16 Ka īnoi ahau ki te Matua, ā, māna e hoatu ki a koutou tētahi atu Kai­whaka­mārie, hei noho tonu ki a koutou. 17 Ko te Wairua o te pono; e kore nei e riro i te ao, nō te mea e kore e kite i a ia, e kore anō e mātau ki a ia. Kei a koutou hoki ia e noho ana, ā, ka noho anō i roto i a koutou.

18 "E kore koutou e waiho pani e ahau. E haere mai anō ahau ki a koutou. 19 Taro ake, ā, heoi anō kite­nga o te ao i ahau; ko koutou ia e kite i ahau; e ora ana ahau, ka ora anō koutou. 20 Ā taua rā koutou mātau ai kei roto ahau i tōku Matua, ko koutou anō kei roto i ahau, me ahau hoki kei roto i a koutou.

21 "Ko te tangata kei a ia nei āku ture, e puri­tia ana hoki e ia, ko ia te aroha ana ki ahau: ki te aroha tētahi ki ahau, ka aroha­ina ia e tōku Matua, ā, ka aroha ahau ki a ia, ka whaka­atu i ahau ki a ia."

22 Ka mea a Hūrā ki a ia (hāunga a Ikariote) "E te Ariki, he pēhea i whaka­atu ai koe i a koe ki a mātou, ā, kāhore ki te ao?"

23 Ka whaka­hoki a Īhu, ka mea ki a ia, "Ki te aroha tētahi ki ahau, e puri­tia e ia tāku kupu, ā, ka aroha­ina ia e tōku Matua, ka haere atu māua ki a ia, ka noho tonu ki a ia. 24 Ki te kāhore tētahi e aroha ki ahau, e kore e puri­tia e ia āku kupu. Nā, ehara i ahau ake te kupu e rongo nei koutou, engari, nā te Matua i tonoa mai ai ahau.

25 "Kua kōrero­tia nei e ahau ēnei mea ki a koutou, i ahau e noho nei i a koutou. 26 Nā, ko te kai­whaka­mārie, arā ko te Wairua Tapu, e tonoa mai e te Matua i runga i tōku ingoa, māna koutou e whaka­ako ki ngā mea katoa, māna koutou e whaka­mahara ki ngā mea katoa kua kōrero­tia nei e ahau ki a koutou.