1 Heoi, e ōku tēina, īnoi mō mātou, kia rere te kupu a te Ariki, kia whai korōria, kia pēnā me tēnā i a koutou; 2 kia whaka­ora­ngia hoki mātou i ngā tāngata pō­au­au, i ngā tāngata kino; kāhore hoki ngā tāngata katoa e whaka­pono.

3 Otiia, e pono ana te Atua, māna koutou e whakaū, e tiaki i te tangata kino. 4 Nā, e ū ana tō mātou whaka­aro i roto i te Ariki ki a koutou, kei te mahi koutou, ā, ka mahi anō i a mātou e whaka­ako nei ki a koutou.

5 Mā te Ariki hoki e whaka­tika ō koutou ngākau ki te aroha o te Atua, ki te ngākau āta tatari o te Karaiti.

6 Nā, ko tā mātou whaka­hau atu tēnei ki a koutou, e ōku tēina, i runga i te ingoa o tō tātou Ariki, o Īhu Karaiti, mawehe kē i ngā tēina katoa e hē ana te whaka­haere, kāhore nei e rite ki ā mātou whaka­rere­nga iho i roto i a rātou. 7 E mātau nā hoki koutou ki ngā mea e tika ai tā koutou whaka­rite ki a mātou; kīhai hoki i hē tā mātou whaka­haere i roto i a koutou; 8 kīhai hoki mātou i kai noa i te taro i te ringa o tētahi tangata, engari i roto i te mahi nui, i te uaua, me te mahi tonu i te ao, i te pō, kei whaka­tai­maha­tia e mātou tētahi o koutou. 9 Ehara rā i te mea kāhore ō mātou take, engari, kia meinga ai mātou hei tauira mō koutou, kia rite ai tā koutou ki tā mātou. 10 Anā hoki i a mātou e noho ana i a koutou, ko tā mātou whaka­hau tēnei ki a koutou, ki te kore tētahi e pai ki te mahi, kaua ia e tukua kia kai.

11 Kei te rongo hoki mātou tērā ētahi e hē ana te whaka­haere i roto i a koutou, kāhore rawa e mahi, engari e poka­noa ana ki a ētahi. 12 Nā, ko tā mātou ako, ko tā mātou whaka­hau tēnei ki aua tāngata pērā, i roto i tō tātou Ariki, i a Īhu Karaiti, me mahi mārie rātou, ka kai i ā rātou nā ake kai.

13 Ko koutou ia, e ōku tēina, kei ngākau­kore ki te mahi pai. 14 Nā, ki te kore tētahi e ngohe­ngohe ki tā mātou kupu i tēnei puka­puka, kia mārama te tohu i a ia, kei piri koutou ki a ia, kia whaka­mā ai ia. 15 Otiia, kaua e mea he hoa­riri ia, engari, whaka­tūpato­ria, ānō he teina.

16 Nā, mā te Ariki pū o te rangi­mārie e hoatu te rangi­mārie ki a koutou i ngā wā katoa, i ngā mea katoa. Kia noho te Ariki ki a koutou katoa.

17 Ko te oha āku, a Paora, nā tōku ringa­ringa ake, ko te tohu ia i ngā puka­puka katoa; he pēnā tāku tuhi­tuhi.

18 Kia tau te aroha noa o tō tātou Ariki, o Īhu Karaiti ki a koutou katoa.