሺ'' ኬስኬ ዓጬሎ ሄኤዶ ጶቂሢ ማላያታቴ ዒዞ ባንሢ ማዒ ዴንዳንዳያታዖኬ። 16 ሃሢ ጋዓንቴ ባሼ ማዔያ፤ ሃሣ ጫሪንጮይዳ ዓኣ ዓጮ'' ዔያታ ጶቂሢ ማላኔ፤ ዬያፓ ዔቄያና ፆኦሲ ዔያቶም ካታማ ጊኢጊሼሢሮ «ኑ ፆኦዛሢ» ጌዒ ዔያታ ዔኤሌ''ቴ ዒዛ ቦርሳያቱዋሴ።

17 ዓብራሃሜ፡ ዎይታቴያ ዛጋኒ ፆኦሲ ማዼ ዎዶ''ና ዒዚ ዪሳኣቄ ፆኦሲም ዒንጎ ባኣዚ'' ማሂ ዒንጌሢ ጉሙርቂሢናኬ፤ ሃጊ ማዓንዳ ዎዞ'' ዴንቄ፥ ዓብራሃሜ ፔኤኮ ፔቴ'' ናዓሢ ጎኔ ሹካኒ ዒማ''ና ጊኢጌኔ። ✝ 18 ዬይ ናዓሢ «ኔ ዜርፃ ዪሳኣቄ ሱ’ንፆና ዔኤሊ''ንታንዳኔ» ፆኦሲ ዒዛም ጌዔሢኬ። ✝ 19 ፆኦሲ ሃይቄ ዓሶ ሃይቢዳፓ ዔቂሳኒ ዳንዳዓሢ ዓብራሃሜ ጉሙርቄሢሮ ዒማ''ና ዪሳኣቄ ሃይቢዳፓ ዔቄያ ማሂ ዒ ዛጌኔ።

20 ዪሳኣቄ ሃጊ ማዓንዳ ባኮ ማሊ ያይቆኦቤና ዔኤሳዎና ዓንጄሢ ጉሙርቂሢናኬ። ✝

21 ያይቆኦቤ ሓይቃኒ ዑካዖ ዮሴፔ ናኣቶ''፥ ፔቴ'' ፔቴ''ሢ ዓንጄሢ ሃሣ ዒ ኮኦላ''ዺ ሃንታ ኮኦሎ''ና ዔቂ ፆኦሲም ዚጌሢያ ጉሙርቂሢናኬ። ✝

22 ዮሴፔ ሃሣ ሓይቃኒ ዑካዖ ዒስራዔኤሌ ዓሶም ዔያታ ጊብፄ ዓጮ''ይዳፓ ኬስካንዳያ ማዒፆ ኬኤዜሢ ሃሣ ዒዛኮ ሜጌፆ ዔያታ ዎዳ''ንዳቴያ ዓይሤሢ ጉሙርቂሢናኬ። ✝

23 ሙሴ ሾዔ ዓሳ፡ ዒ ሾይንቴ ዎዶ''ና ሚዛጲ ናይ ማዔሢ ዛጋዖ፥ ካኣቲ ዓይሤ ዓይሢፆ ዒጊጩዋዖ ሃይሦ ዓጊኒ ዒዛ ዓኣቼሢ ጉሙርቂሢናኬ። ✝

24 ሙሴ ዒማ''ና ዲጬሢኮ ጊንፃ፦ «ጊብፄ ዓጮ'' ካኣቲኮ ናዎ ናኣዚ''» ጌይንቲ ዔኤሊ''ንቲፆ ዒፄሢ ጉሙርቂሢናኬ። ✝ 25 ዒዚ ዻካ'' ዎዴሮ ጎሜ ማዺ ማዺ ዴንቆ ዎዞ''ይዳፓ ባሼ ፆኦሲ ዴሮ''ና ዎላ'' ሜቶ ዔካኒ ኮዔኔ። 26 ሓጊ ዒዛም ዒንጊንታንዳ ባኮ ዒ ዔሬሢሮ ጊብፄ ዓጮ'' ቆሎ''ይዳፓ ባሼ ሜሲሔ ዛሎ''ሮ ቦሂንቲፃ ባሼ ቆሎ ማዔሢ ዒ ዛጌኔ።

27 ዒዚ ሃሣ ካኣቲኮ ጎሪ''ንቶ ዒጊጩዋዖ ጊብፄ ዓጮ''ይዳፓ ኬስኬሢ ጉሙርቂሢናኬ፤ ጴዹዋ ፆኦዛሢ ዴንቄያ ማሂ፥ ዒ ፔ ማሊፆና ዶዴኔ። ✝ 28 ቶይዶ ናኣቶ'' ዎዻንዳጉዲ ዒማ''ና ዓይሢንቴ ኪኢታንቻሢ ዒስራዔኤሌ ዓሶኮ ቶይዶ ናኣቶ'' ዎዹዋጉዲ ዑሣ ዓኣዺፆ ዎጎና ካሮ'' ዑፃ ሱጉፆ ፑጪፆ ዎጎዋ ዒ ኩንሤሢ ጉሙርቂሢናኬ። ✝

29 ዒስራዔኤሌ ናኣታ'' ፃኣዺ ሳዓይዳ ሃንቶጉዲ ሃንቲ ዞቄ ባዞ''ና ፒንቄሢ ጉሙርቂሢናኬ፤ ጊብፄ ዓሳ ጋዓንቴ ዔያቶጉዲ ፒንቃኒ ማሌ ዎዶ''ና ቢያሢ ዋኣፆና ሙይንቴኔ። ✝

30 ዒስራዔኤሌ ዓሳ ዒያርኮ ካታሞኮ ሹጮና ኬልቂ ዲርቆና ዲሮ ዙሎ'' ላንካይ ኬሊ'' ሺሬሢኮ ጊንፃ ዬያ ዲሮ ዔያታ ዶይሴሢ ጉሙርቂሢናኬ። ✝ 31 ዞኦዛ ኮኦማ፥ ሬዓባ ጎዖዛ፡ ዒስራዔኤሌይዳፓ ሙሮ'' ሙኬ ዓሶ ሾኦቺንሢ ዔኪፆና ፆኦሲም ዓይሢንቱዋ ዓሶና ዎላ'' ሓይቁዋዖ ዓቴ''ሢ ጉሙርቂሢናኬ። ✝

32 ዓካሪ ዬካፓ ዑሣ ታ ዎዚ ጎዖንዶይ! ጌዲዮኔ፥ ባርቄ፥ ሶምሶሜ፥ ዮፕታኣሄ፥ ዳውቴ፥ ሳሙዔኤሌንታ ፆኦሲ ማሊፆ ኬኤዛ ዓሶንታ ዛሎ'' ታ ኬኤዚ ጋፒሳኒ ዳንዳዑዋሴ። ✝ 33 ዔያታ ጉሙርቂሢና ካኣቶ'' ዖልዚና ባሼኔ፥ ፒዜ ዎጊሢና ዓሶ ዎይሤኔ፥ ፆኦሲ ዔያቶም ዒንጌ ሃጊ ማዓንዳ ዎዞ'' ባኮዋ ዴንቄኔ፥ ዞቦኮዋ ዻንጎ ዓይሤኔ፤ ✝ 34 ታሚ ዎልቄያ ባሼኔ፥ ጬንቾ ዓፓሮና ሓይቂፆይዳፓ ቶሌ''ኔ፥ ላቢ''ፃፓ ዶዴኔ፥ ዖልዚና ዔርቴያ ማዔኔ፥ ዔያቶ ዖላኒ ሙኬ ሞርኮኮ ፖኦሊሶ ዳውሴኔ፤ ✝ 35 ላኣላ ፔኤኮ ሓይቄ ዒጊኖ ሓይባፓ ዔቄም ዴንቄኔ። ሜሌ'' ዓሳ ሃይቢፓ ዔቂ ባሼ ናንጊ ዴንቃንዳኔ ጌዒ ዱማ ዱማ ሜቶ ዔኬኔ፤ ዬያይዳፓ ቶሊ'' ሜታ ባኣያ ናንጋኒያ ኮይባኣሴ። ✝ 36 ፔቴ'' ፔቴ'' ዓሳ ዓሲኮ ዓማሊ'' ማዒ ዢራፓና ጳርቂንቴኔ፤ ሃንጎዋታ ሃሣ ዓንጊ ዱፄና ቱኡቲ ቱኡሲ ማኣሪ ጌሌኔ፤ ✝ 37 ሹቺናኣ ዹይንቴኔ፥ ማጋዜ ጌይንታ ዓንጎና ሄኮ ጳሊ''ንቴኔ፥ ጬንቾ ዓፓሮናኣ ጫርጊንቲ ሃይቄኔ፥ ማራይና ዋኣሪናኮ ዒልዒ ማይንቲ ሜታዺ ሃንቴኔ፥ ማንቆ ሃሣ ቤሲባኣ ዓሲያ ማዒ ሃንቴኔ፤ ✝ 38 ዓሲ ናንጉዋ ዳውሎ''ይዳ፥ ዹኮ''ይዳ ሃሣ ዴኔ ዔቴንታ ዛሬንታይዳ ዎርቂ ዎርቂ ሃንቴኔ፤ ዬያሮ ዓጫ'' ዔያቶም ኮይሳ ቤሲ ማዒ ጴዺባኣሴ።

39 ዬያታ ቢያ ፔ ጉሙርቂፆና ማርካዺንቴያታቴያ ዔያቶም ዒንጊንቴ ሃጊ ማዔ ዎዞ'' ጋዓንቴ ዔያቶይዳ ዴንቄይ ባኣሴ። 40 ፆኦሲ ኑም ዑሣ ዓኣዼ ኮሺ ማዔ ባኣዚ'' ጊኢጊሼሢሮ ዔያታ ኑኡና ዎላ'' ማዓንዳኣፓዓቴም ዔያቶና ሌሊ ፆኦሲ ማሊፃ ኩማያቱዋሴ።