1 E mea ana hoki ahau kia mōhio koutou ki te nui o tōku uaua mō koutou, mō te hunga anō hoki o Raorikia, ā, mō te hunga katoa hoki kāhore nei i kite noa i tōku mata i te kiko­kiko. 2 Kia whaka­mārie­tia ō rātou ngākau, kia tū­hono­honoa i runga i te aroha, kia taea ai ngā taonga katoa o te tino whaka­ūnga o te ngākau mahara, kia mātau ai rātou ki te mea ngaro a te Atua, arā ki a te Karaiti; 3 kei roto nei i a ia ngā taonga katoa o te mahara, o te mātau­ranga e huna ana.

4 Nā, i kōrero ai ahau i tēnei, kei kūmea kētia koutou e te kōrero reka a te tangata. 5 Nō te mea ahakoa kei tawhiti tōku kiko­kiko, kei a koutou nā tōku wairua, e hari ana, e ti­tiro ana ki ā koutou rite­nga tika, ki te ū anō hoki o tō koutou whaka­pono ki a te Karaiti.

6 Nā, kua riro nā te Ariki, a Karaiti Īhu i a koutou, kia pēnā anō tā koutou haere i roto i a ia; 7 kia whai paki­aka, ānō he whare i hangā ki runga ki a ia, whaka­pūmau rawa ki runga ki tō koutou whaka­pono, kia pērā me koutou i whaka­akona rā, kia hira rawa ai te whaka­whetai.

8 Kia tūpato kei riro pārau koutou i tō te tangata whaka­aro mōhio, i te tini­hanga hua­kore, e rite nei ki te whaka­rere­nga iho a te tangata, ki ngā mea tīma­tanga o te ao, ā, kāhore ki a te Karaiti. 9 Kei roto katoa hoki i a ia te tino o te Atua e noho-ā-tinana ana. 10 Ā, kua tino tangata anō koutou i roto i a ia, ko te ūpoko nei ia o ngā ranga­tira­tanga, o ngā mana katoa.

11 He mea kokoti koutou i roto i a ia, he kotinga kīhai i meatia e te ringa­ringa, i te unu­hanga atu i te tinana o ngā hara o te kiko­kiko, i tō te Karaiti kotinga; 12 he mea tanu tahi koutou me ia i te iri­iri­nga, he mea whaka­ara ngā­tahi anō hoki me ia i reira, nō te mea ka whaka­pono nei ki te mahi a te Atua, nāna nei ia i whaka­ara ake i te hunga mate. 13 He tū­pā­paku nā hoki koutou i ngā hē, i te kotinga­kore hoki o tō koutou kiko­kiko, nā, whaka­ora­ngia ngā­tahi­tia ana koutou me ia, he mea whaka­rere noa atu nāna ō koutou hē katoa. 14 Murua ake e ia ngā tikanga i tuhi­tuhia e te ringa­ringa, ngā tikanga i hoa­riri ki a tātou, i tū kē mai i ā tātou; tango­hia ake e ia ki rahaki, he mea titi nāna ki te rīpeka; 15 pāuhua ake e ia ki raro ngā ranga­tira­tanga me ngā mana, whaka­kitea nuitia ana e ia, ā, waiho ana e ia taua rīpeka hei mea whaka­taka māna i ā rātou.

16 Nā, kaua tētahi e whaka­wā i ā koutou mō te kai, mō te inu, mō ngā mea­tanga ki te hākari, ki te kōwhiti­tanga marama, ki ngā hāpati; 17 he ātā­rangi ēnei nō ngā mea i kīa e puta ana i muri; nō te Karaiti ia te tinana. 18 Kei riro tā koutou taonga i te māminga a te tangata e mea ana ki te whaka­iti i a ia, ki te kara­kia ki ngā ana­hera, ka noho i roto i ngā mea e kitea ana e ia, ka whaka­peha­peha kau noa, he mea nā tōna ngākau kiko­kiko; 19 ā, kāhore e mau ki te Ūpoko, nō roto nei i a ia te tinana katoa, he mea ata­whai, he mea tū­hono­hono e ngā hono­nga, e ngā here, ka tupu ai, he tupu nā te Atua.

20 Ki te mea kua tū­pā­paku ngā­tahi koutou ko te Karaiti ki ngā mea tīma­tanga o te ao, he aha koutou, ānō e ora ana ki te ao, ka pupuri tonu ai i ngā tikanga, 21 "Kei pā ringa­ringa, kei pā kai, kei rahu­rahu" 22 He mea pirau katoa nei aua mea i te mea­tanga iho anō, he whaka­hau, he ako nā te tangata? 23 Ko te āhua o aua mea i whaka­ritea ki tō te whaka­aro nui, he kara­kia poka­noa, he whaka­iti i a ia ake, he ata­whai­kore i te tinana; otirā kāhore he painga hei pēhi i te kiko­kiko e tōrere ana kia mākona ia.