1 Kia rite tā koutou ki tāku, me tāku ka rite nei ki tā te Karaiti.

2 Nā, e whaka­moe­miti ana ahau ki a koutou, mō koutou ka mahara ki ahau i ngā mea katoa, ka pupuri hoki i ngā whaka­rere­nga iho, i āku i tuku atu nā ki a koutou. 3 Nā, e mea ana ahau kia mātau koutou, ko te Karaiti te ūpoko o ngā tāne katoa; ko te tāne te ūpoko o te wahine; ko te Atua anō te ūpoko o te Karaiti. 4 Ko te tangata e īnoi ana, e poro­piti ana, me te hīpoki anō te ūpoko, e whaka­iti ana ia i tōna ūpoko. 5 Ko te wahine ia e īnoi ana e poro­piti ana rānei, kāhore nei he hīpoki o te ūpoko, e whaka­iti ana ia i tōna ūpoko. E rite tonu ana tēnā ānō kua oti tōna ūpoko te heu. 6 Ki te kāhore hoki te wahine e hīpoki­na, kia waru­hia hoki ia. Ki te mea he mea whaka­mā ki te wahine kia waru­hia, kia heua rānei, me hīpoki ia. 7 E kore hoki e tika mō te tāne kia hīpoki­na tōna ūpoko, ko te āhua hoki ia, ko te korōria o te Atua. Ko te wahine ia te korōria o te tāne. 8 Ehara hoki i te mea nō te wahine te tāne, engari, nō te tāne te wahine. 9 Kīhai anō te tāne i hangā mā te wahine, engari, ko te wahine mā te tāne. 10 Koia i tika ai hei runga i te ūpoko o te wahine te tohu o te mana, he mea mō ngā ana­hera. 11 Ahakoa rā, e kore te tāne e motu­hia kētia i te wahine, e kore anō te wahine e motu­hia kētia i te tāne, i roto i te Ariki. 12 Nō roto hoki i te tāne te wahine, wai­hoki, i nā te wahine mai te tāne; nā te Atua anō ia ngā mea katoa.

13 Mā koutou tonu e whaka­aro: he mea pai rānei kia īnoi hīpoki­kore te wahine ki te Atua? 14 E kore rānei te whaka­aro māori nei anō e ako i a koutou, ki te mea he makawe roroa o te tāne, he mea whaka­tūtūa tērā mōna? 15 Tēnā, ki te mea he makawe roroa o te wahine, he mea whaka­korōria tērā mōna. Kua hoatu hoki ōna makawe ki a ia hei hīpoki. 16 Otirā, ki te mea he āhua totohe tētahi, kāhore ō mātou rite­nga pērā, kāhore hoki o ngā hāhi a te Atua.

17 I ahau ia e kōrero nei i tēnei ki a koutou, kāhore āku whaka­moe­miti ki a koutou, kāhore hoki koutou e whaka­mine mō te pai, engari mō te kino. 18 Nā, ko te tua­tahi, i a koutou ka whaka­mine ki roto ki te hāhi, ka rongo ahau he wehe­wehe­nga kei roto i a koutou; ā, e whaka­pono ana ahau ki tētahi wāhi. 19 Kua takoto hoki kia whai tītore­hanga koutou, kia kitea ai te hunga e pai­ngia ana i roto i a koutou. 20 Nā, ka hui­hui koutou ki te wāhi kotahi, e kore e taea kia kai i te hapa a te Ariki. 21 I te mea hoki e kai ana koutou, ka kai tēnā, tēnā, i tāna hapa i mua atu i tētahi; ā, ka hia­kai tētahi, ka hau­rangi tētahi. 22 He aha? Kāhore koia ō koutou whare e kai ai, e inu ai koutou? E whaka­hāwea ana rānei koutou ki te hāhi a te Atua, e mea ana hoki kia whaka­mā te hunga kāhore nei ā rātou mea? Kia pēhea atu tāku kupu ki a koutou? Kia whaka­moe­miti oti ahau ki a koutou mō tēnei mea? E kore rā ahau e whaka­moe­miti.

23 Kua riro mai hoki i ahau i te Ariki tāku i tuku atu rā ki a koutou, arā, i taua pō i tukua ai ia, i tango­hia e te Ariki, e Īhu, te taro, 24 ā, ka mutu te whaka­whetai, ka whatia e ia, nā ka mea ia, "Tango­hia, kainga; ko tōku tinana tēnei ka whati­whatia nei mō koutou. Meinga tēnei hei whaka­mahara ki ahau." 25 Me te kapu anō i te mutu­nga o te hapa, me tāna mea anō, "Ko te kawe­nata hou tēnei kapu i runga i ōku toto. Meinga tēnei i ngā inu­manga katoa hei whaka­mahara ki ahau."

26 I ngā wā katoa hoki e kai ai koutou i tēnei taro, e inu ai i tēnei kapu, e whaka­kitea ana e koutou te mate­nga o te Ariki, kia tae mai rā anō ia. 27 Mō reira ki te kai hē tētahi, ki te inu hē i te kapu a te Ariki, ka whai hara ia i te tinana, i ngā toto, o te Ariki. 28 Engari, kia uiui te tangata ki a ia anō, ka kai ai i taua taro, ka inu ai i taua kapu. 29 Nō te mea ki te kai hē, ki te inu hē tētahi, e kai ana, e inu ana i te whaka­wā mōna, tē whaka­aro ko te tinana o te Ariki. 30 Nō konei hoki he toko­maha i roto i a koutou e ngoi­kore ana, e mate ana, he toko­maha, anō kua moe. 31 Me i whaka­wā hoki tātou i a tātou anō, kīhai i whaka­taua te hē ki a tātou. 32 Ki te whaka­wā­kia ia tātou, he mea whaka­ako tātou nā te Ariki, kei tukua ngā­tahi­tia tātou me te ao ki te hē.

33 Heoi, e ōku tēina, ka hui­hui koutou ki te kai, me tatari tētahi ki tētahi. 34 Ki te hia­kai tētahi, hei roto i tōna whare kai ai; kei ai tō koutou hui­hui­nga hei take whaka­wā. Ko ērā atu mea hoki, māku e whaka­tika ina tae atu ahau.