ዔብሬ ዓሶም ዳኪንቴ ኪኢታ 12

5 ፆኦሲ ዒንሢ ፔኤኮ ናኣቶ'' ማሂ፦

«ታ ናዓሢዮ! ጎዳ ጎራ'' ጎሮ'' ቦሂፖ፤

ዒ ኔና ሜቶና ጎራ'' ዎዶ''ና ሃጋኣ ዎዛ ባኣያ ማዒፖ፤

6 ዓይጎሮ ጌዔቴ፦ ጎዳ ፔ ናሽካሢ ጎራ''ኔ፤

ፔ ናይ ማሂ ዛጋሢያ ዒ ፁንቃኔ»

ጌዒ ዞሬ ዞሮ'' ዒንሢ ዋሌ''ኔ። ✝12፥6 ኮኦኪ. 3፥11-12። 7 ፆኦሲ ዒንሢ ፔኤኮ ናይ ማሂ ዛጋሢሮ ዒዚ ሜቶና ዒንሢ ጎራ'' ዎዶ''ና ጊቢ'' ዳንዳዑዋቴ፤ ዓዴ ጎሪ'' ጳርቁዋ ናይ ዓኣ? 8 ናኣቶ'' ማዔዞንሢ ዔካ ሜታሢ ዒንሢ ዔኩዋያ ማዔቴ ዓሌ'' ናይ ዒንሢ ማዓንዳኣፓዓቴም ሾዖና ናይቱዋሴ። 9 ዬይ ዓታዛ፡ ኑና ቢያሢ ጎሪ'' ፁንቃ፥ ኑና ሾዔ ዓዶንሢ ዓኣኔ፤ ያዺ ማዔቴያ ኑ ዔያቶ ቦንቻኔ። ዓካሪ ሼምፖና ናንጋኒ ኑኡኮ ዓያኖ ዓዳሢም ባሼ ዓይሢንታንዳያ ኑም ኮይሱዋዓዳ? 10 ኑ ዓዶንሢ፡ ዔያቶም ኮሺ ማዒ ጴዼ ጎይፆ ዻካ'' ዎዴም ኑና ጎሪ'' ፁንቃኔ፤ ፆኦሲ ጋዓንቴ ዒዛና ዎላ'' ኑ ጌኤሺ ማዓንዳጉዲ፥ ኑና ማኣዳ'' ባኣዚ''ሮ ሜቶና ኑና ፁንቃኔ። 11 ጎሪ'' ፁንቆ ፁንቃ ቢያ ዒማ''ና ዖዪሳያኬ፥ ዎዛሳያቱዋሴ፤ ጊንፃፓ ጋዓንቴ ጊቢ'' ዳንዳዒ ዔሬ ዓሶም ኮሹሞ ኩሜ፥ ፂሉ''ሞ ናንጊ ጴዺሻኔ።