1 ሂንዳ ታ ሓሣ ሂዚ ጎዖም፤ ፆኦሲ ፔ ዴሮ'' ሃሺ''ያ? ፔቴ''ታዖ ሃሺ''ባኣሴ! ታኣኒ ታ ቶኦኪና ዓብራሃሜ ዜርፃፓ ሓሣ ቢኢኒያሜ ማኣራፓ ማዔያ ዒስራዔኤሌ ዓሲኬ። ✝ 2 ዬያሮ ፆኦሲ ቤርታዺ ዶኦሬ ዴሮ'' ሓሺ''ባኣሴ፤ ጌኤዦ ማፃኣፓ ዔኤሊያሴ ዛሎ'' ዎዚ ጌዔቴያ ዒንሢ ጶቂሡዋዓዳ? ሓሣ ዒስራዔኤሌ ዴራ'' ማዼ ባኮ ዎዚ ጌዒ ፆኦሲም ዒዚ ፑሽኬቴያ ዒንሢ ዔሩዋዓዳ? 3 ዒማ''ና ዔኤሊያሴ፦ «ጎዳሢዮ! ኔ ማሊፆ ኬኤዛዞንሢ ዔያታ ዎዼኔ፤ ኔኤም ዒንጎ ባኮ ዒንጊ ካኣሽኮ ቤዞዋ ሻሄም ታኣኒ ሌሊ ዓቴ''ኔ፤ ታናኣ ሓሣ ዔያታ ዎዻኒ ኮዓኔ» ጌዔኔ። ✝ 4 ጋዓንቴ ፆኦሲ ዒዛም ማሃዖ፦ «ጎኔ ፆኦሲ ማዒባኣ፥ ባዓኣሌ ጎዖ ፆኦዞ ካኣሽኪባኣ ላንካይ ሺያ ዓሲ ታኣኮ ዓኣኔ» ጌዔኔ። ✝ 5 ሓሢ ማዔቴያ ፆኦሲኮ ኮሹሞ ዒንጊፆና ዶኦሪንቴ ዻካ'' ዒስራዔኤሌ ዓሲ ዓኣኔ። 6 ፆኦሲኮ ዶኦሪፃ ኮሹሞ ዒንጊፆና ማዔቶ ማዾናቱዋሴ ጌይሢኬ፤ ዎንዴ ማዾና ማዔቴ ፆኦሲኮ ኮሹሞ ዒንጊፃ ኮሹሞ ዒንጊሢ ማዒንዱዋያታንቴኬ።

7 ዓካሪ ጋፒንፃ ዓይጎ ማዔይ? ዒስራዔኤሌ ዓሳ ዔያታ ኮዔ ባኮ ዴንቂባኣሴ፤ ዔያቶይዳፓ ዶኦሪንቴዞንሢ ጋዓንቴ ኮዔ ባኮ ዴንቄኔ፤ ዓቴ'' ዓሳ ጎኑሞ ዔራኒ ዳንዳዒባኣሴ። 8 ዬይያ ያዺ ማዔሢ፦

«ፆኦሲ ዒኖ'' ዔያቶኮ ዶጪሴኔ፤

ዬያሮ ሃኖ'' ሄላ''ንዳኣና

ዓኣፓ ዔያቶኮ ዴንቁዋሴ፤

ዋያኣ ዔያቶኮ ዋይዙዋሴ»

ጌይንቲ ፃኣፒንቴሢሮኬ። ✝ 9 ዳውቴ ሓሣ፦

«ዔያታ ሙዓኒ ቡካ ቤዛ ዓርቃ ፒሮ፤

ሓሣ ሎንሣ ዔቴ ማዒ ዔያቶ ሜታሶንጎ!

10 ዓኣፓ ዔያቶኮ ዴንቁዋጉዲ ዹሞንጎ፤

ጊኢራኣ ዔያቶኮ ሜቶና ቢያ ኬሊ'' ዎቦንጎ» ጌዔኔ። ✝

11 ሂንዳ ላሚ ታ ሓሣ ሂዚ ጎዖም፤ ዓይሁዶ ዓሳ ዻቢንቴሢ ናንጊና ባይቃንዳጉዲዳ? ያዺቱዋሴ! ዓይሁዶ ዓሶ ዻቢንቶ ዛሎ''ና ዓይሁዴ ማዒባኣ ዓሳ ዻቂንታ ዴንቄኔ፤ ዬይ ያዺ ማዔሢ ዔያታ ዓይሁዴ ማዒባኣ ዓሳ፦ «ዎይቲ ዔያታ ኑጉዲ ማዔይ?» ጋዓንዳጉዲኬ። 12 ዓይሁዶ ዓሶኮ ዻቢንታ ዓጮ''ም ሚርጌ ዓንጆ ጴዺሴኔ፤ ሓሣ ዔያቶኮ ባሊቲባኣያ ማዒፃ ዓይሁዴ ማዒባኣ ዓሶም ዓንጆ ማዔኔ፤ ዎንዴ ዓይሁዶ ዓሳ ቢያ ዻቄያ ማዔቴ ዓንጃ ዎዚ ሚርጋንዳንቴዳይ?

13 ሓሢ ሓያ ታ ኬኤዛሢ ዒንሢ፥ ዓይሁዴ ማዒባኣ ዓሶምኬ፤ ዒንሢ፥ ዓይሁዴ ማዒባኣ ዓሶም ታ ኬኤዛንዳጉዲ ዳኪንቴሢሮ ታ ማዻ ማዾ''ና ዎዛዻኔ። 14 ሓያ ታ ማዻሢ ታ ፃጶ ማዔ ዓይሁዴ ዓሶ፦ «ዔያታ ዎይቲ ኑጉዲ ማዔይ?» ጌይሳኒኬ፤ ዬያይዲፆና ጎዖንቴ ዔያቶይዳፓ ፔቴ'' ፔቴ''ዞንሢ ታ ዻቂሻንዳያ ናንዳኔ። 15 ፆኦሲ ዔያቶ ሃሼ''ሢሮ ሜሌ'' ዓሳ ፆኦሲና ቡካያ ማዔቴ ፆኦሲ ዔያቶ ፔ ዓሲ ማሂ ዔካ ዎዶ''ና ዎዎይታንዳያ ዒንሢም ማላይ? ዬይ ሓይቢዳፓ ዔቂሢጉዴያኬ!

16 ፔቴ'' ቆኦሮ ሙኑቃኮ ካራ''ፓ ዔኪ ፆኦሲም ዱማዼያ ማሆናቴ ሙኑቃ ጉቤ ፆኦሲም ዱማዼያ ማዓኔ። ዬያጉዲ ሃሣ ፔቴ'' ሚሢኮ ፃጳ ፆኦሲም ዱማዼያ ማዔቴ ካኣፓኣ ዱማዼያ ማዓኔ።

17 ማኣሮ ካራ'' ቱኮ''ና ሪሚቶ ሚፆኮ ካኣፖ ማዔ ዓይሁዶ ዓሳ ሜቂ ኬዴ'' ቤዛ ጌሦና፥ ካዮ ሪሚቶ ካኣፖጉዲ ማዔ፥ ዒንሢ ዓይሁዴ ማዒባኣ ዓሳ ዔያቶም ዒንጊንታ ዓንጆ ዒንሢያ ዴንቃያ ማዔኔ። 18 ዬያሮ ዒንሢ ዓይሁዴ ማዒባኣ ዓሳ ሜቂ ኬዴ'' ካኣፖ፥ ዓይሁዶ ዓሶይዳ ዖቶርቂፖቴ፤ ዒንሢ ካኣፒ ሌሊ ማዔሢሮ ፃጳ ዒንሢ ኬዲ ዓርቄኔ፤ ዒንሢ ፃጶ ኬዲ ዓርቂባኣሢሮ ሄርሺንታንዳያ ዒንሢም ኮይሱዋሴ።

19 ጋዓንቴ፦ «ካኣፓ ሜቂ ኬዴ''ሢ ኑኡኒ ዔያቶ ቤዛ ጌላንዳጉዲ ጌይኬ» ዒንሢ ጋዓንዳኣናንዳኔ። 20 ያዺ ዒንሢ ጋዓኒ ጎኔኬ፤ ጋዓንቴ ዔያታ ሜቂ ኬዴ''ሢ ኪሪስቶሴ ጉሙርቁዋዖ ዓቲፆና ማዓዛ ዒንሢ ዶዲ ዒኢካ ዴዔሢ ኪሪስቶሴ ጉሙርቂፆናኬ፤ ያዺ ማዔሢሮ ዒዒጊጫንዳፓዓቴም ዖቶርሙሞ ዒንሢ ኮይሱዋሴ። 21 ዓይጎሮ ጌዔቴ ፆኦሲ ቤርታ ማዢንቶ ካኣፖ ማዔ፥ ዓይሁዶ ዓሶም ሚጪንቲባኣያ ማዔቴ ዒንሢማኣ ሚጪንታዓኬ። 22 ዓካሪ ፆኦሲኮ ሚጪንቶና ሚጪንቶ ዒፂፆና ዛጉዋቴ፤ ሚጪንቶ ዒፂፃ ዒዛኮ ሜቂ ኬዴ''ዞንሢም ማዓዛ፥ ሚጪንቶ ዒ ዒንሢ ሚጪንታኔ፤ ዬያ ዒ ማዻንዳሢ' ዒዛ ጉሙርቂፆና ዶዲ ዒንሢ ናንጌቴኬ፤ ዶዲባኣቴ ጋዓንቴ ዒንሢያ ሜቂ ኬዳ''ንዳኔ። 23 ዓይሁዶ ዓሳ ኪሪስቶሴ ጉሙርቂፆ ዒፂፆ ሃሺ'' ማዔቴ ቤርታ ዔያታ ዓኣ ቤዞ ማማዓንዳኔ፤ ዎይቲ ጌዔቴ ፆኦሲ ዔያቶ ቤርታ ዓኣ ቤዞ ማሃኒ ዳንዳዓኔ። 24 ዒንሢ፥ ዓይሁዴ ማዒባኣ ዓሳ፤ ዒንሢ ካዮ ሪሚቶ ካኣፖ ማዒ ዓኣያታዖ ዒንሢኮ ቤዞ ማዒባኣ፥ ቱኮ''ና ሪሚቶ ሚፆይዳ ዓይሢንታኒ ዳንዳዔቴ ቱኮ''ና ሪሚቶ ካኣፖ ማዔ ዓይሁዶ ዓሳ ቤርታ ዔያታ ዓኣ ቤዞ ማዓኒ ዎይቲ ዔያቶም ዳንዳዒንቲንዱዋይ!

25 ታ ዒሾንሦ! ታ ሚሾንሦ! «ኑ ዔራኬ» ጌይ ሄርሺንቲፖቴ፤ ፔቴ'' ዓኣሺንቴ ባኣዚ'' ታ ዒንሢም ኬኤዛንዳኔ፤ ዬና ዓይጎዳይ ጌዔቴ ዒስራዔኤሌ ዓሶኮ ጉሙርቆ ዒፂፃ ጋፒንሢ ሄላ''ንዳኣናቱዋንቴ ዔኤሊ''ንቴ፥ ዓይሁዴ ማዒባኣ ዓሳ ቢያ ፆኦሲ ባንሢ ሙካንዳያ ሄላ''ንዳኣናኬ። 26 ዓካሪ፤ ዒስራዔኤሌ ዓሳ ቢያ ዻቃንዳሢ፦

«ዻቂሻሢ ፂዮኔፓ ኬስካንዳኔ፤

ያይቆኦቤ ዜርፆኮ ጎሞ ባይዛንዳኔ፤ ✝

27 ጎሞ ታ ዔያቶኮ ባይዛ ዎዶ''ና

ዔያቶና ዎላ'' ታ ጫኣቃንዳ ጫኣቁማ ያዺኬ»

ጌይንቲ ፃኣፒንቴ ጎይፆናኬ። ✝

28 ዒስራዔኤሌ ዓሳ ኮዦ ሓይሶ ዋይዜዖ ዔኮ ዒፂፆና ዒንሢ ዓይሁዴ ማዒባኣ ዓሶም ዻቂንታ ማዓንዳጉዲ ፆኦሲኮ ዔያታ ሞርኬ ማዔኔ። ጋዓንቴ ዶኦሪንቲፆ ዛሎ''ታቴ ዔያታ ዓዶንሢ ዛሎ''ና ፆኦሲኮ ዒጊኖኬ። 29 ፆኦሲ ዶኦሪ ሓሣ ኮሹሞ ዒንጊፆዋ ዒንጌሢኮ ጊንፃ ዒ ማዼ ማዾ''ና «ዓይጋ ታ ሂዴይ!» ጌይ ማሉዋሴ። 30 ዒንሢ፥ ዓይሁዴ ማዒባኣ ዓሳ ቤርታ ፆኦሲም ዓይሢንቱዋያኬ፤ ሓሢ ጋዓንቴ ዓይሁዴ ዓሳ ዓይሢንቲባኣ ዛሎ''ና ፆኦሲ ማኣሪፆ ዒንሢ ዴንቄኔ። 31 ፆኦሲ ዒንሢ ማኣሬሢ ዔያታ ዛጋዖ ፆኦሲም ዓይሢንቱዋያ ማዔኔ፤ ጋፒንፃ ጋዓንቴ ዒንሢ ማኣሬ ጎይፆ ዔያቶዋ ማኣራንዳኔ። 32 ዓይጎሮ ጌዔቴ ፆኦሲ ዓሲ ቢያ ማኣራኒ ጋዓዖ፥ ዓሲ ቢያ «ዓይሢንቱዋያኬ» ጌይ ሃሼኔ፤

33 ፆኦሲኮ ኮሹሞና ሃኣማቶና ሃሣ ዔራቶና

ዖኦኒያ ዔሩዋያኬ!

ዒ ዎጋ ዎጊፃ «ዎዚምዳይ?» ጌይንቱዋያኬ፤

ዒ ማዻ ጎይፃኣ ዔርቱዋያኬ! ✝

34 ፆኦሲ ማሊሢ ዔራይ ዖኦኒያ ባኣሴ፤

ዒዛ ዞራ ዓሲያ ባኣሴ፤

35 ታልዖ ማሃንዳጉዲ፥

ዒዛም ታልዔ ዓሲያ ባኣሴ። ✝

36 ዎይቲ ጌዔቴ ቢያ ባኮ ማዤሢ ዒዛኬ፤ ቢያ ባኮ ናንጊሻሢያ ዒዛኬ፥ ዒዛም ናንጋያኬ፤ ናንጊና ቦንቾ ዒዛም ማዖንጎ፤ ዓኣሜን። ✝