1 ዬያጉዴ ሻኣሬ ማዔ፥ ሚርጌ ማርካ ኑኡኮ ዓኣሢሮ ኑኡኒያ ኬዲ ኑም ማዔ ባኮ ቢያ፤ ሃሣ ኑና ቱኪ'' ዓርቄ ጎሞይዳፓ ዱማዺ ኑኡኮ ቤርታ ዓኣ ጳዦ ጊቢ'' ዳንዳዒሢና ዶዲ ኑ ጳሽኮም። 2 ኑ ጳሽካንዳሢያ፦ ኑኡኮ ጉሙርቂፆኮ ካራ ማዔሢና ኩንሣያ ማዔ፥ ዬሱሴ ዛጊኬ፤ ሃጊ ዒ ዴንቃንዳ ዎዞ''ሮ ፑርቶ ዓሶ ሱፆ ሚፆይዳ ዓኣ ዻውሲንቶ ሃይቦ'' ዔኤቢ ማሂ ዛጉዋዖ ሃሣ ዒኢካ ዒ ሃይቄ ሃይቦ''ና ሜታሢና ጉቤ ዳንዳዒ ፆኦሲኮ ካኣቱሞ ዖይቶ ኬስኪ፥ ዒዛኮ ሚዛቆ ዛላ'' ቦንቾና ዴዔኔ።

3 ዓካሪ ዒንሢ ቶኦዛዹዋያ ሃሣ ሃጊ ማዓንዳ ዎዛባኣ ዓሲጉዲያ ማዒፖቴ፤ ጋዓንቴ ዬያ ቢያ ጎሞ ዓሳ ዒዛ ዒፂ ማዼ ባኮ ጊቢ'' ዳንዳዔ፥ ዬሱሴ ዛጉዋቴ። 4 ዒንሢ ጎሜ ዒፂ፥ ሃይቢ ሄላ''ንዳኣና ማሹምቦ ዓርቂባኣሴ። 5 ፆኦሲ ዒንሢ ፔኤኮ ናኣቶ'' ማሂ፦

«ታ ናዓሢዮ! ጎዳ ጎራ'' ጎሮ'' ቦሂፖ፤

ዒ ኔና ሜቶና ጎራ'' ዎዶ''ና ሃጋኣ ዎዛ ባኣያ ማዒፖ፤

6 ዓይጎሮ ጌዔቴ፦ ጎዳ ፔ ናሽካሢ ጎራ''ኔ፤

ፔ ናይ ማሂ ዛጋሢያ ዒ ፁንቃኔ»

ጌዒ ዞሬ ዞሮ'' ዒንሢ ዋሌ''ኔ። ✝ 7 ፆኦሲ ዒንሢ ፔኤኮ ናይ ማሂ ዛጋሢሮ ዒዚ ሜቶና ዒንሢ ጎራ'' ዎዶ''ና ጊቢ'' ዳንዳዑዋቴ፤ ዓዴ ጎሪ'' ጳርቁዋ ናይ ዓኣ? 8 ናኣቶ'' ማዔዞንሢ ዔካ ሜታሢ ዒንሢ ዔኩዋያ ማዔቴ ዓሌ'' ናይ ዒንሢ ማዓንዳኣፓዓቴም ሾዖና ናይቱዋሴ። 9 ዬይ ዓታዛ፡ ኑና ቢያሢ ጎሪ'' ፁንቃ፥ ኑና ሾዔ ዓዶንሢ ዓኣኔ፤ ያዺ ማዔቴያ ኑ ዔያቶ ቦንቻኔ። ዓካሪ ሼምፖና ናንጋኒ ኑኡኮ ዓያኖ ዓዳሢም ባሼ ዓይሢንታንዳያ ኑም ኮይሱዋዓዳ? 10 ኑ ዓዶንሢ፡ ዔያቶም ኮሺ ማዒ ጴዼ ጎይፆ ዻካ'' ዎዴም ኑና ጎሪ'' ፁንቃኔ፤ ፆኦሲ ጋዓንቴ ዒዛና ዎላ'' ኑ ጌኤሺ ማዓንዳጉዲ፥ ኑና ማኣዳ'' ባኣዚ''ሮ ሜቶና ኑና ፁንቃኔ። 11 ጎሪ'' ፁንቆ ፁንቃ ቢያ ዒማ''ና ዖዪሳያኬ፥ ዎዛሳያቱዋሴ፤ ጊንፃፓ ጋዓንቴ ጊቢ'' ዳንዳዒ ዔሬ ዓሶም ኮሹሞ ኩሜ፥ ፂሉ''ሞ ናንጊ ጴዺሻኔ።

12 ዬያሮ ዒንሢ ዓያኖ ዛሎ''ና ላቤ'' ላቢፃፓ ዶዱዋቴ። ✝ 13 ዎቦ'' ማዔሢ ዻቂ ፒዛንዳጉዲ ማዓንዳኣፓዓቴም ፔቶ ዣኣሉዋጉዲ ዒኖ'' ዒንሢኮ ፒዜ ጎይሢ ዔኪ ዓኣዹዋቴ። ✝

14 ዓሲ ቢያና ኮሺ ናንጋኒ ማሉዋቴ፤ ፆኦሲም ዱማዼያ ማዓኒያ ዶዱዋቴ፤ ዓይጎሮ ጌዔቴ ፆኦሲም ዱማዺባኣዖ ዖኦኒያ ዒዛ ዛጋኒ ዳንዳዑዋኣሢሮኬ። 15 ዒንሢዳፓ ዖጊዳኣ ፆኦሲ ኮሹሞና ዒንጋ ዒንጊፃ ፓጪ ጴዹዋጉዲ ዒንሢና ዔሩዋቴ፤ ዬያጉዲ ሃሣ ዓይጎ ዓሲያ ዒንሢ ባኣካ'' ጫንቃ ሚሢጉዲ ማዒ ኬስኪ ዒንሢ ሜታሱዋጉዲና ሚርጌሢ ፑርቲሱዋጉዲ ዒንሢና ዔሩዋቴ። ✝ 16 ዒንሢ ባኣካ'' ፔቴ''ና ሙዖ ሙኡዚ''ሮ ጌዒ ቶይዱሞ ሻንቼ፥ ዔኤሳዎጉዲ ዻቢንታያ ሃሣ ጊንሣ ፆኦሲ ቦንቺሱዋያ ማዔ ዓሲ ጴዹዋጉዲ ዒንሢና ዔሩዋቴ። ✝ 17 ጊንፃፓ ዔኤሳዎ ዓንጆ ዔካኒ ኮዔ ዎዶ''ና ዓንጆ ዒዚ ላኣጊንቴሢ ዒንሢ ዔራኔ፤ ዎዚ ዒ ዬኤኪ ዬኤኪ ዬኖ ዓንጆ ዶዲ ኮዔቴያ ዴንቃኒ ዒ ዳንዳዒባኣሴ፤ ዓይጎሮ ጌዔቴ ዒ ቤርታ ዻቤ ዻቢንቶ ቡኡፆንዶ ካራ ዒዛም ጴዺባኣሢሮኬ። ✝

18 ዒንሢ ኩቻ ዓርቂንታኒ ዳንዳዑዋያ ሃሣ ጊንሣ ታማ'' ዔኤታ'' ሲና ዹኮ'' ሄሊ''ባኣሴ፤ ጌይፃ፦ ቃኣያሢ ቤዞ፥ ዹሞ ቤዞ፥ ዓልጋሢ ዔቄ ቤዞ፥ 19 ዛዮ ዑኡዛ ጊንሣ ሃሣ ጌይንታ ባካ ዋይዚንታ ዑኡዛ ዓኣ ቤዞ ባንሢ ዒንሢ ሄሊ''ባኣሴ፤ ዬያ ባኮ ዋይዜ ዓሳ፦ «ሓይፓ ሴካ ሜሌ'' ባኣዚ'' ኑም ኬኤዚንቶፓ» ጌይ ሺኢቄኔ። ✝ 20 ዓይጎሮ ጌዔቴ፦ «ዹኮ'' ቆልሞ ሄሌ''ቴታዖ

ሹቺና ዹይንቲ ሃይቆንጎ»

ጋዓ ዓይሢፃ ዔያቶም ዴኤፄሢሮ ዔካኒ ዔያታ ዳንዳዒባኣሢሮኬ። ✝

21 ዬካ ጴዻ ባካ ሚርጌ ዒጊቻያ ማዔሢሮ ሙሴታዖ

«ታ ዒጊጪ፥ ጎጋይቄኔ» ጌዔኔ። ✝

22 ዒንሢ ጋዓንቴ ፂዮኔ ዹኮ'' ባንሢ ሙኬኔ፤ ዬይያ፦ ባይቁዋ ፆኦዛሢ ካታሞ ማዔ፥ ጫሪንጮ ዬሩሳላሜኬ፤ ዒኢካ ዎዛና ቡኪንቴ፥ ፓይዲንቱዋ ዺቦ'' ኪኢታንቾ ባንሢ ዒንሢ ሙኬኔ። 23 ሃሣ ሱ’ንፃ ዔያቶኮ ጫሪጮይዳ ፃኣፒንቴ፥ ኪሪስቶሴ ጉሙርቃ ሺኢጲፆ ማኣሮ ዓሶኮ ቶይዶ ማዔ፥ ኪሪስቶሴ ጉሙርቃ ዓሶ ቡኪንቶ ባንሢ ጊንሣ ሃሣ ቢያሢም ዎጋያ ማዔ፥ ፆኦዛሢና ፆኦሲ ዔያቶ ማዖም ጌዔ ጎይፆ ማዔ፥ ኮዦ ዓሶ ዓያኖና ባንሢ ዒንሢ ሙኬኔ፤ 24 ሃሣ ፆኦሲና ዓሲናኮ ባኣካ'' ዓኣ ዓኮ ጫኣቁሞ ጊኢጊሼ፥ ዬሱሴ ባንሢ፤ ዬያጉዲ ሃሣ ዓኣቤኤሌ ሱጉፃፓ ባሼ ኬኤዛ፥ ጎሜ ጌኤሻኒ ፑጪንቴ ዒዛኮ ሱጉፆ ባንሢ ዒንሢ ሙኬኔ። ✝

25 ዬያ ኬኤዛ ባኮ ዒንሢ ዒፁዋጉዲ ዒንሢና ዔሩዋቴ፤ ዓይጎሮ ጌዔቴ ዬያታ ሳዓፓ ዔያቶም ኬኤዛ ዎዶ''ና ዒፂ ዔያታ ቶሊ'' ዓቲባኣያ ማዔቴ፥ ጫሪንጫፓ ኑም ኬኤዛሢዳፓ ኑ ሃኬቴ ዎይቲ ኑ ቶላ''ንዳይ! ✝ 26 ዒማ''ና ዒዛኮ ዑኡዛ ሳዖ ዓጊሤኔ፤ ሃሢ ጋዓንቴ፦ «ሳዖ ሌሊቱዋንቴ ፔቴ''ና ላሚ ጫሪንጮንታ ዎላ'' ታ ዓጊሣንዳኔ» ጌዒ ጫኣቄኔ። ✝ 27 ዬይ «ፔቴ''ና ላሚ» ጌይንቴ ባካ ዔርዛሢ ዓጊፁዋ ባካ ዶዲ ናንጋንዳጉዲ ሃሣ ዓጊፃያ ማዔ፥ ማዢንቴ ባካ ባይቃንዳያ ማዔሢኬ።

28 ዓካሪ ኑኡኒ ዓጊፁዋ ቤዞ፥ ፆኦሲ ዎይሣሢዳ ጌላንዳሢሮ ዒዛ ኑ ጋላቶም፤ ሓሣ ዒ ዎዛዻ ጎይሢ ዒዛ ቦንቺሢና ዒጊጪሢና ዒዛ ኑ ካኣሽኮም። 29 ዓይጎሮ ጌዔቴ ኑ ፆኦዛሢ ሚቺ ባይዛ ታሚ ማዔሢሮኬ። ✝