1 ላሆ'' ኬሊ''ኮ ጊንፃፓ ዬሱሴ ጴፂሮሴና ያይቆኦቤና ሃሣ ያይቆኦቤኮ ጌርሲ ዮሓኒሴና ሌሊ ዔኪ ዼኤፒ ዹካ ኬስኬኔ። ✝ 2 ዬካ ዔያቶኮ ቤርታ ዒ ላኣሚንታዖ ዓኣፖ ካራ'' ዒዛኮ ዓቢጉዲ ፖዔኔ፤ ሃሣ ዒዛኮ ማኣዓሢያ ዓኣፓ ዱካያ ማዒ ቦኦሬኔ። 3 ዬማ''ና ሙሴንታ ዔኤሊያሴንታ ዬሱሴና ዎላ'' ጌስታንቴ ዔያታ ዴንቄኔ። 4 ጴፂሮሴ ዬሱሴ ኮራ፦ «ጎዳሢዮ! ሃይካ ኑ ናንጌቴ ኮሺኬ፤ ኔ ናሽኬቶ ፔቴ'' ኔኤም፥ ፔቴ'' ሙሴም፥ ፔቴ'' ሃሣ ዔኤሊያሴም ሃይሦ ዉዲ ታ ማዦም» ጌዔኔ።

5 ዒ ኬኤዛ ጎይሣ ዓኣንቴ ቦኦሬ ሻኣሬ ሙኪ ዔያቶ ባይዜኔ፤ ዬያ ሻኣሮ ባኣካ''ፓ፦ «ታ ዒዛና ዎዛዻ፥ ታ ናሽካ ናዓሢ ሃያኬ፤ ዒዛሲ ዋይዙዋቴ» ጋዓ ዑኡሲ ዋይዚንቴኔ። ✝

6 ዒማ''ና ዒዛና ዎላ'' ዓኣ ዬሱሴኮ ጊንፆ ሃንታዞንሢ ዬያ ዋይዜ ዎዶ''ና ዲቃቲ ሳዖይዳ ባሊቲና ሎኦሜኔ። 7 ዬሱሴ ሙኪ ዔያቶ ኩጮና ዓርቃዖ፦ «ዒጊጪፖቴ፥ ዔቁዋቴ» ጌዔኔ። 8 ዬካፓ ዔያታ ዼ’ግ ጌዒ ዛጋንቴ ዬሱሴይዳፓ ዓታዛ ሜሌ'' ዖኦኒያ ባኣሴ።

9 ዹካ''ፓ ዔያታ ኬዲፆይዳ ዓኣንቴ ዬሱሴ ዔያቶም፦ «ዓሲኮ ናዓሢ ሃይቂ ሃይባ''ፓ ዔቃንዳያ ሄላ''ንዳኣና ዒንሢ ዛጌ ባኮ ዖኦማኣ ኬኤዚፖቴ» ጌዔኔ።

10 ዒዛኮ ጊንፆ ሃንታዞንሢ፦ «ዓካሪ፥ ሙሴ ዎጎ ዔርዛዞንሢ ዔኤሊያሴ ቤርታዺ ሙካንዳያ ኮይሳኔ ጋዓሢ ዓይጎሮዳዖ?» ጌዒ ዒዛ ዖኦጬኔ። ✝

11 ዒዚ ዔያቶም ማሃዖ፦ «ዔኤሊያሴ ጎኔ ሙኪ ቢያ ባኣዚ'' ጊኢጊሻንዳኔ፤ 12 ጋዓንቴ ታ ዒንሢም ሂዚ ጋዓኔ፦ ዔኤሊያሴ ሙኪናኣኮኬ፤ ማዔቶዋ ዔያታ ኮዔ ባኣዚ'' ዒዛይዳ ማዼያፓዓቴም ዒዛ ዔሪባኣሴ። ዬያጉዲ ሃሣ ዓሲኮ ናዓሢ ዔያታ ሜታሳንዳኔ» ጌዔኔ። ✝

13 ዬማ''ና ዒዛና ዓኣ ጊንፆ ሃንታዞንሢ ዬሱሴ ዔያቶም ኬኤዜሢ' ማስካ ዮሓኒሴ ዛሎ'' ማዔሢ ዔሬኔ።

14 ዬሱሴና ሃይሦ ዒዛኮ ጊንፆ ሃንታዞንሢና ዴሮ'' ባንሢ ማዒ ሙካዛ ፔቴ'' ዓሲ ዬሱሴኮ ቤርታ ሙኪ ጉምዓታዖ፦ 15 «ታ ጎዳሢዮ! ታኣኮ ናዓሢ ዓውሴ፤ ዴንሣ ፑርታ ዓያና ዶርዓ ዒዛ ሜታሳኔ፤ ሚርጌ ዎዴ ታሚዳ ሎኦማኔ፤ ሃሣ ዋኣሢዳኣ ጌላኔ። 16 ኔኤኮ ጊንፆ ሃንታዞንሢ ኮራ ታ ዔኪ ሙኬንቴ ዔያታ ዒዛ ዓውሳኒ ዳንዳዒባኣሴ» ጌዔኔ።

17 ዬሱሴ፦ «ሓይ ዒንሢ ጉሙርቁዋ ዎቦ ዓሳ! ዓይዴ ሄላ''ንዳኣና ታ ዒንሢና ናንጋንዳይ? ሃሣ ዓይዲ ሄላ''ንዳኣና ታ ዒንሢ ጊቢ'' ዳንዳዓንዳይ? ሂንዳ ናዓሢ ታኣም ዔኪ ዬዑዋቴ!» ጌዔኔ። 18 ዬካፓ ዬሱሴ ፑርቶ ዓያናሢ ጎራ''ዛ፥ ፑርቶ ዓያናሢ ናዓሢዳፓ ኬስኬም ናዓሢ ዬማፓ ዓርቃዖ ዻቄኔ።

19 ዬካፓ ዒዛኮ ጊንፆ ሃንታ ናኣታ'' ፔኤሮ ዬሱሴ ኮይላ'' ሙካዖ፦ «ኑኡኒ ፑርቶ ዓያኖ ኬሳ''ኒ ዳንዳዒባኣሢ ዓይጎሮዳይ?» ጌይ ዖኦጬኔ።

20 ዬሱሴ ማሃዖ፦ «ጉሙርቂፃ ዒንሢኮ ዻኬሢሮኬ፤ ጎኔ ታ ዒንሢም ጋዓኔ፤ ሴናፒጬ ጌይንታ ባኮማ ዓኣፖ ጉዴያታዖ ጉሙርቂሢ ዒንሢኮ ዓኣቶ ሃያ ዹኮ'' ‹ሃካፓ ሺኢኬ› ጌዔቶ ዒንሢም ዓኣዻንዳኔ፤ ዒንሢ ባሻንዳ ባኣዚ'' ፔቴ''ታዖ ባኣሴ። ✝ [ 21 ሓያ ጉዴሢ ሙኡዚ'' ሃሺ'' ሺኢቆ ሺኢጲሢና ማዒባኣቶ ኬስኩዋሴ» ጌዔኔ።]

22 ጌሊላይዳ ዒዛኮ ጊንፆ ሃንታዞንሢ ቡኪንቲ ዓኣንቴ ዬሱሴ ዔያቶም፦ «ዓሲኮ ናዓሢ ዓሶም ዓኣሢንቲ ዒንጊንታንዳኔ፤ 23 ዔያታኣ ዒዛ ዎዻንዳኔ፤ ዒዚያ ሃይባ''ፓ ሃይሣሳ ኬሎ''ና ዔቃንዳኔ» ጌዔሢሮ ዒዛኮ ጊንፆ ሃንታ ናኣታ'' ሚርጌና ዖዬኔ።

24 ዬሱሴና ዒዛኮ ጊንፆ ሃንታዞንሢና ቂፒርናሆሜ ጎዖ ዓጮ'' ሄላ''ዛ ጌኤዦ ማኣሮኮ ጊኢሮ ጪጊሳ ዓሳ ጴፂሮሴ ኮይላ'' ሙካዖ፦ «ዒንሢኮ ዔርዛሢ ጌኤዦ ማኣሮም ጪጎ ሚኢሾ ጪጋ?» ጌዒ ዖኦጬኔ። ✝

25 ጴፂሮሴ፦ «ሂዮ፤ ጪጋኔ» ጌዔኔ።

ዬካፓ ጴፂሮሴ ጋሮ ጌላዛ ዬሱሴ ቤርታዺ ሲሞኦኔ ኮራ፦ «ዓጮ'' ካኣታ'' ጊኢሮ ሚኢሾንታ ኮርሞ ዓሶፓ ዔኮ ሚኢሾ ዔካሢ ዓጮ'' ዓሶይዳፓሞ? ዙሎ'' ዓሶይዳፓዳይ?» ጌዒ ዖኦጬኔ።

26 ጴፂሮሴ ማሃዖ፦ «ዙሎ'' ዓሶይዳፓኬ» ጌዔኔ።

ዬያሮ ዬሱሴ፦ «ሂዴቶ ዓጮ'' ዓሳ ጊኢራ ጪጉዋሴ ጌይሢኬ! 27 ዓካሪ ኑና ዔያታ ቆፁዋጉዲ ዴንዲ ሞላሢ ዓርቆ ዓንጎ ኪሮ ባዛ'' ዓጌ፤ ዬካፓ ቤርታዺ ኔ ዓርቄ ሞሎማ ሹካዖ ዻንጋፓ ኔ ዔካንዳ ሹጮ ቢሮ'' ታኣና ኔኤናና ዛሎ'' ጪጌ» ጌዔኔ።