1 Kātahi ka whaka­tika tō rātou hui­hui katoa, ā, āra­hina ana ia ki a Pirato. 2 Nā, ka anga rātou, ka whaka­pā hē ki a ia, ka mea, "Kua mau i a mātou tēnei tangata e kukume kē ana i te iwi, e mea ana kia kaua e hoatu te takoha ki a Hīhā, e kī ana he kīngi ia, ko te Karaiti."

3 Nā, ka ui a Pirato ki a ia, ka mea, "Ko koe rānei te kīngi o ngā Hūrai?"

Ka whaka­hoki ia ki a ia, ka mea, "Kua kōrero­tia mai nā e koe."

4 Nā, ko te mea­tanga a Pirato ki ngā tohu­nga nui, ki ngā mano, "Kāhore tētahi hē o tēnei tangata i mau i ahau."

5 Ā, nui atu tā rātou tohe ka mea, "E whaka­tūtehu ana ia i te iwi, e whaka­ako ana puta noa i Hūria, tīmata mai i Kariri, ā, tae noa mai ki konei."

6 I te rongo­nga ia o Pirato ki Kariri, ka ui, "Nō Kariri rānei tēnei tangata?" 7 Ā, i tōna mōhio­tanga nō te ranga­tira­tanga ia o Herora, ka tonoa ia ki a Herora, i Hiruhārama hoki ia i aua rā. 8 Nā, i te kite­nga o Herora i a Īhu, nui rawa tōna hari, kua roa ia e hia­hia ana kia kite i a ia, he maha hoki ngā mea i rangona e ia mōna. Nā, ka tū­mana­ko ia kia kite i tētahi mere­kara e meinga ana e ia. 9 Nā, he maha ngā kupu i ui ai ia ki a ia; heoi, kāhore kau he kupu i whaka­hokia e ia. 10 Nā, tū ana ngā tohu­nga nui me ngā kara­ipi, kaha rawa hoki tā rātou whaka­pā hē ki a ia. 11 Nā, ka whākore­kore a Herora rātou ko āna hōia ki a ia, ka taunu, ā, ka oti ia te whaka­kākahu ki te kahu whaka­pai­pai, ka whaka­hokia atu ki a Pirato. 12 I taua rangi anō ka houhia te rongo a Pirato rāua ko Herora; i mua hoki e mauā­hara ana ki a rāua.

13 Nā, ka karanga­tia e Pirato ngā tohu­nga nui, ngā ranga­tira, me te iwi anō, 14 ka mea ia ki a rātou, "Kua kawea mai nei e koutou tēnei tangata ki ahau, me te kī anō kei te kukume kē ia i te iwi; ā, ka oti nei ia te uiui e ahau i tō koutou aro­aro, nā, kīhai i mau i ahau tētahi hē o tēnei tangata i roto i ngā mea i whaka­pā­ngia nei e koutou ki a ia. 15 Ā, kīhai anō hoki a Herora, nāna ia i whaka­hoki mai ki a tātou, nā, kāhore āna mahi e tika ai kia mate ia. 16 Nā, me whiu ia e ahau, ka tuku atu ai." 17 Kua takoto hoki te tikanga kia tukua atu tētahi ki a rātou i te hākari.

18 Nā, ka pānui rātou ki te karanga, ka mea, "Whaka­matea tēnei, ko Parapa te tuku mai ki a mātou" 19 (Ko tēnei hoki i makā ki te whare here­here mō te nana­nga i nana ai ia i roto i te pā, mō te patu tangata.)

20 Nā, ka mea atu anō a Pirato, he mea hoki nāna kia tukua a Īhu. 21 Heoi, hāmama ana rātou, mea ana, "Rīpekatia ia, rīpeka­tia!"

22 Ka mea anō ia ki a rātou, ko te toru o ngā mea­tanga, "He aha rā te kino i meinga e tēnei tangata? Kāhore anō i mau i ahau tētahi hē ōna e mate ai; māku ia e whiu, ka tuku atu ai."

23 Otirā, nui atu ō rātou reo ki te tohe e tono ana kia rīpeka­tia ia. Ā, riro rawa i tā ō rātou reo. 24 Nā, ka whaka­ōtia e Pirato kia waiho i tā rātou i tono ai. 25 Nā, ka tukua anō ki a rātou te tangata i makā ki te whare here­here mō te nana­nga, mō te patu tangata, tā rātou hoki i tono ai; ko Īhu ia i tukua ki tā rātou i pai ai.

26 Ā, i a rātou e ārahi ana i a ia, ka mau rātou ki tētahi tangata o Hairini, ki a Haimona, e haere mai ana i ngā whenua, ā, utaina ana ki a ia te rīpeka, kia amo­hia i muri i a Īhu.

27 Nā, he nui te hui­hui­nga o te iwi i aru i a ia, me ngā wāhine hoki e tangi ana, e auē ana ki a ia. 28 Nā, ka tahuri a Īhu ki a rātou, ka mea, "E ngā tamā­hine o Hiruhārama, kaua e tangi ki ahau, engari me tangi ki a koutou anō, ki ā koutou tama­riki. 29 Tērā hoki e puta ngā rā e mea ai rātou, ‘Koa tonu ngā pākoko, me ngā kōpū kāhore i whānau, me ngā ū kāhore i ngotea.’ 30 Ko reira tīmata ai rātou te mea ki ngā maunga, ‘Horo iho ki runga ki a mātou,’ ki ngā puke­puke hoki, ‘Hīpoki­na mātou.’ 31 Ki te meinga hoki ēnei mea e rātou i te rākau e kai­mata ana, ko te aha e meatia i te rākau ka maroke?"

32 Nā, tērā atu ētahi toko­rua, he hunga mahi kino, e āra­hina ngā­tahi­tia ana me ia kia whaka­matea. 33 Ā, ka tae rātou ki te wāhi e kīa nei ko Te Anga­anga, ka rīpeka­tia ia ki reira, me aua kai­mahi kino, kotahi ki matau, kotahi ki mauī. 34 Nā, ka mea a Īhu, "E Pā, houhia te rongo ki a rātou; kāhore hoki rātou e mōhio ki tā rātou e mea nei."

Ā, wehe­wehea ana ōna kākahu e rātou he mea maka ki te rota. 35 Me te tū anō te iwi mā­taki­taki ai. Ko ngā ranga­tira hoki ka tāwai ki a ia, ka mea, "Ko ērā atu i whaka­ora­ngia e ia, māna anō ia e whaka­ora, ki te mea ia ko te Karaiti a te Atua, ko tāna i whiri­whiri ai!"

36 Ko ngā hōia ētahi i taunu ki a ia, ka haere mai me te kawe mai he winika ki a ia, 37 ka mea, "Ki te mea ko koe te Kīngi o ngā Hūrai, whaka­ora i a koe."

38 Ā, tērā te mea i tuhi­tuhia ki runga ake i a ia, "Ko te Kīngi tēnei o ngā Hūrai".

39 Nā, ko tētahi o ngā kai­mahi kino i whaka­iria rā i kohu­kohu ki a ia, i mea, "Ki te mea ko te Karaiti koe, whaka­ora­ngia koe, māua hoki."

40 Nā, ka whaka­hoki tētahi, ka riri ki a ia, ka mea, "E kore rānei koe e wehi ki te Atua, kei tēnei mate tahi nei hoki koe? 41 Ka tika rāia tō tāua; ka whi­whi hoki tāua ki ngā mea e tika ana mō ā tāua hanga; ko tēnei ia kāhore āna mahi hē." 42 Nā, ko tāna mea­tanga ki a Īhu, "E te Ariki, kia mahara koe ki ahau ina haere mai koe i runga i tōu ranga­tira­tanga."

43 Anō rā ko Īhu ki a ia, "He pono tāku e mea nei ki a koe, ko āia­nei koe noho ai ki ahau ki Pararaiha."

44 Nā, kua tata ki te ono o ngā hāora, ā, ka pōuri a runga o te whenua katoa, tae noa ki te iwa o ngā hāora. 45 I pōuri hoki te rā, ā, i wāhia te ārai o te whare tapu i waenga­nui pū. 46 Ā, nui atu te reo o Īhu ki te karanga; i mea ia, "E Pā, tēnei tōku wairua ka tukua atu nei ki ōu ringa." Ka mutu ēnei kupu, ka hemo ia.

47 Ā, i te kite­nga o te kene­turio i taua mea, ka whaka­korōria ia i te Atua, ka mea, "He pono he tangata tika tēnei."

48 Me te hunga katoa hoki i hui­hui mai ki te mā­taki­taki, i tō rātou kite­nga i aua mea i meatia rā, ka pātuki i ō rātou uma, ā, hoki ana. 49 Ā, ko te hunga katoa i mōhio ki a ia, rātou ko ngā wāhine i aru mai i a ia i Kariri, i tū mai i tawhiti, mā­taki­taki ai ki ēnei mea.

50 Nā, tērā tētahi tangata, ko Hōhepa te ingoa, he tangata noho rū­nanga; he tangata pai, he tangata tika. 51 Kīhai ia i whaka­ae ki tō rātou whaka­aro, ki tā rātou mahi, nō Arimatia ia, nō tētahi pā o ngā Hūrai, ā, he tangata ia e tatari ana ki te ranga­tira­tanga o te Atua. 52 I haere ia ki a Pirato, ā, tonoa ana e ia te tinana o Īhu. 53 Nā, ka tango­hia iho e ia taua tinana, ā, takaia ana ki te rīnena, ka waiho ki te rua i hāua ki roto ki te kōhatu, kāhore hoki i takoto noa tētahi tangata ki reira. 54 Nā, ko te rā Taka­nga hākari ia, ā, meāke pūao te hāpati.

55 I aru anō ngā wāhine i haere tahi mai nei me ia i Kariri, ā, kite ana i te urupā, i te whaka­takoto­ranga anō o tōna tinana. 56 Nā, ka hoki rātou, ka mahi i ngā mea kakara, i ngā hinu.

Ā, noho ana i te hāpati, he whaka­aro hoki ki te ture.