1 यरूसलेम को राजा, दाऊद को पोरिया अऊर उपदेसक को वचन। 2 उपदेसक न बोल्यो बेकार है, "बेकार है, बिलकुम बेकार। सब कुछ बेकार है।" 3 इंसान हुन ख आपना वी सभी काम हुन से का फायदा होय है जे सूरज को नीचू मेहनत करा है? 4 एक पीढ़ी जाय है, अऊर दूसरी पीढ़ी आवा है, पर धरती हमेसा बनी रहवा है। 5 सूरज निकला है अऊर डुबा भी है, अऊर अपनो निकलन कि दिसा कि तरफ जल्दी से लऊट जाय है। 6 हवा दक्छिन की ओर चला है, अऊर उत्तर की तरफ घुमते जाय है; वा घूमते अऊर चलते जाय है, अऊर अपनी रपतार से हमेसा चलते जाय है। 7 सब नद्दी हुन समुंदर म जा मिलह है, तेभी समुंदर भर नी जावा; जे जगा से नद्दी हुन निकला है, उत्ते ही से वे फिर बहन लग जावा है। 8 सब बात थकावन वाली है, इंसान ऐको बखान नी कर सकह; न ते आँख देखन से भरह है, अऊर न कान सुनन से भरह है। 9 जे कुछ भयो थो, उई फिर होयगो, अऊर जे कही बन चुक्यो है उई फिर बनायो जाएगो; अऊर सूरज को नीचू कोई बात नयी नी हाय। 10 का असी कोई बात है जेको बारे म व्यक्ति हुन बोल सके कि देख यू कुछ नयो बात है? पर वा हमसे बहुत पहिले पुरानो जमाना म हो चुकी है। 11 पुरानो जमाना की बात हुन को कुछ याद नी रयो, अऊर होवन वाली बात हुन को भी याद दास उनको बाद होवन वाला ख नी रहेगो।

12 मी उपदेसक यरूसलेम म इस्राएल को राजा थो। 13 मी न अपनो मन लगायो कि जे कही आकास को नीचू करो जाय है, ओको भेद बुद्धि से सोच सोच ख मालूम करूँ; यू बडो दुख को काम है जो परमेस्वर न इंसान हुन को लाने ठहरायो है कि वी ओमा लगे। 14 मी न वी सब काम हुन ख देख्यो जो सूरज को नीचे करा जाय है: देखो, वी सब बेकार अऊर मानलेव हवा ख पकड़नो जसो है। 15 जो है ऊ सीधो नी हो सका, अऊर जित्ती चीज है ही नी हाय, उनका गिनो नी जाय।

16 मी न मन म कहयो, "देख, जित्ता यरूसलेम म मोसे पहिले था वी सभी से मी न बेजा जादा बुद्धि हासिल करयो है; अऊर मोका बेजा जादा बुद्धि अऊर ग्यान मिल गयो है।" 17 मी न अपनो मन लगायो कि बुद्धि को भेद लेहूँ। अऊर पागलपन अऊर मुर्खता ख भी जान लेऊ। मोका मालुम पडीयो कि यू भी हवा ख पकड़नो जसो है। 18 काहेकि जादा बुद्धि को संग बेजा दुख भी होय है, अऊर जो अपनो ग्यान बढ़ावा है ऊ अपनो दुख भी बढ़ावा है।