1 ዬሱሴና ዒዛኮ ጊንፆ ሓንታዞንሢና ዬሩሳላሜ ሙኪ ዑካዖ ዛይቶ ሪሚቶ ዹኮ'' ኮይላ'' ዓኣ ቤቴፓጌና ቢታኒያ ጌይንታ ካታሞንሢ ሙኬኔ፤ ዬሱሴ ዒዛኮ ጊንፆ ሓንታ ናኣቶ''ይዳፓ ላምዖስኬንሢ ቤርታ ሂዚ ጌዒ ዳኬኔ፦ 2 «ሃኖ'' ሴኮ ጉርዴሎ ዒንሢ ቤርታዺ ዓኣዹዋቴ፤ ዒኢካ ዒንሢ ሄሄላ''ዖ ዖኦኒያ ቶጊባኣ ሓሬ ናይ ቱኡቲ ዓኣንቴ ዴንቃንዳኔ፤ ቡሊ'' ሃኒ ዔኪ ዬዑዋቴ፤ 3 ዖኦኒያ ዒንሢ ዓይጎሮ ቡላ''ይ ጌዒ ዖኦጬቶ ‹ጎዳም ኮይሳሢሮኬ፤ ዑኬና ዒዚ ማሂ ዳካንዳኔ› ጌዒ ኬኤዙዋቴ።»

4 ዔያታኣ ዴንዳዖ ሓሮ'' ናዖማ ጎይፆ ዓጫ፥ ማኣሪ ካርካ ቱኡቲ ዓኣንቴ ዴንቂ ቡሌ''ኔ፤ 5 ዒማ''ና ዒኢካ ዔቂ ዓኣ ዓሶፓ ፔቴ'' ፔቴ'' ዓሲ፦ «ሃሮ'' ናዖ ዎዳ''ኒ ቡላ''ይ?» ጌዒ ዖኦጬኔ።

6 ዔያታኣ ዬሱሴ ጌዔሢ ዖኦጫ ዓሶም ማሂ ኬኤዛዛ ዓሳ ዔያቶ ሓሼ''ኔ። 7 ላምዖ ጊንፆ ሓንታ ናኣቶ''ንሢ ሃሮ'' ናዖ ዔኪ ዬሱሴ ኮራ ሙካዖ፥ ዔያታ ፔኤኮ ዓፒሎ ሓሮ'' ናዖ ዙላ'' ጌሣዛ ዬሱሴ ቶጌኔ። 8 ሚርጌ ዓሳ ፔኤኮ ዓፒሎ ጎይፃ ሒኢሣዛ ዛሎ'' ዓሳ ካያፓ ዋላሺ ሜንሢ ሜንሢ ጎይፃ ሂኢሤኔ። 9 ዬሱሴኮ ቤርቶና ጊንፆናይዳ ዓኣ ዴራ'' ቢያ፦ «ፆኦሲ ጋላቲንቶም! ጎዳ ሱ’ንፆና ሙካሢ ፆኦሲ ዓንጆንጎ፤ ✝ 10 ሓጊ ሙካ፥ ኑኡኮ ዓዳሢ፥ ዳውቴ ካኣቱማ ዓንጂንቴያኬ! ጋላታ ጫሪንጮይዳ ፆኦሲም ማዖንጎ!» ጌዒ ዒላቴኔ።

11 ዬሱሴ ዬሩሳላሜ ሄሊ'' ፆኦሲኮ ጌኤዦ ማኣሪ ጌላዖ ዓጫ ዓኣ ባኮ ቢያ ዛጌኔ፤ ሳዓ ዓሜሢሮ ታጶ ላምዖንሢና ዎላ'' ዬሩሳላሜፓ ኬስኪ ቢታኒያ ጎዖ ቤዞ ዓኣዼኔ።

12 ጉቴ'' ቢታኒያፓ ዔያታ ማዓኣና ዬሱሴ ናይዺንቴኔ። 13 ፔቴ'' ዋርቂ ዓኣያ ቤሌሴ ጌይንታ ሚሢ ሃኬ ዴንቃዖ ጎዖንቴ ዒዞይዳ ዓኣፒ ናንጋንዳኔ ጌዒ ሚፄሎ ባንሢ ዓኣዼኔ። ጋዓንቴ ሚፄላ ዓኣፑዋ ዎዴ ማዔሢሮ ዒላሺፓ ዓታዛ ፔቴ''ታዖ ዓኣፒ ዒዚ ዴንቂባኣሴ። 14 ዬያሮ ዬሱሴ ሚፄሎ፦ «ሃይፓ ሴካ ዖኦኒያ ኔጊዳፓ ዓኣፒ ሙዖፓ» ጌዔኔ።

ዬያ ዒዚ ጋዓኣና ጊንፆ ሓንታ ናኣታ'' ዋይዜኔ።

15 ዬሱሴ ዬሩሳላሜ ሙካዖ ጌኤዦ ማኣሮ ጌሊ ዒኢካ ሻንቻ ዓሶና ሻንቃ ዓሶና ዳውሲሢ ዓርቄኔ። ሚኢሾ ላኣማ ዓሶኮ ሚኢሾ ጌሦሢና ዶኦሎ'' ሻንቻ ዓሶኮ ዖይቶና ሂዒ ዶይሴኔ። 16 ዖኦኒያ ዓይጎ ባኣዚ'' ኬዲ ጌኤዦ ማኣሮኮ ዲሮ ጋሮና ዓኣዻንዳጉዲ ዒ ኮዒባኣሴ። 17 ዬሱሴ ዴሮ'' ሂዚ ጌዒ ዔርዜኔ፦ « ‹ታኣኮ ማኣራ ዓሲ ዜርሢ ቢያኮ ሺኢጲሢ ማኣሪኬ› ጌዒንቲ ፃኣፒንቲባኣዓዳ? ዒንሢ ጋዓንቴ ዉሲ'' ዓኣሺንታ ቤሲ ማሔኔ» ጌዔኔ። ✝

18 ቄኤሶኮ ሱኡጎና ሙሴኮ ዓሶ ዎይሣ ዎጎ ዔርዛዞንሢና ዬሱሴ ዬያ ኬኤዛኣና ዋይዜኔ፤ ዒዚ ኬኤዛሢ ዴራ'' ቢያ ዲቃቲ ሄርሻሢሮ ዔያታ ዒጊጫዖ ዎዲ'' ዓርቂ ዒዛ ባይዛንዳቴያ ካራ ኮዔኔ።

19 ዬሱሴና ጊንፆ ሓንታ ናኣቶ''ና ሳዓ ዓማዛ ካታማፓ ኬስኬኔ።

20 ዚሮ ጉቴ''ሎ ጉቴ'' ዓሚ'' ጎይፆና ዔያታ ዴንዳዖ ቤሌሶ ሚፄላ ፃጲና ሜሊ ዓኣንቴ ዴንቄኔ፤ 21 ጴፂሮሴ ዚጊኖ ዬሱሴ ጌዔሢ ጶቂሣዖ፦ «ዔርዛሢዮ! ኔኤኒ ጋዳንቄ ሚፄላ ሓይሾ ሜሌኔ» ጌዔኔ።

22 ዬሱሴ ዔያቶም ማሓዖ፦ «ፆኦሲ ጉሙርቁዋቴ፤ 23 ጎኔ ታ ዒንሢም ጋዓኔ፤ ዖኦኒያ ላምዖ ዒኔና ማይባኣዖ ‹ታኣኒ ኮዓ ባካ ማዓንዳኔ› ጌዒ ጉሙርቂሢና ሓያ ዹኮ'' ‹ሓይፓ ዔቂ ባዞ''ይዳ ኬኤሪንቴ› ጌዔቶ ኬኤሪንታንዳኔ። ✝ 24 ዬያሮ ሺኢጲሢና ዓይጎ ባኣዚ''ታቶዋ ዒንሢ ሺኢቄቶ ዒንሢም ማዔያጉዲ ጉሙርቁዋቴ፤ ዒንሢ ሺኢቃ ባካ ቢያ ዒንሢም ዒንጊንታንዳኔ። 25 ጫሪንጫ ዓኣ ዓዳሢ ዒንሢ ጎሞ ዓቶም ጋዓንዳጉዲ ዒንሢ ሺኢቃኒ ዔቃ ዎዶ''ና ዓሲዳ ዒንሢ ዓርቄ ኮሜ ዓኣቶ ሃሹ''ዋቴ። ✝ [ 26 ዒንሢ ሜሌ'' ዓሶኮ ዻቢንቶ ዓቶም ጌዒባኣቶ ጫሪንጫ ዓኣ ዓዳሢ ዒንሢ ጎሞ ዓቶም ጌዒንዱዋሴ» ጌዔኔ።]*

27 ዔያታ ላሚ ዬሩሳላሜ ማዒ ሙኬኔ፤ ዬሱሴ ጌኤዦ ማኣሮ ጌሊ ሓንታንቴ ቄኤሶኮ ሱኡጋ፥ ሙሴ ዎጎ ዔርዛዞንሢ ሓሣ ጪማኣ ዒዛ ኮይላ'' ሙካዖ፦ 28 «ሓያ ባኮ ቢያ ኔኤኒ ማዻሢ ዓይጎ ቢታንቶናዳይ? ሓሣ ሓያ ባኮ ማዻንዳጉዲ ቢታንቶ ኔኤም ዒንጌሢ ዖናዳይ?» ጌዒ ዖኦጬኔ።

29 ዬሱሴ ማሓዖ፦ «ታኣኒያ ዒንሢ ፔቴ'' ባኣዚ'' ዖኦጫንዳኔ፤ ዒንሢ ታኣም ማሄቶ ታኣኒ ዓይጎ ቢታንቶና ሓያ ባኮ ማዻቴያ ዒንሢም ኬኤዛንዳኔ፤ 30 ዮሓኒሴኮ ማስኪፃ ፆኦሲፓሞ ዓሲፓዳይ? ሒንዳ ታኣም ኬኤዙዋቴ» ጌዔኔ።

31 ዔያታ፦ « ‹ዓካሪ ኑ ዎዚ ጋዓንዳይ?› ጌዒ ዎላ'' ዞርታዖ፥ ‹ፆኦሲፓኬ› ጌዒ ኑኡኒ ማሄቶ ‹ሂዳዖ ዒንሢ ዓይጎሮ ዮሓኒሴ ኬኤዛሢ ጉሙርቂባኣይ?› ዒዚ ጋዓንዳኔ። 32 ‹ዓሲፓኬ› ኑኡኒ ጌዔቶሽ?» ዓሲፓኬ ዔያታ ጎዑዋጉዲ ዴራ'' ቢያ ማስካ ዮሓኒሴ «ጎኔና ፆኦሲ ማሊሢ ኬኤዛ ዓሲኬ» ጋዓሢሮ ዒጊጬኔ። 33 ዬያሮ፦ «ኑኡኒ ዔሩዋሴ» ጌዒ ማሄኔ።

ዬሱሴያ፦ «ያዒታቶ ታኣኒያ ዓይጎ ቢታንቶና ሃያ ባኮ ማዻቶ ዒንሢም ኬኤዛዓ» ጌዔኔ።