1 ፔርሴ ዓሶና ዬሩሳላሜፓ ሙኬ ፔቴ'' ፔቴ'' ሙሴ ዔርዜ ዎጎ ዔርዛ ዓሶና ዬሱሴ ኮራ ቡኬኔ። 2 ዬሱሴኮ ጊንፆ ሃንታዞንሢዳፓ ፔቴ'' ፔቴ''ዞንሢ ሙሴ ዎጋ'' ዓይሣ ጎይፆ ጌኤሽኪባኣ ኩቺና ሙዓንቴ ዔያታ ዛጌኔ።

3 ፔርሴ ዓሶንታ ሓሣ ዓቴ'' ዓይሁዶ ዓሳ' ጪማ ዔያቶኮ ኬሴ'' ዎጎ ካፒፆና ኩጮ ፔኤኮ ኮሺ'' ማስቲባኣዖ ሙኡዚ'' ሙዑዋሴ። 4 ዬያጉዲ ቦኦካፓ ማዓዖዋ ማስቱዋዖ ሙዑዋሴ፤ ሓሣ ዑሺ ዑሽኮ ሜሄ፥ ዖቲ፥ ጎንጊ፥ ሻኣላ''፤ ዬያ ቢያ ማስኮ ባኣዚ''ና ዬያ ማላ ሜሌ'' ሚርጌ ዎጌ ዔያታ ካፓኔ።

5 ዬያሮ ፔርሴ ዓሶና ሙሴ ዔርዜ ዎጎ ዔርዛ ዓሶና፦ «ኔኤኮ ጊንፆ ሓንታዞንሢ ዓይጎሮ ጪማ ኬሴ'' ዎጎኮ ዑሣ ዓኣዻይ? ዓይጎሮ ዔያታ ኩጮ ማስቱዋዖ ሙዓይ?» ሂዚ ጌዒ ዬሱሴ ዖኦጬኔ።

6 ዒዚ ዔያቶም ማሓዖ፦ «ዒንሢ ዓሲ ዓኣፒም ሄርሺንቲሮ ማዻ ዓሳ! ዒሲያሴ ጎዖ ፆኦሲ ማሊፆ ኬኤዛሢ ዒንሢ ዛሎ'' ኬኤዛዖ፦

‹ሓይ ዴራ'' ዻንጎና ታና ቦንቻኔ

ዒና'' ዔያቶኮ ታጊዳፓ ሚርጌ ሓኬያኬ፤

7 ዔያታ ዓሲ ዎጌ ዔርዚ ዔርዚ

ታና ጉሪ ሉኡዙሞና ካኣሽካያ ማላኔ› ጌዒ ኬኤዜሢ ጎኔኬ። ✝

8 «ዬያሮ ዒንሢ ፆኦሲ ዓይሢፆ ሓሺ'' ዓሲ ዎጌ ካፓኔ።»

9 ላሚ ዬሱሴ ዔያቶም ሂዚ ጌዔኔ፦ «ዒንሢኮ ዎጎ ዒንሢ ካፓኒ ጌዒ ፆኦሲ ዓይሢፆ ዒንሢ ሚርጌና ቦሂ ሓሻ''ኔ፤ 10 ሙሴ ‹ዓዶና ዒንዶና ቦንቼ፤ ዓዶና ዒንዶና ጫሽኬሢ ዎዎዺንቶንጎ› ጋዓኔ። ✝ 11 ጋዓንቴ ፔቴ'' ዓሲ ዓዶና ዒንዶና ማኣዶንዶሢ ሃሺ'' ዒንሢም፦ ‹ዓዶና ዒንዶናም ማዾንዶ ባኮ ዛሎ'' ቢያ ፆኦሲም ታ ዒንጎ ባኣዚ'' ዒንጌኔ› ጋዓዛ፥ 12 ዬይ ዓሢ ዓዶና ዒንዶና ማኣዱዋጉዲ ዒንሢ ዓይሣኔ፤ 13 ሂዲፆና ዒንሢ ዒንሢኮ ዔርዚፆ ካፓኒ ጌዒ ፆኦሲኮ ቃኣሎ'' ሓሻ''ኔ፤ ሓሣ ዬያጉዴ ባኣዚ'' ሚርጌ ዒንሢ ማዻኔ።»

14 ዬሱሴ ዴሮ'' ፔ ባንሢ ላሚ ዔኤሊ'' ሂዚ ጌዔኔ፦ «ቢያሢ ዒንሢ ኮሺ'' ዋይዙዋቴ፤ 15 ዓሲ ኪንሢና ዓኣያ ማሃ ባኣዚ'' ዓሲዳፓ ኬስካ ባኣዚ'' ማዓንዳኣፓዓቴም ዙልካፓ ጌላ ባኣዚ'' ዓሲ ኪንሢና ዓኣያ ማሁዋሴ።»*

17 ዬካፓ ዬሱሴ ዴሮ'' ሃሺ'' ኬኤፆ ጌላዛ ዒዛኮ ጊንፆ ሓንታ ናኣታ'' ዬኖ ጌይፄሎኮ ቡሊ''ፆ ኬኤዛንዳጉዲ ዖኦጬኔ። 18 ዒዚያ ዔያቶም ሂዚ ጌዒ ማሄኔ፦ «ዒንሢያ ሃሣ ዬያ ዔሩዋዓዳ? ዙልካፓ ዓሲኮ ዻንጋና ጎጲ ጌላ ባኣዚ'' ዓሲ ኪንሢና ዓኣያ ማሁዋኣሢ ዒንሢም ዔርቱዓዳ? 19 ዓይጎሮ ጌዔቶ ዻንጎና ጎጶ ጌሌዜላ ዙሎ'' ጊንሣ ኬስካኣፓዓቴም ዒና ባንሢ ጌሉዋሴ።» ዬያሮ ዬሱሴ ሙኡዚ'' ቢያ ሙዒንታኒ ዳንዳዓያ ማዔሢ ኬኤዜኔ።

20 ዬሱሴ ላሚ ሂዚ ጌዔኔ፦ «ዓሲ ኪንሢና ዓኣያ ማሃ ባኣዚ'' ዓሲዳፓ ኬስካ ባኣዚ''ኬ፤ 21 ዓሲኮ ጋርሲ ዒናፓ ኬስካ ፑርታ ባኣዚ''፦ ኮይሱዋ ጎይሢና ዞኦስካ ኮኦሚሢ፥ ዉሱሞ፥ ዓሲ ዎዺሢ፥ 22 ዓኒ ሃሣ ማቾ ማዒባኣያና ላሂሢ፥ ታዻቆ ጌዒሢ፥ ፑርቱሞ፥ ጌሺሢ፥ ፔ ሼኔና ሓንቲሢ፥ ቂኢሩሞ፥ ፑሽኪሢ፥ ዖቶርሞ፥ ማሊሢ ባይሱሞኬ። 23 ዓካሪ፡ ዬይ ፑርቶ ባካ ጉቤ ዓሲ ዒኔፓ ኬስኪ ዓሲ ጎማሳኔ።»

24 ዬካፓ ዬሱሴ ዔቂ ፂሮሴ ካታሞ ኮይሎይዳ ዓኣ ጉርዳ ዴንዲ ፔቴ'' ዓሲ ማኣሪ ጌላዖ ዒኢካ ዒ ዓኣሢ ዖኦኒያ ዔሩዋጉዲ ኮዔኔ፤ ጋዓንቴ ዒ ዓኣሺንታኒ ዳንዳዒባኣሴ። 25 ናይስኬና ዒዞኮ ፑርታ ዓያናና ዓርቂንቴ ላኣሊስኬና ዬሱሴ ዒኢካ ዓኣሢ ዋይዚ ዑኬና ሙካዖ ቶካ'' ዒዛኮ ሎኦሜኔ። 26 ላኣሌላ ሶኦሪያ ዓጪዳ ፖኖቄ ጌይንታ ቤስካ ሾይንቴ ጊሪኬ ዜርፃፓ ማዔያኬ፤ ዒዛ ዒዞኮ ናዔሎይዳፓ ፑርቶ ዓያኖ ዬሱሴ ኬሳ''ንዳጉዲ ሺኢቄኔ። 27 ዬሱሴ ጋዓንቴ፦ «ናኣቶ ሙዖ ዔኪ ካናቶም ዒንጊሢ ኮይሱዋሴ፤ ሂንዳ ቤርታዺ ናኣታ'' ሙዒ ሚሽኮንጎ» ዒዞም ጌዔኔ።

28 ዒዛ፦ «ጎኔኬ ጎዳሢዮ፤ ያዺ ማዔቶዋ ካናታ ጎንጎ ዴማ'' ናኣቶይዳፓ ዲኢኔሢ ሙሙዓያቱዓዳ» ጌዒ ዒዛም ማሄኔ።

29 ዬያሮ ዬሱሴ፦ «ዬያ ኔ ጌይፆና ፑርቶ ዓያና'' ኔኤኮ ናዔሎይዳፓ ኬስኬኔ፤ ማኣሪ ማዒ ዓኣዼ» ዒዞም ጌዔኔ።

30 ዒዛ ማኣሪ ማዒ ሙካንቴ ፑርቶ ዓያና'' ናዔሎይዳፓ ኬስኬሢሮ ናዔላ ኮሺ ሻኣሎ''ይዳ ላሂ ዓኣንቴ ዛጌኔ።

31 ዬሱሴ ፂሮሴ ዓጫ''ፓ ኬስካዖ ሲዶና ጌይንታ ዓጮ''ና ታጶ ካታሞ ጌይንታ ዓጮ''ይዴና ጌዒ ጌሊላ ባዞ'' ሙኬኔ። 32 ዒማ''ና ዒኢካ ዒዛ ባንሢ ዋይዚና ዻንጋና ባይቄ ዓሲ ዓሳ ዔኪ ሙካዖ ዬሱሴ ዒዛ ዑፃ ኩጮ ጌሣንዳጉዲ ሺኢቄኔ። 33 ዬሱሴ ዓሶ ባኣካ''ፓ ዓሢ ዱማሲ ኬሳ''ዖ ዓሢኮ ዋዮይዳ ኬኤሎ'' ዳኬኔ፤ ሓሣ ጩቺያ ጩቲ'' ዒዛኮ ዒንዲርዞ ካኣሜኔ። 34 ዬማፓ ዬሱሴ ሌካ ጫሪንጮ ባንሢ ዛጊ፥ ሚጪንቲ «ዪይያ!» ጋዓዖ፦ «ዔፓታ» ጌዔኔ። ዬኖ ጌይፃ «ቡሊ''ንቴ» ጌይሢኬ።

35 ዬማ ጋዓኣና ዓሢኮ ዋዮና ዒንዲርዞና ቡሊ''ንቴም ሜታባኣያ ጌኤሺ'' ጌስቲሢ ዓርቄኔ። 36 ዬሱሴ ዬያ ዖኦማኣ ኬኤዙዋጉዲ ዓሶ ዓይሤኔ፤ ጋዓንቴ ዔያቶም ኬኤዙዋጉዲ ዓይሤሢዳፓ ባሼ ዔያታ ኬኤዜኔ። 37 ዬያ ዋይዜሢ ቢያ ሚርጌና «ሃያጉዴ ባኣዚ''» ጌዒ ዲቃቲ ሄርሺሢና፦ «ጉቤ ባኣዚ'' ኮሺ ማዻኔ፥ ዋያ ባይቄሢ ዋይዛንዳጉዲ፤ ዻንጋ ባይቄሢያ ጌስታንዳጉዲ ማሃኔ» ጌዔኔ።