1 ቄኤሶኮ ቢያ ዑሢ ማዓ ፔቴ'' ፔቴ'' ዓሳ ፔ ዓሶ ባኣካ''ፓ ዶኦሪንታኔ፤ ዬያታ ፆኦሲም ማዺንታ ባኮና ዓሲ ዛላ ዔቂ ጎሜ ዓቶም ጌይሳ ዒንጊፆ ዒንጋኒ ዶኦሪንታኔ። 2 ዒዚ ፔ ቶኦኪና ላቢ''ንታያ ማዔሢሮ ዔሩዋ ዓሶና ላቢ''ንታ ዓሶናም ሚጪንቲ ማኣዳ''ኒ ዳንዳዓኔ። 3 ዒዚ ፔ ጎሞና ሜሌ'' ዓሶ ጎሞና ዛሎ'' ዒንጎ ባኮ ዒንጋኒ ዒዛ ኮይሴሢ ዬያ ዛሎ''ናኬ። ✝5፥3 ሌዊ. ዓኬ 9፥7። 4 ዓኣሮኔጉዲ ፆኦሲ ዔኤሊ''ባኣያ ማዔቴ ዖኦኒያ ዬያ ቦንቾ ፔኤሮ ዴንቃ ዓሲ ባኣሴ፤ ✝5፥4 ኬሲ. ማፃ 28፥1።

5 ዬያጉዲ ኪሪስቶሴ ቄኤሶኮ ቢያ ዑሢ ማሃ፥ ቦንቾ ፔኤሮ ዔኪ ቦንቺንቲባኣሴ፤ ጋዓንቴ ዒዚ ቄኤሶኮ ቢያ ዑሢ ማሃ ቦንቾ ዔኬሢ፦

«ኔኤኒ ታኣኮ ናዓሢኬ፤

ታኣኒ ኔኤኮ ሃኖ'' ዓዶ ማዔኔ» ጌዔ ፆኦዛሢዳፓኬ። ✝5፥5 ዓይኑ. 2፥7።

6 ዬያጉዲ ሃሣ ሜሌ'' ቤስካ ፆኦሲ፦

«ሜልኬፃዲቄ ቄኤሴ ማዒ ዶኦሪንቴሢጉዲ

ኔኤኒ ናንጊና ናንጋንዳ ቄኤሴኬ» ጋዓኔ። ✝5፥6 ዓይኑ. 110፥4።

7 ዬሱሴ ዓሲ ማዒ ሃያ ሳዖይዳ ናንጌ ዎዶ''ና ሓይቢዳፓ ዒዛ ዻቂሻንዳ ፆኦዛሢ፡ ዼኤፒ ዒላቲና ሃሣ ዬኤኪ ዬኤኪ ፔ ማሊፆ ኬኤዚ ሺኢቄኔ፤ ዒዚ ሼሌዑሞና ዓይሢንቴሢሮ ፆኦሲ ዒዛኮ ዒማ''ና ሺኢጲፆ ዋይዜኔ። ✝5፥7 ማቲ. 26፥36-46፤ ማር. 14፥32-42፤ ሉቃ. 22፥39-46። 8 ዎዚ ዒ ፆኦሲ ናይ ማዔቴያ ዒዛ ሄሌ'' ሜታሢ ዛሎ''ና ዓይሢንቲሢ ዒ ዔሬኔ። 9 ዬያና ዒ ጊኢጌያ ማዒ ጴዼስካፓ፥ ዓይሢንታዞንሢም ቢያ ናንጊና ዻቂንታኮ ካራ ማዔኔ። 10 ሜልኬፃዲቄ ዶኦሪንቴሢጉዲ ፆኦሲ ዒዛ ቄኤሶኮ ቢያ ዑፃሢ ማሂ ዶኦሬኔ።

11 ዬያ ዛሎ'' ሚርጌ ኑ ኬኤዛንዳ ባኣዚ'' ናንጊታንቴ ዑኬ ዒንሢም ዔኤቢ ጌሉዋኣሢሮ ዒንሢም ኬኤዚ ዔርዛኒ ሜቶኬ። 12 ሄኤዶ ሄሊ'' ዒንሢ ናንጌ ጎይፆና ሴካ ዓሲ ዔዔርዛንዳያታዖ ፆኦሲ ቃኣሎ''ኮ ዓይፆ ካሮ'' ሜሌ'' ዓሲ ሃጊ ዒንሢ ዔርዛንዳያ ኮይሳኔ፤ ዬይ ዒንሢም ኮይሳሢያ ዲኢቂ ማዓንዳኣፓዓቴም ዶዲ ሙኡዚቱዋሴ። 13 ዓይጎሮ ጌዔቴ ዲኢቂ ሺሺንቂ ዑሾ''ሢ ቢያ ናይ ማዔሢሮ ፂሉ''ሞ ዛላ ዔራቶ ባኣዚ'' ሃጊ ዔሪባኣያኬ። ✝5፥13 1ቆሮ. 3፥2። 14 ዶዲ ሙኡዚ'' ኮይሳሢ ጋዓንቴ ኮዦና ፑርቶና ዱማሲ ዛጊ ዔሬ ዒናዼ ዓሲምኬ።