Lucas 5

ዬሱሴ ቤርታሳ ዒዛኮ ጊንፆ ሓንታዞንሢ ዔኤሌ''ሢ

1 ፔቴ'' ኬሊ'' ዬሱሴ ጌንሴሬፄ ጌይንታ ባዞ'' ዓጫ ዔቂ ዓኣንቴ ሚርጌ ዓሳ ዒዛ ባንሢ ሙኪ ፆኦሲኮ ቃኣሎ'' ዋይዛኒ ቱቺንታኔ። 2 ዒዚያ ባዞ'' ዓጮይዳ፥ ሳዖኮ ዑኬ ዔቄ፥ ላምዖ ዋኣሢና ፒንቆ ጎንጊ ዴንቄኔ፤ ሞላሢ ዓርቃዞንሢ ጋዓንቴ ዋኣፆና ፒንቆ ጎንጋፓ ኬዲ'' ዔያቶኮ ሞላሢ ዓርቆ ሮኦጮ ማላ ሱዞ ማስካኔ። 3 ዬሱሴ ዋኣፆና ፒንቆ ጎንጎንሢዳፓ ፔቴ''ዞ፥ ሲሞኦኔሬሎይዳ ጌላዖ ሲሞኦኔ ኮራ፦ «ሓኖ'' ዋኣፆና ፒንቆ ጎንጌሎ ሳዖ ኮራፓ ባዞ'' ሳዞ'' ባንሢ ታኣም ዶጪሴ» ጌዔኔ። ዬካፓ ዋኣፆና ፒንቆ ጎንጌሎይዳ ዴዒ ዴሮ'' ዔርዚሢ ዓርቄኔ። ✝5፥3 ማቲ. 13፥1-2፤ ማር. 3፥9-10፤ 4፥1።

4 ዒ ኬኤዛ ባኮ ጋፒሴሢኮ ጊንፃ ሲሞኦኔ ኮራ፦ «ዋኣፆና ፒንቆ ጎንጌሎ ሴካ ባዞ'' ሳዞ'' ጌልዚ ኔኤኒ ኔኤኮ ላጎንሢና ዎላ'' ሞላሢ ዓርቃኒ ሮኦጮ ማላ ሱዞ ዋኣፆይዳ ዓጉዋቴ» ጌዔኔ።

5 ሲሞኦኔ ማሃዖ፦ «ዔርዛሢዮ! ዋንቴ ሳዓ ካራንዳያ ሄላ''ንዳኣና ዓርቃኒ ኮዒ ሚርጌ ኑ ላቤዖ ፔቴ''ታዖ ዓርቂባኣሴ፤ ኔ ጌዔቶ ጋዓንቴ ሓይሾ ሱዞ ኑ ዓጋንዳኔ» ጌዔኔ። ✝5፥5 ዮሓ. 21፥3። 6 ሮኦጮ ማላ ሱዞ ዔያታ ዓጋዖ ሱዛ ማኣማንዳያ ሄላ''ንዳኣና ሚርጌ ሞሎ ዓርቄኔ። ✝5፥6 ዮሓ. 21፥6። 7 ዬያሮ ሜሌ'' ዋኣፆና ፒንቆ ጎንጎይዳ ዓኣ ዔያቶኮ ላጎንሢ ሙኪ ዔያቶ ማኣዳ''ንዳጉዲ ኩቻ ዉቲ ዔኤላ''ዛ፥ ዔያታ ሙኪ ላምዖ ዋኣፆና ፒንቆ ጎንጋ ዔኤዺንታኒ ዑካንዳያ ሄላ''ንዳኣና ሞላሢ ዓርቂ ጎንጎ ኩንሤኔ። 8 ሲሞኦኔ ጎዖ ጴፂሮሴ ዬያ ዛጌ ዎዶ''ና ዬሱሴኮ ቤርታ ጉምዓቲ፦ «ታ ጎዳሢዮ! ታ ጎሜ ዓሲ ማዔሢሮ ታ ባንሢ ኔ ዑኪፖ» ጌዔኔ።

9 ዬያ ዒ ጌዔሢ ዒዛንታ ዒዛና ዎላ'' ዓኣ ላጎንሢ ቢያ ዓርቄ ሞላሢ ሚርጉሞይዳፓ ዔቄያና ሚርጌና ዲቃቲ ሄርሼሢሮኬ። 10 ዬያጉዲ ሃሣ ሲሞኦኔኮ ላጎንሢ ማዔ ዜብዲዮሴ ናኣቶ''ንሢ፥ ያይቆኦቤና ዮሓኒሴናኣ ዲቃቲ ሄርሼኔ። ዬሱሴ ሲሞኦኔ ኮራ፦ «ሓይ ኔ ዎይታይ! ዒጊጪፖ፤ ሓካፓ ሴካ ኔ ዓሲ ፒሪ ዓርቃያ ማዓንዳኔ» ጌዔኔ።

11 ዔያታ ዋኣፆና ፒንቆ ጎንጎንሢ ሳዖ ባንሢ ዑኪሲ ዔቂሴስካፓ ቢያ ባኮ ሓሺ'' ዬሱሴ ጊንፆ ሓንታያ ማዔኔ።