Mawuliwu ndava ya kumuyupa Chapanga
1 Kutumbula hoti mumjovela Chapanga chemwigana, mumyupa Chapanga, muvayupila vandu vangi na mumsengusa Chapanga ndava ya vandu voha. 2 Muyupa ndava ya vankosi na vandu voha vevana uhotola, muni mtama matamilu changali kulyunga na uteke pamonga na luhala lwa Chapanga na matendu gabwina. 3 Lijambu lenili labwina na lakumganisa Chapanga msangula witu, 4 mweigana vandu voha vasanguliwayi na vaumanya uchakaka.