1 ዬካፓ ዬሱሴ ካታሞና ጉርዶናይዳ ፆኦሲ ካኣቱሞ ኮዦ ሃይሶ ኬኤዚ ኬኤዚ ዓኣዻኣና ታጶ ላምዖ ዒዛኮ ጊንፆ ሃንታዞንሢያ ዒዛና ዎላ'' ዓኣኔ። 2 ዬያጉዲ ሃሣ ፑርቶ ዓያና'' ኬስኬም ፖዔዞንሢና ሜሌ'' ዶርዓሢዳፓኣ ፖዔ ላኣላ ዬሱሴ ጊንፆ ዓኣዻኔ፤ ዔያታ፦ ላንካይ ፑርታ ዓያና ኬስኬ ማይራማ፥ 3 ሄሮዲሴ ማኣራ ዓኣ ዓሶ ዓይሢ ዎይሣ ኩዛ ጎዖሢ ማቻ ዮሃናንታ ሶሲና ጎዖዞንታ ሜሌ'' ሚርጌ ላኣሊያ ዓኣኔ፤ ዬንሢ ላኣሎንሢ ዬሱሴና ዒዛኮ ጊንፆ ሃንታዞንሢና ፔኤኮ ሚኢሾ ዒንጊ ማኣዳ''ኔ። ✝

4 ሚርጌ ዴሬ ካታማፓ ካታማፓ ሙኪ ዬሱሴ ኮራ ቡኪንታዛ ዬሱሴ ኮኦኪንሢና ሂዚ ጌይ ኬኤዜኔ፤

5 «ፔቴ'' ጎሺ ጎሽካ ዓሲ ዜርሢ ዜርቃኒ ኬስኬኔ፤ ዒዚ ዜርቃኣና ፔቴ'' ፔቴ'' ዜርፃ ጎይፆ ዓጫ ኬዲ'' ሄ’ርቂንቴኔ፤ ካፒያ ሙዔኔ። 6 ዛሎ'' ዜርፃ ሃኣሻ ሳዓይዳ ኬዲ''፥ ባቃሌ ዎዶ''ና ሳዖኮ ሚርጌ ዎዑሞ ባኣሢሮ ባቃላ'' ሃይቄኔ። 7 ዓቴ'' ዜርፃ ሃሣ ዓንጊሢ ቶሻ ባኣካ ኬዳ''ዛ ዓንጊፆ ቶሻ'' ዎላ'' ዑጊ ባይዜኔ። 8 ሜሌ'' ዜርፃ ጋዓንቴ ኮሺ ሳዓይዳ ኬዲ'' ባቃሌኔ፤ ባቃላ''ኣ ዑጊ ፔቴ'' ፔቴ''ሢ ሚርጌ ዺቢ ዓኣፒ ዓኣፔኔ።»

ዬካፓ ዬሱሴ፦ «ዋይዛሢ ኮሺ'' ዋይዞንጎ!» ጌዔኔ።

9 ዒዛኮ ጊንፆ ሃንታዞንሢ ዬሱሴ ኮራ፦ «ዬኖ ኮኦኪንሤሎኮ ቡሊ''ፃ ዓይጌንዴዳይ?» ጌይ ዖኦጬኔ። 10 ዬሱሴ ዔያቶም ማሃዖ፦ «ዒንሢም ፆኦሲ ካኣቱሞ ዛሎ''ኮ ዓኣሺንቴ ባኮ ዔሪሢ ዒንጊንቴኔ፤ ሜሌ''ዞንሢም ጋዓንቴ ቢያ ባኣዚ'' ኮኦኪንሢና ኬኤዚንታኔ፤ ዓይጎሮ ጌዔቶ ዔያታ ዛጋያታዖ ዒና ዔኩዋጉዲ፥ ዋይዛያታዖ ጶቂሡዋጉዲኬ» ጌዔኔ። ✝

11 ኮኦኪንሦኮ ቡሊ''ፃ ያዺኬ፦ «ዜርፃ ፆኦሲ ቃኣሎ''ኬ፤ 12 ጎይፆ ዓጫ ኬዴ'' ዜርፃ ዻዋሢ' ቃኣሎ'' ዋይዛ ዓሶኬ፤ ጋዓንቴ ዔያታ ጉሙርቂ ጎናሲ ዻቁዋጉዲ ፃላሄ ሙኪ ቃኣሎ'' ዔያቶኮ ዒና''ፓ ዔካኔ። 13 ሃኣቾ ዓጮ''ይዳ ኬዴ'' ዜርፃ ዻዋሢ' ቃኣሎ'' ዋይዚ ዎዛና ዔካዞንሢኬ፤ ጋዓንቴ ዔያታ ጉሙርቂ ጎናሲ ዔካሢ ዻካ'' ዎዴምኬ፤ ፃጲ ዔያቶኮ ባኣሢሮ ሜታ ሄሌ'' ዎዶ''ና ቤዞና ዔያታ ሃሻ''ኔ። 14 ዓንጊፆ ቶሾ ባኣካ'' ኬዴ'' ዜርፃ ዻዋሢ ቃኣሎ'' ሃሣ ዋይዛ ዓሶንሢኬ፤ ጋዓንቴ ሃያ ዓጮ'' ማሊፆና ቆሎ''ና ሃሣ ሳዖ ናንጎ ኮሹማ ዒኖ ዓርቂ ዓኣፒ ባኣያ ዬያቶ ማሃኔ። 15 ኮዦ ሳዖይዳ ኬዴ'' ዜርፃ ዻዋሢ' ጋዓንቴ ኮሺ ሃሣ ፒዜ ዒናና ቃኣሎ'' ዋይዚ ካፓዞንሢኬ፤ ዬንሢ ቃኣሎ''ና ዶዲ፥ ዓኣፖ ዓኣፓዞንሢኬ» ጌዔኔ።

16 ዬካፓ ሃሣ ዬሱሴ፦ «ፖዒ ፖዒሲ ጉኡፒ ዓኣቻያና ሃሣ ሻኣላ'' ዴንካ ጌሣ ዓሲ ባኣሴ። ዬያይዲፆፓ ማኣሪ ጌላ ዓሳ ፖዖ ዛጋንዳጉዲ ዼ’ጌ ሻርናይዳ ጌሣኔ። ✝

17 «ዬያጉዲ ፔጋዹዋዖ ሓሣ ዔርቱዋዖ ዓኣሺንቲ ዓታንዳ ባኣዚ'' ባኣሴ። ✝

18 «ዬያሮ ዒንሢ ዎማይዲ ዋይዛንዳቴያ ዒንሢና ዔሩዋቴ፤ ዓይጎሮ ጌዔቶ ዔኤቢ ዓኣ ዓሲም ቃሲ'' ዒንጊንታኔ፤ ባኣሢዳፓ ጋዓንቴ ‹ታኣኮ ዓኣኔ› ጌዒ ዒ ማላ ዻኮ''ማኣ ዓይሱዋዖ ዒዛይዳፓ ዔኪንታንዳኔ» ጌዔኔ። ✝

19 ዬሱሴኮ ዒንዶና ጌርሲንሢና ዒዚ ዓኣ ቤዞ ሙኬኔ፤ ጋዓንቴ ዴሮ'' ሚርጉሞፓ ዔቄያና ዔያታ ዒዛ ዴንቃኒ ዳንዳዒባኣሴ። 20 ዬያሮ፦ «ኔኤኮ ዒንዶና ጌርሲንሢና ዙላ'' ዔቂ ኔና ዛጋኒ ኮዓኔ» ጌዒ ዓሳ ዒዛም ኬኤዜኔ።

21 ዬሱሴ ማሃዖ፦ «ፆኦሲ ቃኣሎ'' ዋይዚ ኩንሣዞንሢ ቢያ፥ ዬንሢ' ታኣኮ ዒንዶና ጌርሲንሢናኬ» ጌዔኔ።

22 ፔቴ'' ኬሊ''ና ዬሱሴ ፔኤኮ ጊንፆ ሃንታዞንሢና ዎላ'' ዋኣፆና ፒንቆ ጎንጎ ቶጋዖ፦ «ባዞ''ኮ ሶ ሱኮ ኑ ፒንቆም» ጋዓዛ፥ ዔያታ ዴንዳኒ ዔቄኔ። 23 ዔያታ ባዞ'' ዑፆይዳ ዓኣዻኣና ዬሱሴ ጊንዔኔ፤ ዬማና ዎልቄና ዓኣ ባዚ'' ጉዳ ባዞ''ይዳ ዔቄኔ። ዋኣፃ ጎንጎ ጋሮ ኩሚሢ ዓርቄሢሮ ቢያሢ ካራ ባይዚ ሜታዼኔ። 24 ዬያሮ ዒዛኮ ጊንፆ ሃንታዞንሢ ላሚ ላሚ፦ «ዔርዛሢዮ! ኑ ኩዴኔ!» ጌዒ ዬሱሴ ጴቼኔ።

ዒዚ ጴጫዖ ዢባሮና ጉዳሢና ጎራ''ዛ ዢባሮንታ ጉዳሢንታ ቤዞና ዚቲዮ ጌዔም ፔቴ''ታዖ ዓጊፃ ባኣዚ'' ባኣያ ማዔኔ። 25 ዬካፓ ዬሱሴ ዒዛኮ ጊንፆ ሃንታዞንሢ ኮራ፦ «ዒንሢኮ ጉሙርቂፃ ዋኣዳዖ?» ጌዔኔ።

ዔያታ ጋዓንቴ ሚርጌና ዒጊጬስካፓ ሄርሺ ዲቃታዖ ዎሊ ኮይላ''፦ «ዢባሮና ጉዳሢና ዓይሣኔ፤ ዔያታኣ ዒዛም ዓዓይሢንታኔ፤ ካኣ! ሓይ ዓይጎ ዓሲዳይ?» ጌዔኔ።

26 ዬካፓ ዔያታ ባዞ''ና ፒንቂ ጌሊላ ሱኮ''ይዳ ዓኣ ጌርሴኖኔ ዓጮ'' ሄሌ''ኔ፤ 27 ዬሱሴ ዋኣፆና ፒንቆ ጎንጋፓ ሳዓ ኬዳ''ዛ ፑርታ ዓያና ዓኣ ፔቴ'' ዓሲ ካታማ''ፓ ኬስኪ ዒዛና ካኣሜኔ፤ ዬይ ዓሢ ፔኤኮ ማኣዓሢ ኬኤሪ፥ ጉሪ ሃንታንቴ ሚርጌ ዎዴ ማዔያኬ፤ ዒዚ ናንጋሢ ዱኡፒ ካይዚዳኬ፥ ማኣሪዳቱዋሴ። 28 ዒዚ ዬሱሴ ዴንቂ ዒላቲ ዬሱሴ ቤርታ ሎኦማዖ ዑኡዞ ዼ’ጊዲ፦ «ኔኤኒ ፑኡፖ ፆኦዛሢ ናዓሦ፥ ዬሱሴ! ታኣና ዎላ'' ኔኤኮ ዓይጎ ዒጊንቶ ዓኣይ? ሃዳራ ታና ሜታሲፖ!» ጌዔኔ። 29 ዬያ ዒ ጌዔሢ ዬሱሴ ፑርቶ ዓያናሢ ዓሢዳፓ ኬስካንዳጉዲ ዓይሤሢሮኬ። ዬያኮ ቤርታ ፑርቶ ዓያናሢ ዓሢ ዑፆይዳ ሚርጌ ዎዴ ዔቃያኬ፤ ዬያሮ ዒዛኮ ቶኮ''ና ኩጮና ካኒ ቢራታና ዓንጊ ዱፄና ቱኡቲ ቱኡቲ ካፒንታያ ማዔቶዋ ካኖ ቢራቶዋ ዱኡዚ ዓንጎ ዱፆዋ ሜንሢሲ ዓሲ ናንጉዋ ዳውሎ'' ዒዛ ዔኪ ዔኪ ዴንዳኔ።

30 ዬሱሴ፦ «ሱንፃ ኔኤኮ ዖናዳይ?» ጌዒ ዖኦጫዛ፥ ዒዚ ሚርጌ ፑርታ ዓያና ዒዛይዳ ቡኪ ዓኣሢሮ፦ «ሱንፃ ታኣኮ ዴሬኬ» ጌዒ ዒዛም ማሄኔ። 31 ፑርቶ ዓያና'' ዬሱሴ ኮራ፦ «ሓዳራ ጋፒንፃ ጴዹዋ ዔቶ'' ዼኤፖ* ኑና ዳኪፖ» ጌዒ ዒዛ ሺኢቄኔ።

32 ዬኖ ቤዞይዳ ዓኣ ዹኮ'' ጎኦባ'' ዓሲኮ ቆሎ ሚርጌ ጉዱንሢ ሄንቃንቴ ፑርቶ ዓያና''፦ «ሴኬ ጉዱንፆይዳ ኑ ጌላንዳጉዲ ኑና ዓይሤ» ጌዒ ዬሱሴ ሺኢቃዛ፥ ዔያታ ጌላንዳጉዲ ዒ ዓይሤኔ። 33 ዬያሮ ፑርቶ ዓያና'' ዓሢዳፓ ኬስኪ ጉዱንፆይዳ ጌላዛ ጉዱንፃ ዎሊ ዑፃ ዲርጊ ማጎ ዓኣዻዖ ባዞ''ይዳ ጌሊ ሙይንቴኔ።

34 ጉዱንፆ ሄንቃ ናኣታ'' ዬያ ባኮ ዛጋዖ ጳሽኪ ዴንዲ ካታሞና ዙሎ''ናይዳ ሚርጌና ሓይሶ ኬኤዜኔ። 35 ዓሳ ዬያ ባኮ ዛጋኒ ፔ ማኣራፓ ኬስኪ ዬሱሴ ባንሢ ሙካንቴ፥ ፑርቶ ዓያና'' ኬስኬ ዓሢ' ዒና'' ዒዛኮ ማዔም ዓፒሎ ፔኤኮ ማኣዒ ዬሱሴኮ ቶኮ'' ዴማ'' ዴዒ ዓኣንቴ ዔያታ ዴንቂ ዒጊጬኔ፤ 36 ዓኣፖና ዛጌ ማርኮ ማዔ ዓሶንሢ ፑርቶ ዓያና'' ዓኣ ዓሢ ዎማይዲ ዻቄቶዋ ዔያቶም ኬኤዜኔ። 37 ዬካፓ ጌርሴኖኔ ዓጮ'' ዓሳ ቢያ ዬሱሴ ዔያቶኮ ዓጫ''ፓ ዴንዳንዳጉዲ ዒዛ ሺኢቄኔ። ዬያ ዔያታ ጌዔሢ ሚርጌና ዒጊጬሢሮኬ። ዬያሮ ዬሱሴ ዋኣፆና ፒንቆ ጎንጎ ቶጊ፥ ዎንዴ ሙኬ ቤዞ ባንሢ ዴንዳኒ ዔቃዛ፥ 38 ፑርቶ ዓያና'' ኬስኬ ዓሢ ዬሱሴ ኮራ፦ «ሓዳራ፥ ታ ኔ ጊንፆ ሙኮም» ጌዒ ሺኢቄኔ።

39 ዬሱሴ ጋዓንቴ፦ «ኔ ማኣሪ ዓኣዺጋፓ ፆኦሲ ኔኤም ማዼ ባኮ ቢያ ኬኤዜ» ጌዒ ዒዛ ዳካዛ፥ ዓሢ ዬሱሴ ዒዛም ማዼ ፑኡፖ ባኮ ካታሞይዳ ቢያ ኬኤዚ ኬኤዚ ዴንዴኔ።

40 ዴራ'' ዒዛ ቢያ ካፒ ዓኣሢሮ ዬሱሴ ማዒ ሙካኣና ቢያሢ ዒዛ ዎዛና ዔኬኔ። 41 ዒማ''ና ፔቴ'' ዓይሁዶ ዓሳ ቡኪንታ ቤዞኮ ሱኡጌ ማዔ፥ ዒያዒሮሴ ጌይንታ ዓሲ ሙኪ ዬሱሴኮ ቶኮ'' ዴማ'' ሎኦሚ፦ «ሓዳራ፥ ታ ማኣሪ ሙኬ» ጌዒ ዒዛ ሺኢቄኔ። 42 ዓይጎሮ ጌዔቶ ዒዛኮ ታጶ ላምዖ ሌዔ ማዔ ናይስኬና ሓርጊንቲ ሃይቃኒ ዑኪ ዓኣሢሮኬ።

ዬያሮ ዬሱሴ ዒዛና ዎላ'' ዴንዳንቴ፥ ዒዛና ዎላ'' ዓኣዻ ሚርጌ ዓሳ ቱቺ ዒዛ ሜታሳኔ። 43 ዒማ''ና ታጶ ላምዖ ሌዔ ጉቤ ሱጉሢ ሾኦቲ ሜታሳ ፔቴ'' ላኣሊስኬና ዓኣኔ፤ ዒዛ ፔኤኮ ዓኣ ሚኢሾ ጉቤ ዼኤሾ ዔራ ዓሶም ዒንጊ ጋፒሴቶዋ ዖኦኒያ ዒዞ ዻቂሻኒ ዳንዳዒባኣሴ። 44 ዬና ላኣሌላ ዬሱሴ ባንሢ ሙኪ ጊንፆ ዛሎ''ና ዑኪ ዒዛኮ ዓፒሎ ዓጮ ሄላ''ዛ ቤዞማና ዒዞኮ ሾኦታ'' ሱጉፃ ዔቄኔ። 45 ዬሱሴ ዒማ''ና፦ «ዖ ታና ካኣሜይ?» ጌዒ ዖኦጬኔ።

ቢያሢ፦ «ኑ ኔና ሄሊ''ባኣሴ» ጋዓዛ፥ ጴፂሮሴ ማሃዖ፦ «ዔርዛሢዮ! ዴራ'' ቱቺንቲ ኔ ጊንፆ ዓኣዻሢ ኔ ዛጉዋዓዳ?» ጌዔኔ።

46 ዬሱሴ ጋዓንቴ፦ «ታጊዳፓ ዎልቄ ኬስኬሢ ታ ዔራሢሮ ጎኔ፤ ፔቴ'' ዓሲ ታና ካኣሜኔ» ጌዔኔ። 47 ላኣሌላ ዓኣሺንታኒ ዳንዳዒባኣሢ ዔራዖ ጎጋይቂ ጎጋይቂ ዒዛኮ ቶኮ'' ዴማ'' ሎኦሜኔ፤ ዬካፓ ዒዛ ዓይጎሮ ካኣሜቶዋ ሃሣ ዎማይዲ ዒዛ ቤዞና ፖዔቶዋ ዴሮ'' ቢያ ቤርታ ፔጋሲ ኬኤዜኔ። 48 ዬሱሴያ፦ «ታ ናዔሌ! ኔ ጉሙርቂፃ ኔና ፖዒሴኔ፤ ኮሺ ዴንዴ» ዒዞም ጌዔኔ።

49 ዬሱሴ ዬያ ሃጊ ኬኤዛ ጎይሣ ዓኣንቴ ፔቴ'' ዓሲ ዓይሁዶኮ ቡኪንቶ ቤዞ ሱኡጋሢ፥ ዒያዒሮሴ ማኣራፓ ሙኪ ዒያዒሮሴ ኮራ፦ «ናዔላ ኔኤኮ ሓይቄኔ፤ ማይ ዔርዛሢ ጉሪ ላቢ''ሲፖ» ጌዔኔ።

50 ዬሱሴ ጋዓንቴ ዬያ ዋይዛዖ ዒያዒሮሴ ኮራ፦ «ኔኤሮ ዒጊጪፖ፥ ጉጉሙርቄ፤ ናዔላ ኔኤኮ ዻቃንዳኔ» ጌዔኔ።

51 ዬሱሴ ዬማና ዒያዒሮሴ ማኣሪ ሄላ''ዖ ጲፂሮሴና ዮሓኒሴና ያይቆኦቤና ሃሣ ናዔሎኮ ዓዶና ዒንዶናፓ ዓታዛ ሜሌ'' ዖኦኒያ ዒዛና ዎላ'' ጋሮ ጌላንዳጉዲ ኮዒባኣሴ። 52 ዒኢካ ዓኣ ዓሳ ቢያ ናዔሎ ዛሎ'' ዖዪ ዬኤፒዳ ዓኣንቴ ዬሱሴ ዔያቶም፦ «ዬኤኪፖቴ፤ ናዔላ ጊጊንዓንዳፓዓቴም ሃሃይቂባኣሴ» ጌዔኔ።

53 ዔያታ ጋዓንቴ ናዔላ ሃይቄሢ ዔሬሢሮ ቢያሢ ዒዛ ቦሂ፥ ሚኢጬኔ። 54 ዬሱሴ ናዔሎኮ ኩጮ ዓርቃዖ፦ «ዓንቆ፥ ዔቄ!» ጌዔኔ። 55 ዒዛ ሼምፓሢ ዒዞኮ ማዔሢሮ ቤዞማና ላዓ ጌዒ ዔቃዛ፥ ዬሱሴ፦ «ዒዛ ሙዓንዳ ባኣዚ'' ዒዞም ዒንጉዋቴ» ጌዒ ዔያቶ ዓይሤኔ። 56 ናዔሎኮ ዓዶና ዒንዶና ዲቃቲ ሄርሼኔ፤ ዒዚ ጋዓንቴ፦ «ሃያ ባኮ ዖኦማኣ ኬኤዚፖቴ» ጌዔኔ።