1 Nā, ka hāere­ere rāua i Amapipori, Aporonia, ka tae ki Teharonika; he whare kara­kia nō ngā Hūrai i reira. 2 Ā, ka tomo atu a Paora ki a rātou, he tikanga hoki nāna, ā, e toru ngā hāpati i kōrero­rero ai ki a rātou i roto i ngā karaipi­ture, 3 i whaka­puaki ai, i kōrero ai, kua takoto hoki te tikanga kia mamae a te Karaiti, kia ara mai hoki i te hunga mate; ā, "Ko tēnei Īhu, e kauwhau­tia nei e ahau ki a koutou, ko ia te Karaiti." 4 Nā, ka whaka­pono ētahi o rātou, ka piri hoki ki a Paora rāua ko Hira; he toko­maha hoki o ngā Kariki kara­kia, kīhai hoki i rua­rua ngā wāhine ranga­tira.

5 Heoi, ka hae ngā Hūrai, ka tango ki a rātou i ētahi tāngata kikino o te hunga māngere, ka hui­huia ngā tāngata, ka whaka­oho­tia te pā; nā, ko te hua­kanga ki te whare o Hahona, ka mea kia whaka­puta­ina rāua ki te iwi. 6 Ā, nō te kore­nga i kitea rāua ka tōia e rātou a Hahona rātou ko ētahi tēina ki ngā ranga­tira o te pā, ka karanga, "Kua tae mai ki konei ngā tāngata i whaka­tutū­ngia ai te ao; 7 kua puri­tia hoki e Hahona; e tika kē ana ngā mahi a tēnei hunga katoa i ngā ture a Hīhā, e mea ana, tērā atu tētahi kīngi, ko Īhu." 8 Nā, ka rongo te mano rātou ko ngā ranga­tira o te pā ki ēnei mea, ka poro­raru. 9 Nā, ka tango rātou i ētahi moni pupuri i a Hahona rātou ko ērā atu, ā, tukua atu ana rātou.

10 Nā, tonoa tonu­tia atu e ngā tēina a Paora rāua ko Hira i te pō ki Peria; i tō rāua taenga atu, ka haere ki te whare kara­kia o ngā Hūrai. 11 Engari, ēnei i nui atu te āhua ranga­tira i tō ngā tāngata o Teharonika, i hohoro tonu rātou te tango i te kupu, ā, i tēnei rā, i tēnei rā, i rapu i roto i ngā karaipi­ture i te tikanga o ēnei mea. 12 Nā, he toko­maha o rātou i whaka­pono; kīhai hoki i toko­iti ngā wāhine ranga­tira o ngā Kariki, me ngā tāne hoki. 13 Otirā, i te mōhio­tanga o ngā Hūrai o Teharonika, tērā te kupu a te Atua te kauwhau­tia ana e Paora ki Peria, ka haere hoki rātou ki reira ki te whaka­oho, ki te whaka­raru­raru i ngā mano. 14 Nā, tonoa tonu­tia atu e ngā tēina a Paora kia haere tae noa ki te moana; ko Hira ia rāua ko Tīmoti i noho ki reira. 15 Nā, ka kawea a Paora e ōna kai­ārahi ki Atene; ā, ka riro he kupu ki a Hira rāua ko Tīmoti kia hohoro te haere ki a ia, ka hoki rātou.

16 Nā, i a Paora e tatari ana ki a rāua i Atene, ka oho tōna wairua i roto i a ia, i tāna kite­nga i te pā e kī ana i te whaka­pakoko. 17 Nā, totohe ana ia i roto i te whare kara­kia ki ngā Hūrai rātou ko ngā tāngata kara­kia, i te kāinga hoko hoki i ngā rā katoa ki ngā tāngata i pono ki a ia. 18 Ā, ka nga­ngare ki a ia ētahi tohu­nga o ngā Epikureana, o ngā Toika. Ko ētahi i mea, "He aha tā tēnei tangata kōrero­rero e mea nei?"

I mea ētahi, "Me te mea he kai­whaka­puaki ia i ētahi atua tauhou." Mō tāna kauwhau i a Īhu, i te aranga, ki a rātou. 19 Nā, ka mau rātou ki a ia, ka kawea ki Areopaka, ka mea, "Kia mōhio mātou, he aha rānei tēnei ako hou e kōrero­tia nei e koe? 20 Poka kē hoki ngā mea e mauria mai nei e koe ki ō mātou tari­nga; koia mātou i mea ai kia mōhio, he aha ēnei mea." 21 Ka mutu hoki tā ngā tāngata katoa o Atene, rātou ko ngā manu­hiri e noho ana i reira, e wātea ai, ko te kōrero rānei, ko te whaka­rongo rānei ki tētahi mea hou.

22 Nā, ka tū a Paora i waenga­nui o Areopaka, ka mea, "E ngā tāngata o Atene, i ngā mea katoa ka kite ahau he āhua nui kē tō koutou wehi ki ngā atua māori. 23 I ahau hoki e hāere­ere ana, e mā­taki­taki ana i ngā mea e kara­kia nei koutou, ka kite ahau i tētahi āta, i tuhia nei a runga, ‘Ki te Atua Ngaro’. Heoi, ko tā koutou e kara­kia kūware nei, ko ia tāku e whaka­atu nei ki a koutou. 24 Ko te Atua, nāna nei i hangā te ao me ngā mea katoa i roto, ko ia nei te Ariki o te rangi, o te whenua, e kore ia e noho ki ngā whare i hangā e te ringa. 25 E kore anō e mahia he mea māna e te ringa tāngata, me te mea he mate nōna ki tētahi aha rānei, ko ia hoki hei hōmai i te ora, i te manawa, i ngā mea katoa, ki ngā tāngata katoa. 26 Kotahi anō te toto i hangā ai e ia ngā iwi katoa o ngā tāngata, hei noho ki te mata katoa o te whenua, nāna hoki i whaka­takoto ō rātou wā i whaka­ritea i mua, me ngā kaha o tō rātou nohoa­nga. 27 Kia rapu ai rātou i te Atua, me kore e whā­whā, e kite i a ia, ahakoa rā kāhore ia i matara atu i a tātou katoa.

28 ‘Nāna hoki tātou i ora ai, i kori­kori ai, i noho ai.’

I pērā hoki te kōrero a ētahi o ō koutou kai­tito,

‘Ko tātou hoki tōna uri.’

29 Nā, he uri nei tātou nō te Atua, e kore e tika kia mea tātou, kei te rite te Atua ki te kōura, ki te hiriwa, ki te kōhatu, ki te mea i whaka­iroa e te mōhio, e te whaka­aro o te tangata. 30 Nā, kāhore i whaka­aroa e te Atua ngā wā o te kūware­tanga; ināia­nei ia kua whaka­hau ia i ngā tāngata katoa o ngā wāhi katoa kia rīpe­netā. 31 Kua rite hoki i a ia he rā e whaka­wā ai ia i te ao i runga i te tika, arā mā te tangata kua whaka­ritea nei e ia; kua tukua nei hoki he tohu ki ngā tāngata katoa, i tāna whaka­ara­hanga i a ia i te hunga mate!"

32 Nā, ka rangona e rātou te aranga o te hunga mate, ka tāwai ētahi; ko ētahi i mea, "Taihoa mātou e whaka­rongo anō ki tēnei mea i a koe." 33 Heoi, puta atu ana a Paora i waenga­nui i a rātou. 34 Ko ētahi tāngata ia i piri ki a ia, i whaka­pono; i roto i a rātou a Rionaihia nō Areopaka, ko tētahi wahine, ko Ramari te ingoa, rātou ko ētahi atu.