1 ዓካሪ፡ ዒዚ ኑም ዒንጋ ሃውሾይዳ ጌላንዳጉዲ ጌዒ ኑም ዒንጎና ሃጊ ማዓንዳ ዎዛ'' ሃጊ ዓኣ ጎይሣ ዓኣሢሮ ዒንሢዳፓ ዖኦኒያ ዬኖ ሃውሾይዳ ጌሉዋዖ ዓቱዋጉዲ ቢያሢ ሂርጊ ኑና ኑ ካፖም። 2 ዓይጎሮ ጌዔቴ ኮዦ ሓይሶ ዬኖ ዎዶ''ና ዔያታ ዋይዜ ጎይፆ ኑኡኒያ ዋይዜኔ፤ ጋዓንቴ ዔያታ ዋይዜ ባኮ ጉሙርቂ ዔኪባኣሢሮ ዔያቶ ማኣዲ''ባኣሴ። 3 ፆኦሲ፦

«ታኣኒ ዔያቶም ዒንጋንዳ ሃውሾ ቤዜሎ

ፔቴ''ታዖ ዔያታ ጌላዓ ጌዒ ዻጋና ታ ጫኣቄኔ» ጌዔኔ።

ፆኦሲኮ ማዻ'' ሳዓ ማዢንቴሢዳፓ ዓርቃዖ ማዺንቲ ኩሜያ ማዔቴያ ኑኡኒ ጉሙርቃ ዓሳ ጋዓንቴ ዬኖ ሃውሾ ቤዜሎ ጌላንዳኔ። ✝ 4 ዎይቲ ጌዔቴ ላንካሳ ኬሎ'' ዛሎ'' ፔቴ'' ቤሲዳ «ፆኦሲ ላንካሳ ኬሎ''ና ማዾ'' ሃሼ''ኔ» ጌይንቲ ፃኣፒንቴኔ። ✝ 5 ዬያጉዲ ላሚ ሃሣ፦

«ታ ዔያቶም ዒንጋ ሃውሾይዳ ፔቴ''ታዖ ዔያታ ጌላዓ» ጋዓኔ። ✝

6 ዔያታ ኮዦ ሃይሶ ቤርታ ዋይዚ ዓይሢንቲባኣሢሮ ፆኦሲ ዔያቶም ዒንጋኒ ጌዔ ሃውሾ ቤዞ ዔያታ ጌሊባኣሴ፤ ጋዓንቴ ዒኢካ ጌላንዳጉዲ ጌይንቴ ፔቴ'' ፔቴ'' ዓሲ ዓኣኔ። 7 ቤርታ ዳውቴ ዛሎ''ና፥

«ሓኖ'' ዒንሢ ፆኦሲኮ ዑኡዞ ዋይዛያ ማዔቴ፥

ዒኖ'' ዒንሢኮ ዶዲሺ ዋይዚ ዒፃያ ማሂፖቴ»

ጌይንቴሢጉዲ፥ ፆኦሲ፡ ሚርጌ ዎዴኮ ጊንፃፓ «ሓኖ''» ጌይ ሜሌ'' ኬሊ'' ጌሤኔ። ✝

8 ዒያሱ ፆኦሲ ዔያቶም ዒንጋንዳኔ ጌዔ ሃውሾ ዔያቶም ዒንጌያ ማዔያታቴ ፆኦሲ ሃሣ «ሓኖ''» ጌዒ ሜሌ'' ኬሊ'' ኬኤዚንዱዋያታንቴኬ። ✝ 9 ዓካሪ፡ ፆኦሲ ዴሮ''ኮ ዓይሁዶ ዓሶ ሃውሾ ኬሎ'' ማላ ሃውሾ ኬሊ'' ሃጊ ዓኣኔ፤ 10 ዬያሮ ፆኦሲ' ማዾ'' ሃሼ''ሢጉዲ ፆኦሲ ዒንጋ ሃውሾይዳ ጌላሢያ ማዾ'' ሃሻ''ንዳኔ። ✝ 11 ዓካሪ ዬንሢ ዓሶንሢ ዓይሢንቶ ዒፄሢጉዲ ማዒ ኑ ዓቱዋጉዲ ፆኦሲ ዒንጋ ሃውሾይዳ ጌላኒ ኑ ዶዶም።

12 ፆኦሲኮ ቃኣላ'' ናንጊና ናንጋያ ሃሣ ማዾዋ ማዻያኬ፤ ላምዖ ዛላ'' ጉቤ ዓጬ ማዔ፥ ጬንቻ ዓፓሮይዳፓ ባሼ ዓጫያኬ፤ ሼምፓሢና ዓያኖና፥ ሻዦና ጪጊጫ ካኣማ'' ካሮ''ዋ ዱማሳንዳያ ሄላ''ንዳኣና ቲቃያኬ፤ ዒናይዳ ዓኣ ማሊሢና ሱኡኬና ዔሪ ዎጋያኬ። 13 ፆኦሲ ቤርቶይዳፓ ዓኣሺንታ፥ ዓይጎ ማዢንቲያ ባኣሴ፤ ዒዛ ቤርታ ቢያ ባኣዚ'' ፔጋዼያ ሃሣ ካሎ'' ማዒ ጴዻያኬ፤ ኑኡኒያ ኑ ዖኦጪንታ ባኮ ማሂ ኬኤዛኒ ኮይሳሢ ዒዛ ቤርቶይዳኬ።

14 ዓካሪ ሌካ ጫሪንጮ ኬስኬ፥ ቄኤሶኮ ዑፃ ማዔ፥ ዼኤፒ ኑኡኮ ዓኣሢሮ ኑኡኮ ጉሙርቂፆ ዶዲ ኑ ዓርቆም፤ ዬይያ ፆኦሲ ናዓሢ፥ ዬሱሴኬ። 15 ኑኡኮ ዓኣ ቄኤሶኮ ዑፃሢ ማዔሢ' ኑ ላቤቴ ሚጪንቲ ኑና ማኣዳ''ኒ ዳንዳዓያኬ፤ ዒዚ ቢያ ባኣዚ''ና ኑጉዲ ዻቢሻኒ ጌሾያይዳ ጌሌያኬ፤ ጋዓንቴ ዒ ዓይጎ ጎሜያ ማዺባኣሴ። 16 ዓካሪ ጎሜኮ ዓቶም ጌይሢ ኑ ዴንቃንዳጉዲና ኑም ኮይሳ ዎዶ''ና ኑና ማኣዳ'' ፆኦሲ ኮሹሞ ዒንጊፆ ኑ ዴንቃንዳጉዲ ዒዛኮ ኮሹማ ጴዻ ካኣቱሞ ዖይቶ ባንሢ ጉሙርቂሢና ኑ ሺኢኮም።