3 ፓራሢ ኑም ዓይሢንታንዳጉዲ ዻንጎይዳ ኑኡኒ ቢፃላ ጌልዛኔ፤ ዬያይዲ ኑ ኮዔ ቤሲ ፓራሢ ዔኪ ዓኣዻኔ። 4 ሃሣ ዋኣፆ ካኣሚላ ዎዚ ዼኤፒ ማዔያ ሃሣ ዼኤፒ ዢባሬና ሂዒንቲ ዓኣዻያ ማዔቶዋ፥ ዋኣፆ ካኣሚሎ ዒሻ ዓሢ ዓልዔቱዋ ባኣዚ''ና ዒዚ ኮዔ ቤሲ ዔኪ ዓኣዻኔ። 5 ዬያጉዲ ዒንዲርሲ ዑፆይዳፓ ዻካ''ታዖ ሚርጌ ዼኤፒ ባኣዚ''ና ዖቶርቃኔ፤ ፑኡፒ ካይዚ ሚቺንታሢ ዻካ'' ታሚናኬ። 6 ዬኖ ጎይፆ ዒንዲርሲያ ታሚኬ፤ ዒንዲርሲ ኑ ዑፆ ባኣኮ''ይዳ ጴዻ ፑርታ ዓጪኬ፤ ኑኡኮ ዑፃ ዓኣ ዓሽኮዋ ቢያ ዒኢሳ''ኔ፤ ናንጎ ቢያይዳ ኑኡኮ ዓኣ ጳዦና ዑፆና ቢያ ታሚዳ ሚቻኔ፤ ፔኤሮዋ ባይቁዋ ጋኣናኣሜ ታሞይዳ ሚቺንታንዳኔ። 7 ሳዖይዳ ዓኣ ካፖንታ ቦዖ ዻኮ''ንታ ዼኤፖንታ ሃሣ ባዞ''ይዳ ዓኣ ማዢንታ ቢያ ዓሲና ዓርቂ ቆሊንታኒ ዳንዳዓኔ፤ ዓሲያ ዔያቶ ቆላኔ። 8 ጋዓንቴ ዒንዲርሲ ዓርቂ ቆላኒ ዳንዳዓ ዓሲ ፔቴ''ታዖ ባኣሴ፤ ዒዞ ጊዳ'' ዓሲ ዎዻ ባኣዚ'' ኩሜያ፥ ሃሣ ሃውሺሢያ ባኣ ፑርታ ባኣዚ''ኬ።