ማቲዎሴ 4

ቤርታሳ ዬሱሴ ጊንፆ ሃንታዞንሢኮ ዔኤሊ''ንቲፆ

18 ዬሱሴ ጌሊላ ባዞ'' ኮይሊ''ና ዓኣዻዖ፥ ላምዖ ዎሊኮ ጌርሲ ማዔስኬንሢ ዴንቄኔ፤ ዔያታ ጴፂሮሴ ጌይንታ ሲሞኦኔና ጌርሲ ዒንዲራሴና ማዓዛ ዔያታ ሞሎ ዓርቃያታሢሮ ሞላሢ ዓርቆ ሮኦጮጉዴ ሱዞ ባዞ''ይዳ ዓጋኔ። 19 ዬሱሴ ዔያቶም፦ «ሃኒ ታ ጊንፆ ሙኩዋቴ፤ ታ ዒንሢ፥ ዓሲ ፒሪ ዓርቃያ ማሃንዳኔ» ጌዔኔ። 20 ዔያታ ቤዞማና ሞላሢ ዓርቆ ሱዞ ሃሺ''፥ ዒዛ ጊንፆ ዓኣዼኔ።

21 ዬማፓ ዻካ'' ዶጫዖ ሃሣ ላምዖ ዎሊኮ ጌርሲንሢ ማዓያ፥ ዜብዲዮሴ ናይ፥ ያይቆኦቤና ዮሓኒሴና ዴንቄኔ። ዔያታ ፔኤኮ ዓዶ ዜብዲዮሴና ዎላ'' ዋኣፆና ፒንቆ ጎንጎይዳ ሞላሢ ዓርቆ ሱዞ ኮሻ''ንቴ ዬሱሴ ዔያቶ ዔኤሌ''ኔ። 22 ዔያታኣ ቤዞማና ዋኣፆና ፒንቆ ጎንጎንታ ዓዶንታ ሃሺ''፥ ዒዛ ጊንፆ ዓኣዼኔ።