1 Ā, ka rongo ahau i te reo nui he mea nō roto i te whare tapu e mea ana ki ngā ana­hera e whitu, "Haere koutou, ringi­hia ngā oko e whitu o te riri o te Atua ki te whenua!"

2 Nā, haere ana te tua­tahi, ringi­hia ana e ia tāna oko ki te whenua; ā, kua pā he mariao kino whaka­riha­riha ki ngā tāngata kei a rātou nei te tohu a te kararehe, ki te hunga hoki e koro­piko ana ki tōna whaka­pakoko.

3 Nā, ka ringi­hia e te tuarua o ngā ana­hera tāna oko ki te moana; ā, ka meinga hei toto, ānō nō te tū­pā­paku; ā, ka mate ngā wairua ora katoa i roto i te moana.

4 Nā, ka ringi­hia e te tua­toru o ngā ana­hera tāna oko ki ngā awa, ki ngā puna wai; ā, ka meinga hei toto. 5 Ā, ka rongo ahau i te ana­hera o ngā wai e mea ana, "Tika tonu koe, e te Ariki, tēnei koe ināia­nei, i mua anō koe, ko te Mea Tapu hoki koe, nāu hoki ēnei whaka­wā. 6 I ringi­hia hoki e rātou ngā toto o te hunga tapu, o ngā poro­piti, ā, hoatu ana e koe he toto ki a rātou kia inumia; he mea tika hoki mā rātou." 7 I rongo hoki ahau i te āta e mea ana, "Āe rā, e te Ariki, e te Atua Kaha Rawa, pono tonu, tika tonu āu whaka­wā."

8 Nā, ka ringi­hia e te tuawhā o ngā ana­hera tāna oko ki te rā; ā, ka hoatu ki a ia kia tunua ngā tāngata ki te ahi. 9 Nā, hunu­hunua ana ngā tāngata e te wera nui; ā, ka kohu­kohu rātou ki te ingoa o te Atua, kei a ia nei te tikanga mō ēnei whiu. Kīhai hoki rātou i rīpe­netā, i hoatu i te korōria ki a ia.

10 Nā, ka ringi­hia e te tua­rima o ngā ana­hera tāna oko ki te torōna o te kararehe; ā, ka whaka­pōuri­tia tōna ranga­tira­tanga; ā, ngaua ana e ngā tāngata ō rātou arero i te mamae, 11 kohu­kohua ana hoki e rātou te Atua o te rangi mō ō rātou mamae, mō ō rātou mariao, kīhai anō rātou i rīpe­netā ki ā rātou mahi.

12 Nā, ka ringi­hia e te tuaono o ngā ana­hera tāna oko ki te awa nui, ki Uparati; ā, mimiti ake tōna wai, he mea kia rite ai te hua­rahi o ngā kīngi e haere mai i te rā­whiti. 13 Ā, i kite ahau i ngā wairua poke e toru, te rite kei te poroka, e puta mai ana i te māngai o te tara­kona, i te māngai hoki o te kararehe, i te māngai anō hoki o te poro­piti teka. 14 Ko ngā wairua hoki rātou o ngā rēwera, e mahi ana i ngā tohu, e haere atu ana ki ngā kīngi o te whenua, o te ao katoa, ki te hui­hui i a rātou ki te whawhai i taua rā nui o te Atua Kaha Rawa.

15 "Nana, ka haere atu ahau, ānō he tāhae. Ka hari te tangata e mata­ara ana, e tiaki ana i ōna kākahu, kei haere ta­ha­nga ia, kei kitea tōna whaka­mā!"

16 Nā, ka hui­huia rātou e ia ki te wāhi e huaina nei i te reo Hiperu ko Aramakerona.

17 Nā, ka ringi­hia e te ana­hera tua­whitu tāna oko ki te takiwā o te rangi, ā, ka puta mai he reo nui i te whare tapu o te rangi, i te torōna, e mea ana, "Kua oti!" 18 Ā, ka puta mai he uira, he reo, he whati­tiri, ā, ka puta he rū nui, kāhore anō he rū i pērā mai o te noho­anga o te tangata ki te whenua, tōna nui, tōna kaha. 19 Nā, ka wehea te pā nui, e toru ngā wāhi, ā, ka horo ngā pā o ngā tauiwi. Ka mahara­tia hoki Papurōna nui i te aro­aro o te Atua, hoatu ana ki a ia te kapu o te wāina o te ārita­rita o tōna riri. 20 Ā, rere atu ana ngā motu katoa, kīhai hoki i kitea ngā maunga. 21 I heke iho anō hoki i te rangi he whatu nui, ki runga ki ngā tāngata, kei tō te tara­nata te tai­maha o te whatu kotahi; ā, ka kohu­kohu ngā tāngata i te Atua mō te whiu a te whatu; he nui rawa hoki tāna whiu.