1 ዬያኮ ጊንፃፓ ዬሱሴ ዓይሁዶ ዓሶኮ ሃውሾ ኬሎ''ና ፔቴ'' ዛርጎ ጎሺ ጊዴና ዓኣዻንቴ ዒዛኮ ጊንፆ ሃንታዞንሢ ናይዺንቴሢሮ ዛርጎ ቲሻሢ ዱኡዚ ዱኡዚ ዔኪ ዻዒሢ ዓርቄኔ። ✝ 2 ፔርሴ ዓሳ ዬያ ዛጋዖ ዬሱሴ ኮራ፦ «ሃኣዛጌ፤ ኔኤኮ ጊንፆ ሃንታዞንሢ ሃውሾ ኬሎ''ና ዓይሢንቲባኣ ባኣዚ'' ማዻኔ!» ጌዔኔ።

3 ዬሱሴ ማሃዖ፦ «ዳውቴና ዒዛና ዎላ'' ዓኣ ዓሳ ናይዺንቴ ዎዶ''ና ዳውቴ ማዼ ባኮ ፔቴ''ታዖ ዒንሢ ናባቢባኣዓዳ? ✝ 4 ዒዚ ዒማ''ና ጌኤዦ ማኣሪ ጌሊ፥ ቄኤሶይዳፓ ዓታዛ ዒዛንታ ዒዛና ዎላ'' ዓኣ ዓሶንታ ሙዓኒ ዳንዳዑዋ ፆኦሲም ዱማዼ ካሦ ሙዔኔ። ✝ 5 ሃሣ ቄኤሳ ሃውሾ ኬሎ''ና ጌኤዦ ማኣሮይዳ ሃውሾ ኬሎ'' ሻቲ ማሂ ማዼቶ ዻቢንቲ ማዒ ፓይዲንቱዋሴ ጌይንቲ ሙሴ ዎጎይዳ ፃኣፒንቴሢ ዒንሢ ናባቢባኣዓዳ? ✝ 6 ጋዓንቴ ጌኤዦ ማኣሮይዳፓ ባሻይ ሃይካ ዓኣኔ፤ ታ ዒንሢም ጋዓኔ። 7 ሃሣ ‹ታኣኒ ኮዓሢ ዓሲ ሚጪንቲሢ ማዓንዳኣፓዓቴም ታኣም ሹኪ ዒንጎ ባኣዚ''ቱዋሴ› ጋዓ ማፃኣፖ ቃኣላ'' ዎዚ ጌይሢታቶዋ ዒንሢ ዔራያታቶ ዻቢንቲባኣ ዓሶ ዑፃ ‹ዔያታ ዻቤኔ› ጌይ ዎጋዓታንቴኬ። ✝ 8 ዓይጎሮ ጌዔቶ ዓሲኮ ናዓሢ ሃውሾ ኬሎ''ኮዋ ጎዳኬ» ጌዔኔ።

9 ዬሱሴ ዬኖ ቤዞይዳፓ ዔቂ ዓይሁዶ ዓሶኮ ቡኪንቶ ቤዞ ጌሌኔ፤ 10 ዒኢካ ፔቴ''፥ ኩቺ ዎቦ ዓሲ ዓኣኔ፤ ዒማ''ና ዬሱሴ ዎጎና ዓይሢሳኒ ኮዓ ፔቴ'' ፔቴ'' ዓሳ፦ «ዓይሁዶ ዓሶኮ ሃውሾ ኬሎ''ና ሃርጊንቴ ዓሶ ፓሣኒ ዓይሢንቴያዳ?» ጌዒ ዖኦጬኔ።

11 ዬሱሴያ ማሃዖ፦ «ዒንሢ ባኣካ''ፓ ፔቴ'' ማራይ ዓኣ ዓሲ ማራዓሢ ሃውሾ ኬሎ''ና ዔቴይዳ ሎኦሜቶ ጎቺ ኬሱ''ዋዓዳ? ✝ 12 ዓካሪ ያዺ ማዔቶ ዓሲ ማራይዳፓ ዎይቲ ባሹዋይ? ዬያሮ ሃውሾ ኬሎ''ና ኮሺ ማዾ ማዺሢ ዓይሢንቴያኬ» ጌዔኔ።

13 ዬካፓ ዬሱሴ ኩጮ ዎቦ ዓሢም፦ «ኩጮ ኔኤኮ ፒሼ!» ጌዔም ዒዚ ፒሻዛ ኩጫ ኮሽኪ ባጎ ኩጮጉዲ ማዔኔ። 14 ፔርሴ ዓሳ ጋዓንቴ ዬካፓ ኬስካዖ ዬሱሴ ዎማይዲ ዔያታ ዎዻንዳቴያ ዎላ'' ዞርቴኔ።

15 ዬማ''ና ዬሱሴ ዔያቶኮ ማሊፆ ዔራዖ ዒኢካፓ ዴንዳዛ፥ ሚርጌ ዴሬ ዒዛ ጊንፆ ዓኣዼኔ፤ ዬያ ዓሶፓ ሃርጊንቴ ዓሶ ቢያ ዒ ፓሤኔ። 16 ዒዛኮ ዖኑሞ ዖኦማኣ ዔያታ ኬኤዙዋጉዲ ዔያቶ ላኣጌኔ፤

17 ዬይ ያዺ ማዔሢ ፆኦሲ ማሊፆ ኬኤዛ ዒሲያሴ ዛሎ''ና፦

18 «ሃይሾ ታ ዶኦሬ፥

ታ ዒዛ ናሽካያ ሃሣ ታና ዎዛሳ

ታኣም ማዻሢዳ

ታ ዓያኖ ዒዛ ዑፃ ታ ማሃንዳኔ፤

ዒዚ ዓሲ ዜርሢም ቢያ

ታኣኮ ፒዜ ዎጊፆ ዔርዛንዳኔ።

19 ዒዚ ማርሚ ዒላታዓኬ፤

ጎይፆይዳኣ ዑኡዞ ዋይዚሳዓኬ።

20 ቱቄ ፒሎ''ዋ ዒ ሜንሣዓኬ፤

ዜኤሮ ታሞዋ ዎዻዓኬ።

ጎኑሞ ባሻንዳያ ሄላ''ንዳኣና

ዬያ ዒ ማዻንዳኔ።

21 ዓሲ ዜርሢያ

ዒዛይዳ ሃጊ ማዓንዳ ዎዛ ጌሣንዳኔ»

ጌይንቴሢ ኩማ''ንዳጉዲኬ። ✝

22 ዬካፓ ፑርታ ዓያና ዓርቄም ዛጋኒና ጌስታኒያ ዳንዳዑዋ ፔቴ'' ዓሲ ዓሳ ዬሱሴ ባንሢ ዔኪ ሙኬኔ። ዬሱሴያ ዒዛ ፖዒሳዛ ዓሢ ዛጋኒና ጌስታኒያ ዳንዳዔኔ። 23 ዒማ''ና ዴራ'' ቢያ ዲቃቲ ሄርሻዖ፦ «ሓይ ዳውቴ ናዓሢ ማዓንዳሞ?» ጌዔኔ።

24 ጋዓንቴ ፔርሴ ዓሳ ዬያ ዛጌ ዎዶ''ና፦ «ሃይ ዓሢ ፑርቶ ዓያኖ ኬሳ''ሢ ፑርቶ ዓያኖ ሱኡጋሢ ቢዔልዛቡሌ ዎልቆና ማዓንዳኣፓዓቴም» ጌዔኔ። ✝

25 ዬሱሴ ዔያቶኮ ማሊፆ ዔራዖ፦ «ፔቴ'' ማዒባኣ ካኣቶ'' ዓጪ ቢያ ላባ''ኔ፤ ዎላ'' ፔቴ'' ማዒባኣ ካታማታቶዋ ማኣሪ ዶዱዋሴ። 26 ፃላሄ ፃላሄ ኬሳ''ያ ማዔቶ ዎሊፓ ዱማዼኔ ጌይሢኬ፤ ያዺ ማዔቶ ካኣቱማ ዎይቲ ዶዳኒ ዳንዳዓይ? 27 ታኣኒ ፑርቶ ዓያኖ ኬሳ''ሢ ዔያቶኮ ሱኡጋሢ ቢዔልዛቡሌና ማዔቶ ዒንሢኮ ናኣታ'' ዓይጎና ፑርቶ ዓያኖ ኬሳ''ይ? ዬያሮ ዒንሢ ናኣታ'' ዒንሢዳ ዎጋንዳኔ። 28 ጋዓንቴ ፑርቶ ዓያኖ ታ ኬሳ''ሢ ፆኦሲ ዓያኖና ማዔቶ ፆኦሲ ካኣቱማ ዒንሢ ኮራ ሙኬኔ ጌይሢኬ» ጌዔኔ።

29 ዬሱሴ ሃሣ፦ «ፔቴ'' ዓሲ ፔቴ'' ዎልቄና ዓኣ ዓሲ ቤርታዺ ቱኩ''ዋዖ ዎልቆና ዓኣ ዓሢ ማኣሪ ጌሊ ዓኣ ባኮ ቡራኒ ዎይቲ ዳንዳዓንዳይ? ዎልቆሲ ቱኬ''ሢኮ ጊንፃ ዒዛኮ ዓኣ ባኮ ቡራኒ ዳንዳዓኔ።

30 «ታ ዓሲ ማዒባኣሢ ቢያ ታና ዒፃኔ፤ ታኣና ዎላ'' ማዒ ዔኤቢ ቡኩሲባኣ ዓሲ ላኣላያ ማዓንዳኔ። ✝ 31 ዬያሮ ዓሲ ማዻ ዓይጎ ዻቢንቲ ማዔቶዋ፥ ጫሺ ቢያ ዒዛም ዓቶም ጌይንታንዳኔ፤ ታ ዒንሢም ጋዓኔ። ዓያና ጌኤሺ ጫሽካ ዓሲም ጋዓንቴ ዻቢንታ ዓቶም ጌይንታዓኬ። 32 ዓሲ ናዓሢ ጫሽካሢም ቢያ ዻቢንታ ዓቶም ጌይንታንዳኔ፤ ዓያና ጌኤሺ ጫሽካሢም ቢያ ጋዓንቴ ሃያ ዓጮ''ይዳ ማዔቶዋ ሃጋኣ ዓጮ''ይዳ ዻቢንታ ዓቶም ጌይንቲንዱዋሴ» ጌዔኔ። ✝

33 ዬሱሴ ሃሣ፦ «ሚሢ ቢያ ዓኣፓፓ ዔርታሢሮ ዒንሢኮ ኮሺ ሚሢ ዓኣቶ ኮሺ ዓኣፒ ዒንሢ ዴንቃንዳኔ፤ ፑርታ ሚሢ ዒንሢኮ ዓኣቶ ጋዓንቴ ፑርታ ዓኣፒ ዒንሢ ዴንቃንዳኔ፤ ✝ 34 ዒንሢ ሃይ ሾኦዦ ናኣታ''! ዒንሢ ፑርታታዖ ኮሺ ባኣዚ'' ኬኤዛኒ ዎይቲ ዳንዳዓይ? ዓይጎሮ ጌዔቶ ዓሲ ኬኤዛ ባካ ዓሢኮ ዒኖይዳፓ ኩሚ'' ኬስኬሢኬ። ✝

35 «ኮሺ ዓሲ ዒና'' ዓኣ ኮሹሞይዳፓ ኮሺ ባኣዚ'' ጌስታኔ፤ ፑርታ ዓሲ ፔኤኮ ዒና'' ዓኣ ፑርቱሞይዳፓ ፑርታ ባኣዚ'' ጌስታኔ። 36 ጋዓንቴ ታ ዒንሢም ጋዓኔ፤ ዓሳ ኮይሱዋ ባኮ ጌስቴሢ ዛሎ'' ቢያ ዓጮ''ይዳ ፆኦሲ ዎጋ ኬሎ''ና ዖኦጪንታንዳኔ። 37 ዬይ ያዺ ማዓዛ ኔ ኮሺ ጌስቴቴ ኮሺ ባኣዚ'' ኔኤም ዎጊንታንዳኔ፤ ኔኤኒ ፑርታ ጌስቴቴ ፑርታ ኔጊዳ ዎጊንታንዳኔ» ጌዔኔ።

38 ዒማ''ና ሙሴ ዎጎ ዔርዛ ዓሶና ፔርሴ ዓሶና ዬሱሴ ኮራ፦ «ዔርዛሢዮ፤ ኔኤኒ ፆኦሲ ዎልቄና ማዺንታ ዓኪ ባኣዚ'' ማዻንቴ ኑ ዛጋኒ ኮዓኔ!» ጌዔኔ። ✝

39 ዒዚ ጋዓንቴ ዔያቶም፦ «ፑርታ ሃሣ ጉሙርቂንቱዋ ሃያ ዎዶ'' ዓሳ ፆኦሲ ዎልቄና ማዺንታ ዓኪ ባኣዚ'' ዛጋኒ ኮዓኔ፤ ጋዓንቴ ፆኦሲ ማሊፆ ኬኤዛሢ፥ ዮናኣሴይዳ ማዺንቴ ዓኮ ባካፓ ዓታዛ ሜሌ'' ፆኦሲ ዎልቄና ማዺንታ ዓኪ ባኣዚ'' ዔያቶም ማዺንታዓኬ። ✝ 40 ዮናኣሴ ዼኤፖ ሞላሢ ጎጳ ሃይሦ ኬሊ'' ዋንቴና ሮኦሪና ዴዔሢጉዲ ዓሲኮ ናዓሢ ዱኡፒዳ ሃይሦ ኬሊ'' ሮኦሪና ዋንቴና ዴዓንዳኔ። ✝ 41 ኔኔዌ ካታሞ ዓሳ ዓጮ''ይዳ ፆኦሲ ዎጋ ኬሎ''ና ሃያ ዎዶ'' ዓሶይዳ ዎጋያ ማዓንዳኔ፤ ዓይጎሮ ጌዔቶ ኔኔዌ ዓሳ ዮናኣሴ ኬኤዜሢ ዋይዜ ዎዶ''ና ዻቢንቶ ዔሪ፥ ጎሞዋ ቡኡፄሢሮኬ። ያዺ ማዔቶዋ ሃሢ ዮናኣሴይዳፓ ባሼ ሃይካ ዓኣኔ። ✝ 42 ዓጮ''ይዳ ፆኦሲ ዎጋ ኬሎ''ና ሳኣባ ዓጮ'' ካኣቴላ ሃያ ዓሶ ዑፃ ዎጋንዳኔ፤ ዓይጎሮ ጌዔቶ ዒዛ ካኣቲ ሴሎሞኔኮ ዔራቶ ዋይዚ ዓጪ ዙልካፓ ሙኬያታሢሮኬ፤ ያዺ ማዔቶዋ ሴሎሞኔይዳፓ ባሼ ሃይካ ዓኣኔ» ጌዔኔ። ✝

43 ዬሱሴ ሃሣ፦ «ፑርታ ዓያና ዓሲዳፓ ኬስኬ ዎዶ''ና ጌላንዳ ቤሲ ኮይ ኮይ ዋኣሢባኣ፥ ዓሲ ናንጉዋ ዳውሎ''ይዳ ሃንታኔ። ጋዓንቴ ጌሎንዶ ቤሲ ዴንቁዋሴ፤ 44 ዬያሮ ‹ታ ኬስኬ ማኣሮ ማዒ ዓኣዻንዳኔ› ጋዓኔ። ማዒ ዒ ሙካ ዎዶ''ና ኬኤፃ ጉሪ ማዒ፥ ጌኤሽኪ፥ ጊኢጊ ዓኣንቴ ዴንቃኔ። 45 ዬካፓ ፑርቶ ዓያና''ሢ ዓኣዺ ዒዛይዳፓ ባሼ ፑርታ ሜሌ'' ላንካይ ፑርታ ዓያና ቡኩሲ ዔኪ ሙኪ ዒዚ ቤርታ ዓኣ ዓሢዳ ጌሊ ዎላ'' ናንጋኔ፤ ዬያሮ ዬያ ዓሢኮ ጋፒንፆ ናንጋ ቤርታኣስካፓ ባሼ ፑርታ ማዓኔ። ሃያ ዎዶ'' ፑርቶ ዓሶ ዑፃ ማዓንዳ ባካ ዬያ ማላ ባኣዚ''ኬ» ጌዔኔ።

46 ዬሱሴ ዴሮ''ም ኬኤዛ ጎይሣ ዓኣንቴ ዒዛኮ ዒንዶና ጌርሲንሢና ዒዛና ጌስታኒ ኮዒ ካራ'' ሙኪ ዔቄኔ፤ 47 ዒማ''ና ዒኢካ ዓኣ ዓሶይዳፓ ፔቴ''ስኬይ ዬሱሴ ኮሮይዳ፦ «ሃይሾ ኔኤኮ ዒንዶና ጌርሲንሢና ኔና ኮዒ ካራ'' ዔቂ ዓኣኔ» ጌዔኔ።*

48 ዬሱሴ ጋዓንቴ፦ «ዒንዳ ታኣኮ ዖናዳይ? ጌርሲንሢያ ዖናንሢዳይ?» ጌዒ ማሄኔ። 49 ዬያ ጌዔስካፓ ኩጮና ዒዛኮ ጊንፆ ሃንታ ናኣቶ'' ባንሢ ዻዊ ዻዊ፦ «ታኣኮ ዒንዶና ጌርሲንሢና ሃይሾ ሃኣቶኬ፤ 50 ጫሪንጮይዳ ዓኣ፥ ታ ዓዳሢ ዓይሢፆ ኩንሣዞንሢ ቢያ ታኣኮ ጌርሲንታ ጌሮንታ ዒንዶንታ ዬያቶኬ» ጌዔኔ።