1 ኑኡኒ ኪሪስቶሴ ጉሙርቂፆና ዶዲ ማዔ ዓሳ ጉሙርቂፆና ላቤ'' ዓሶኮ ላቢ''ፆ ዔሪ ማኣዳ''ያ ማዓንዳኣፓዓቴም ኑና ኑ ዎዛሳያ ማዓኒ ኮይሱዋሴ፤ 2 ኑኡኒ ፔቴ'' ፔቴ''ሢ ሜሌ''ሢ ፆኦሲ ጉሙርቂፆና ዶዳንዳጉዲ ሜሌ'' ዓሢ ማኣዳ''ኒ ዒዛ ዎዛሳ ባኣዚ'' ኑ ማዾም። 3 ዓይጎሮ ጌዔቴ ኪሪስቶሴ ፔና ዎዛሲባኣሴ፤ ጋዓንቴ «ኔና ጫሽኮና ጫዣ ታና ሄሌ''ኔ» ጌይንቲ ፃኣፒንቴሢ ዒዛይዳ ማዔኔ። ✝ 4 ጌኤዦ ማፃኣፓፓ ኑ ዴንቃ ጊቢ'' ዳንዳዒፆና ዶዲፆና ሃጊ ማዓንዳ ዎዛ ኑኡኮ ዓኣያ ኑና ማሃንዳጉዲ ቤርታዺ ፃኣፒንቴ ባካ ቢያ ዔራቶ ኑ ዴንቃንዳጉዲ ኑም ፃኣፒንቴኔ። 5 ዒንሢ ዬሱስ ኪሪስቶሴ ጊንፆ ሃንታዞንሢ ማዔሢሮ ጊቢ'' ዳንዳዓሢና ዶዲሢና ዒንጋ፥ ጎዳ ፔቱሞ ዓያና ዒንሢም ዒንጎንጎ። 6 ዬይ ኑ ጎዳ ዬሱስ ኪሪስቶሴኮ ዓዶ ማዔ ፆኦዛሢ* ፔቴ'' ዒናና ፔቴ'' ዑኡሲና ዒንሢ ዒዛ ቦንቻንዳጉዲ ማሆንጎ።

7 ኪሪስቶሴ ዒንሢ ቦንቺ ዔኬሢጉዲ ዒንሢያ ዎሊ ፆኦሲ ቦንቾም ጌዒ ቦንቹዋቴ። 8 ሓይ ታ ኬኤዛሢ ቤርታ ኑ ዓዶንሢም ዒንጊንቴ ሃጊ ማዓንዳ ዎዛ'' ኩማንዳጉዲና ፆኦሲኮዋ ጉሙርቂንቲፃ ዔርታንዳጉዲ ኪሪስቶሴ ዓይሁዴ ማዒባኣ ዓሶም ማዻያ ማዔኔ ጌይኬ። 9 ኪሪስቶሴ ዓይሁዴ ማዒባኣ ዓሶም ማዻያ ማዔ ሜሌ'' ጎይፃ ዓይሁዴ ማዒባኣ ዓሳ ፆኦሲኮ ማኣሪፆ ዛሎ'' ጋላታንዳጉዲኬ፤ ዬይያ፦

«ዓይሁዴ ማዒባኣ ዓሶ ባኣካ'' ታ ኔና ጋላታኔ፤

ኔ ሱንፆዋ ዓይኑሞና ታ ጋላታኔ»

ጌይንቲ ፃኣፒንቴሢጉዲኬ። ✝ 10 ሓሣ፦

«ዒንሢ ዓይሁዴ ማዒባኣ ዓሳ

ፆኦሲ ዶኦሬ ዴሮ''ና ዎላ'' ዎዛዹዋቴ»

ጌይንቲ ፃኣፒንቴኔ። ✝

11 ላሚ ሃሣ፦

«ዓይሁዴ ማዒባኣ ዓሳ ቢያ ፆኦሲ ጋላቱዋቴ፤

ዴራ''ኣ ቢያ ፆኦሲ ጋላቱዋቴ»

ጌይንቲ ፃኣፒንቴኔ። ✝

12 ዬያጉዲ ዒሲያሴ፦

«ዴሮ'' ቢያ ዑፃ ካኣታዻንዳያ

ዒሴዬ ዜርፃፓ ሾይንታንዳኔ፤

ዒዛይዳ ዓይሁዴ ማዒባኣ ዓሳ

ሃጊ ማዓንዳ ዎዛ ጌሣንዳኔ»

ጌዔኔ። ✝ 13 ዒንሢኮ ሃጊ ማዓንዳ ዎዛ'' ዓያኖ ጌኤዦ ዎልቆና ዲጪ ዲጪ ዓኣዻንዳጉዲ ሃጊ ማዓንዳ ዎዞ ዒንጋ፥ ጎዳ ዒንሢ ጉሙርቄሢሮ ዎዛና ኮሹሞና ሚርጊሺ ዒንሢም ዒንጎም።

14 ታ ዒሾንሦ! ታ ሚሾንሦ! ሚርጌና ዒንሢ ኮሺ ማዔሢ ሃሣ ሚርጌና ዒንሢ ዔራያ ማዔሢና ፔቴ'' ፔቴ''ሢ ሜሌ''ሢ ዞራኒ ዳንዳዓያ ማዔሢ ጎኔና ታ ዔሬኔ። 15 ፔቴ'' ፔቴ'' ባኣዚ'' ታ ዒንሢም ጶቂሣኒ ኮዒ ሃያ ኪኢቶ'' ጫርቂ ታ ዒንሢም ፃኣፔሢ' ፆኦሲ ታኣም ፔ ኮሹሞና ዒንጌ ጎይፆናኬ። 16 ዬይ ኮሹሞ ዒንጊፃ ታኣም ዒንጊንቴሢ ፆኦሲኮ ኮዦ ሓይሶ ዓይሁዴ ማዒባኣ ዓሶም ቄኤሴ ማዒ ኬኤዚ፥ ዬሱስ ኪሪስቶሴም ማዻንዳጉዲኬ፤ ዬያሮ ዓይሁዴ ማዒባኣ ዓሳ ዓያና ጌኤሺና ፆኦሲም ዱማዼያ ሃሣ ፆኦሲ ዎዛሳያ ማዓ ፆኦሲም ዒንጎ ባኣዚ'' ማዒ ዒንጊንታንዳጉዲ ታ ማዻኔ። 17 ታኣኒ ዬሱስ ኪሪስቶሴና ማዒ ፆኦሲም ማዻኒ ዳንዳዒፆና ዖቶርቃኔ። 18 ታኣኒ ዖቶርቃሢ ታ ኬኤዛ ባኮና ማዻ ማዾ'' ዛሎ''ና ዓይሁዴ ማዒባኣ ዓሳ ፆኦሲም ዓይሢንታንዳጉዲ ኪሪስቶሴ ማሄሢሮ ሌሊኬ፤ 19 ዬያጉዲ ሃሣ ኪሪስቶሴ ፆኦሲ ዎልቄና ማዺንታ ዓኪ ማዾንታ ዲቃሣ ማዾዋ ዓያኖ ጌኤዦ ዎልቆና ማዺ ዓይሁዴ ማዒባኣ ዓሳ ዓይሢንታንዳጉዲ ማሄሢሮ ታ ዖቶርቃኔ፤ ዬያይዲፆና ዬሩሳላሜይዳፓ ዴንዲ ዔልዋሪቆኔ ሄላ''ንዳኣና ሓንቲ ሓንቲ ኪሪስቶሴኮ ኮዦ ሓይሶ ታ ኬኤዜኔ።

20 ቢያ ኬሊ'' ታ ማላሢ ሜሌ'' ዓሲ ቦኦኮልቄያይዳ ማዢሢ ማዒባኣንቴ ኪሪስቶሴኮ ሱ’ንፃ ዋይዚንቲባኣ ቤስካ ቢያ ኮዦ ሓይሶ ኬኤዛኒኬ። 21 ዬያ ታ ማዻሢ፦

«ዒዛ ዛሎ'' ኬኤዚንቲ ቤቂባኣ ዓሳ፥

ዒዛ ዛጋንዳኔ፤

ዒዛ ዛሎ'' ዋይዚ ቤቂባኣ ዓሳኣ

ጶቂሢ ዔራንዳኔ»

ጌይንቲ ፃኣፒንቴ ጎይፆናኬ።

22 ሃኖ'' ሄላ''ንዳኣና ዒንሢ ኮይላ'' ታ ሙካኒ ዳንዳዒባኣሢ ታ ዒንሢም ኬኤዜ ጎይፆና ጊኢጊባኣሢሮኬ። ✝ 23 ሓሢ ታ ሃካ ዓኣ ማዾ'' ኩርሴሢሮ ሃሣ ሚርጌ ሌዔፓ ዓርቂ ዒንሢ ዛጋኒ ሚርጌና ታ ኮዓሢሮ፥ 24 ዒስፔኔ ዓጮ'' ታ ዴንዳዖ ዒንሢያ ዒኢና ዛጊ ዓኣዻኒ ማሌኔ። ዒኢካ ዻካ'' ዒንሢና ዎላ'' ታ ዴዔስካፓ ጎይፆ ታ ዓኣዻንዳጉዲ ታኣም ኮይሳ ማኣዶ ዒንሢ ማኣዳ''ንዳሢ ታ ጉሙርቃኔ። 25 ሓሢ ጋዓንቴ ኪሪስቶሴ ጉሙርቃ ዓሶም ዒንጊንታ፥ ማኣዶ ሚኢሼ ዔኪ ዬሩሳላሜ ታ ዴንዳኔ፤ 26 ዓይጎሮ ጌዔቴ ሜቄዶኒያና ዓካይያ ጌይንታ ዓጮ''ይዳ ዓኣ ኪሪስቶሴ ጉሙርቃ ዓሳ ዬሩሳላሜይዳ ዓኣ ኪሪስቶሴ ጉሙርቃ ዓሶ ባኣካ'' ዓኣ ማንቆ ዓሶም ሚኢሼ ማኣዶ ዳካኒ ማሌሢሮኬ። ✝ 27 ሓያ ማኣዳሢ ዔያታ ፔ ማሊሢና ዒንጌሢ' ዔያቶ ኮይሳያ ማዔምኬ፤ ዎይቲ ጌዔቴ ዓይሁዴ ማዒባኣ ዓሳ ዓይሁዴ ዓሶና ዎላ'' ዓያኖ ዓንጆ ዴንቃያ ማዔሢሮ ዓይሁዴ ማዒባኣ ዓሳ ሳዖ ዓንጆ ዒንጊ ዓይሁዴ ዓሶ ማኣዳ''ኒ ኮይሳሢሮኬ። ✝ 28 ዬያሮ ሃያ፥ ቡኩሶና ማኣዳሢ ሚኢሾ ዬሩሳላሜ ዔኪ ዓኣዺ ታ ዒንጌሢኮ ጊንፃ ዒስፔኔ ዓጮ'' ዴንዳዖ ዒንሢ ዬማና ታ ዛጋንዳኔ። 29 ዒንሢ ኮይላ'' ታ ሙካኣና ኪሪስቶሴ ዛሎ''ና ማዓ ዓንጆ ሚርጌና ታ ዒንሢም ዔኪ ሙካንዳሢ ጉሙርቃኔ።

30 ታ ዒሾንሦ! ታ ሚሾንሦ! ታ ዛሎ'' ታኣና ዎላ'' ዶዲ ፆኦሲ ሺኢጲሢና ታና ዒንሢ ማኣዳ''ንዳጉዲ ኑ ጎዳሢ ዬሱስ ኪሪስቶሴና ዓያኖ ጌኤዦናኮ ናሹሞና ታ ዒንሢ ሺኢቃኔ። 31 ዒንሢ ታኣም ሺኢቃንዳሢ' ዪሁዳ ዓጮ''ይዳ ዓኣ ኪሪስቶሴ ጉሙርቁዋ ዓሶይዳፓ ፆኦሲ ታና ካፓንዳጉዲና ዬሩሳላሜይዳ ታ ማዻንዳ ማዻ'' ኪሪስቶሴ ጉሙርቃ ዓሶ ዎዛሳንዳጉዲኬ። 32 ሓሣ ያዺ ማዔሢኮ ጊንፃ ፆኦሲ ማሊሢ ማዔም ዒንሢ ኮይላ'' ታ ዎዛና ዬዒ፥ ዒንሢና ዎላ'' ዴዒ ሃውሻንዳጉዲኬ። 33 ኮሹሞ ዒንጋ፥ ፆኦዛሢ ዒንሢ ቢያሢና ዎላ'' ማዖንጎ፤ ዓኣሜን።