1 ཆོད་ནས་ ཉིན་ན་ཡེ་ཤུ་གི་ གཟིམ་ཅུང་ནང་ནས་ འབྱོན་ཞི་ད་ མཚོའི་མཐའ་ན་བྱོན་བྱི་ བཞུགས་པ་ད། 2 ཆོད་ནས་ མི་ད་ས་ང་ སྤུངས་ཅི་ནག་པའི་ ཆེ་སྐུ་མདུན་ན་ འཇོམས་ཞི་ ར་ཇི་ནག་ད་ ཡེ་ཤུ་གི་གྲུའི་བྱོན་ཇི་བཞུགས་པའི་ཆེ་ན། མི་དང་ས་ང་ མཚོ་མཐའ་མར་ ཡང་ཇི་ཡོན་ན། 3 ཁྱི་གི་ཁྲོས་ལེ་ཤ་དཔེ་གཏམ་ཨ་སོ་ཅོག་སར་ཐོག་ནས་གསུངས་ན་ ཉིནམ་ཐེ་གི་ཚེ་ གླེང་ཡས་བུ་ཁན་ཆ་ཡི་མི་ཐེ་གིས་ གླེང་ཁར་སོན་གཏོར་བུ་ཇི་སོང་ན།

4 ཆོད་ནས་ཁྱི་གི་ སོན་ཆ་ཡེ་ གཏར་མ་བཏོག་སོན་ཐེ་ཐེ་ ད་ས་ང་ ཡམ་དར་ཇི་ན་ ཆོད་ནས་ བྱ་ར་ཇི་ཐུམ་བཟུ་ན། 5 སོན་ཕེ་དེ་ཅིག་ གོར་ཆི་མ་ལ་ས་ན་ངོ་དར་ན་ ས་གཏིང་མུ་ལེ་ སོན་ཆ་ཡི་མ་ནས་མགྱོགས་པར་སྐྱེས་ན། 6 ཆ་ཡི་བུ་མ་ ར་ཏོ་གཏིང་རེ་སེ་མུ་དོ་ག་ཡི་མ་ཆུགས་པ་བརྟེན་ཇི་ ཉིན་གནམ་མེད་ས་མེད་ཤུགས་ཞེ་མ་དཝ་ ལྕུག་གུ་ཆ་ཡི་སྐམ་ཇི་ཤེ་ན། 7 སོན་ཐེ་ཐེ་རྩང་ནང་ངོ་དར་ཇི་ རྩང་ཁ་དོག་སྦོམ་མ་དཝ་ ལྕུག་གུ་ཆ་ཡི་རྩང་གི་ཨོ་སོ་ཡེབ་བླེ་ན་ ཁག་ཏོ་སྦོམ་མ་ཆུགས་ན། 8 ཆོར་བུ་མ་ སོན་ཐེ་ཐེ་ས་བཟང་ས་རོ་དར་ཇི་ སོན་ཕེ་དེ་གིས་གཅིག་བརྒྱ་ ཕེ་དེ་ཁ་ཡི་གསུམ་ ཕེ་དེ་གི་ཁ་ཡི་དེ་ནེ་ལྷག་ཇི་ཇོང་ན་ ཐོ་མོན་ན།

9 ཨ་ཡི་དོ་རྣ་བ་ན་ཁན་ཆར་ཇི་ ཉན་ལེ་བུ་ཇི་ ཡེ་ཤུ་གི་གསུངས་ན།

10 ཡེ་ཤུ་གི་སློབ་མ་ཁྱི་བཞུགས་ས་བཅར་མ་དཝ་ ཆོ་གི་ཨར་པ་ར་བུ་སང་ མི་ད་ས་ང་ཞ་བུ་ཇི་དཔེ་གཏམ་གྱི་ཐོ་ནས་གསུངས་ད་བུ་ཇི་ཞུ་མ་དཝ།

11 ཡེ་ཤུ་གི་ལན་ན་ ཞིང་ཁམས་ཀྱི་རྒྱལ་སྲིད་གསང་བ་ཧ་གོ་མེ་ལ་གནས་སྐབས་ཆ་ཡི་ ཡེད་ངད་སློབ་མ་ཆ་ཁྱབ་ལུ་གནང་ར་ ཆ་ཡི་བུ་མ་ ཁྱི་དོ་ མ་གནང་པ། 12 ཨ་ཡི་དོ་ན་ཁན་ཆ་ཡི་ ཆ་ཡི་ནེ་ལྷག་ཇི་བུལ་ར་ ན་ཁན་ཆ་ཡི་དོ་ མ་ལང་ལངམ་བུ་ཇི་བུལ་ར་ ཨ་དོ་མུ་ལ་ཆ་ཡི་ ད་རུང་རྩི་ཏི་ན་ཁན་ཆ་ཡང་ ཡུང་ཇི་ཁོར་ར། 13 ཆོར་བུ་མ་ ང་ཡི་ཁྱི་དོ་དཔེ་གཏམ་གྱི་ཐོག་ནས་བུ་ཇི་སླབ་ཏ་ཡོན་ ཞི་བོ་བུ་ནང་ནས་ ཁྱི་མིག་གི་བལྟ་ས་ ཆོར་བུ་མ་ ཇ་མི་མཐུང་ད་ ཁྱི་རྣ་བ་ཉན་ད་ ཆ་ཡི་བུ་མ་ དོན་དག་ཛ་མི་དགོ་ས། 14 ལུང་སྟོན་པ་ཨའི་ཟ་ཡ་གིས་གསུང་ཁན་གྲུབ་ན། ✝

ཡོད་ཀྱི་རྣ་བ་ཀོ་མེ་ལ་ད་ཀོ་བ་ ཆ་ཡི་བུ་མ་ ཧ་གོར་མི་ཆུགས་ ཡོད་མིག་ག་མཐུང་མེ་ལ་མཐོང་ར་ ཞ་བུ་ཇི་ཤེས་མི་ཆུགས་ན།

15 ཞ་བོ་བུ་ནང་ནས་ ཨོ་སོ་ཡི་མི་ཆ་ཡི་ སེམས་སྲ་ཀྲག་དང་ ཁྱི་རྣ་བ་ཡང་བྱ་རྡུགས་ཡོན་ད་ རྣ་བ་ཡང་མི་གོ་ད་ ཁྱི་གི་མིག་བཅུམ་ཇི་ཉེ་ཇི་ མིག་གིས་ཡང་མི་མཐོང་ད་ ཆོར་མི་ནང་ནས་ ཁྱི་མིག་གིས་ཡང་མཐོང་པ་ར་ རྣ་བ་ཡང་གོ་ས་ར་ སེམས་ཀྱི་ཡང་ཁ་ཀོ་ས་ར་ སེམས་འགྱུར་ཇི་ངད་ནག་ས་རོ་ར་ས་ར་ ཆོད་ནས་ང་གི་ཡང་ ཁྱི་དོ་དྲག་པ་ཁེར་པ་ར་བུ་ཇི་ ལུང་བསྟན་བཤད་ཇི་ བླེག་པ་ར།

16 ཆ་ཡི་བུ་མ་ ཡོད་བྱིན་རླབས་ཅོག་སར་ཡོན་ ཞི་བོ་བུ་ནང་ནས་ ཡོད་མིག་གི་མཐུང་ད་ ཡོད་རྣ་བ་ཡང་གོ་ས། 17 ང་ཡི་དོན་ལ་ར་སླབ་ད་ ན་རོ་ལུང་སྟོན་པ་མ་རབས་ཐེ་གི་ མི་ཆོས་སེམས་ན་*ཁན་ཆར་ཇི་ ཡོད་མཐུང་ཁན་ཆ་ཡི་ བལྟ་རུ་ཉམ་པ་ ཆ་ཡི་བུ་མ་ བལྟ་མེ་ལ་མ་ཉང་ ཆོད་ནས་ཡོད་ཉན་ཁན་ཆ་ཡི་ཉན་དོ་ཉམ་པ་ ཆ་ཡི་བུ་མ་ ཉན་མེ་ལ་མ་ཉང་བུ་ཇི་གསུངས་ན།

18 ད་རུ་ར་ཡེ་ཤུ་གི་ ད་སོན་གཏོར་ཁན་ལ་དཔེ་གཏམ་ཆ་ཡི་དོན་དག་ཉན་ལོ། 19 ཨ་སོ་ཡམ་ནང་ དར་ཁན་ལ་སོན་གྱི་དཔེ་ཆ་ཡི་ རྒྱལ་སྲིད་ཀྱི་གཏམ་བཟང་སྐོར་ནས་ ཉན་ཏེ་ཧ་མ་དགོ་བར་ཉེ་མ་ བདུད་དེ་ར་ཇི་ ཁྱི་གི་སེམས་ནང་ནས་ སོན་ཆ་ཡི་ཐུམ་ཁོར་ན། 20 ཆོད་ནས་ས་རུག་རྡོ་རུག་ནང་དར་ཁན་ལ་སོན་ཆ་ཡི་ མི་ཆར་ཇི་གསུང་ཉན་ཇི་ ཆེ་འཕྲོ་ནས་སེམས་དགའ་སང་། 21 སོན་ཆ་ཡི་ར་ཏོ་མར་གཏིང་རན་སེ་མུར་དོ་ དུས་ཚོད་རེན་སི་ཆེ་ན་སྐྱེས་ཇི་ ཉེར་མ་ཆུགས་པ་ཅོག་སར་བུ་ཇི་ ཁྱི་ཡང་གསུང་ཆར་ཇི་ དཀའ་ངལ་ནས་གནོད་པ་ཆ་ཡི་བྱུང་མ་ད་དགོ་ ཁྱི་གི་བཟོད་མ་ཚུགས་དགོ་ རྒྱབ་བཤུད་བརྐྱབས་ཇི་ག་ཡི་ད་ཡོན། 22 རྩང་ནང་ངོ་དར་ཁན་ལ་སོན་གྱི་དཔེ་ ཆ་ཡི་ཨོ་སོ་ཡོན་ མི་ཆར་ཇི་གསུང་འདི་ཉན་ཇི་བུ་སང་ མི་ཆར་ཇི་ཚ་གྱང་ནས་ རྒྱུ་ནོར་ལོགས་སྤྱོད་ཀྱི་ཞེན་ཆགས་ཀྱི་དམ་ཇི་ ལོ་ཐོག་མ་མེ་ཁན་ཨོ་ས་ཡོན། 23 ཆ་ཡི་བུ་མ་ ས་བཟང་སར་རོ་དར་ཁན་ལ་ དཔེ་ཆ་ཡི ཨོ་སོ་ཡོན་ མི་གི་གསུང་ཆ་ཡི་གོ་ས་ནས་ དོན་དག་ཆ་ཡི་ཧ་དགོ་ན་ ཁྱི་ལོ་ཐོག་འབྲས་བུ་ཆ་ཡི་ ཕེ་དེ་གི་ཁ་ཡི་ཡ་ང་ ཕེ་དེ་གི་ཁ་ཡི་གསུམ་ཇོང་ན་ ཕེ་དེ་གི་ཁ་ཡི་ཕེ་དང་ཇོན་བ་ལྷག་ཇི་ ཇོད་མེ་ལ་བུ་ཇི་གསུང་ན།

24 ད་རུང་ཡེ་ཤུ་གི་དཔེ་གཏམ་གཞན་ཐེ་ བོ་དོ་གསུང་ན་ ཡོད་ཞིང་ཁམས་ཀྱི་རྒྱལ་སྲིད་ཆ་ཡི་ གླེང་ནང་ཡས་བུ་འརན་ཐེ་གི་ ཁྱི་ར་གི་བླེང་ན་ སོན་བཀའ་ཅིན་ཏོར་བླེ་ཁན་ལ་འདྲ། 25 ཆ་ཡི་བུ་མ་ སོན་ཇོད་བུ་ཇི་ སན་མི་ད་ས་ང་དོ་ཇད་མ་ ཁྱི་གི་དགྲ་ཆ་ཡི་ར་ཇི་ དཀར་སོན་གྱི་བུས་ན་ གཡུར་ཇ་གྱི་སོན་ཡང་ ཇོད་བླེ་བུ་ཇི་ག་ཡི་ན། 26 ལོ་ཐོག་དཀར་ཡང་རོང་ན་ག་བྱོང་མ་ གཡུར་ཇ་ཡང་ ཁོརང་ཇི་བྱིག་པ་ག་ཡི་ན། 27 བླེང་གི་སྦྱིན་བདག་གི་གཡོགཔ་ཆ་ཡི་ཁྱི་ནག་ས་རོ་ར་ཇི་གསུངས་ན་ སློབ་དཔོན་ ཁྱི་གི་བླེང་ནང་སོན་བཀའ་ཅིན་བཏབ་མ་དཝ་ ཨ་སོ་གཡུར་མ་ཆ་ཡི་ ཨ་ཏོར་བུ་ཇི་ཁོང་པམ་ཡོན་ནམ། 28 ཁྱི་གི་ལན་ན་ ཆེ་དགྲ་བྱང་ཕྱད་ཀྱི་བུ་ས་ཡོན་ད་བུ་ཇི་སླབ་མ་དཝ་ གཡོགཔ་ཆར་ཇི་ ངེ་ར་བླེང་ནང་ག་ཡི་ཇི་ གཡུར་ཇ་ཆ་ཡི་ཕྲེ་རྐྱང་ང་བུ་ཇི་ཞུ་མ་དཝ། 29 ཁྱི་གི་ལན་ན་ ཕྲེ་རྐྱང་མེ་ལ་མེན་ ཞ་བོ་བུ་ནང་ནས་ ཡོད་གཡུར་ཇ་ཕྲེ་མ་དཝ་ ལོ་ཐོག་ལུ་སྐྱོན་ཇེ་ར། 30 དཀར་མ་མེན་ཚུན་ཚོད་ཇོན་ཁ་ར་ཆོ་བླེག་ག་ཡི་ ལོ་ཐོག་དུ་མ་དཝ་ང་ཡི་ལས་མི་ནང་ ན་རོ་ར་གཡུར་ཇ་ཆ་ཡི་བརྔ་ཇི་ ཆག་པ་ཁེག་ཇི་ གམ་བཏེད་མེ་ལ་བུ་ཇི་བླེག་ག་ཡི་ ཆོད་ནས་ལོ་ཐོག་དཀར་བརྔ་ཇི་ ང་ཡི་མཛོད་ཁང་ནང་ཡོག་ག་ཡི་བུ་ཇི་ སླབ་མེ་ལ་བུ་ཇི་གསུངས་ན།

31 ད་རུང་ཡེ་ཤུ་གི་ཁྱི་དོ་ དཔེ་གཏམ་གཞན་མེ་ཐེ་འོ་སོར་གསུང་ན་ ཞིང་ཁམས་ཀྱི་རྒྱལ་སྲིད་ཆ་ཡི་ མི་ཐེ་གི་ཡོང་ཁར་གི་སོན་འབག་ཇི་ ཁྱི་རང་གི་བླེང་ནང་བྱེད་པ་ཅོག་སར་ཡོན། 32 ཡུང་གར་གི་སོན་ཆ་ཡི་ སོན་ད་ས་ང་གི་བར་ནས་ཆིང་ཀུ་ཆ་ཡི་ཡོན་སང་ ཆ་ཡི་ཁག་ཏོ་བྱིག་པ་ལ་ག་ཡི་མ་དཝ་ ལྡུམ་ར་ནང་ན་གི་ཡོང་ཁར་ཇོན་ཆ་ཡི་ ད་ས་ང་ནས་བྱིག་པ་ག་ཡི་མ་དཝ་ ཡག་ཏ་ཇེ་དོ་བྱ་ཆག་ཇི་ཉེ་ས་ཡོན།

33 ཆོད་ནས་ཡེ་ཤུ་གི་ཁྱི་དོ་དཔེ་གཏམ་གཞན་ཐེ་དེ་སྦེ་ ཞིང་ཁམས་ཀྱི་རྒྱལ་སྲིད་ཆ་ཡི་ ཨ་མ་ཐེ་གི་ ཕྱི་བེརེ་གསུམ་ནང་ ཕབས་ སླ་ས་ཇི་ ཁ་བྱིག་པ་ལ་མ་ག་ཡི་ཆུན་ཚོད་ བླེ་ཁན་ནེ་དྲག་བུ་ཇི་གསུངས་ན།

34 ཡེ་ཤུ་གི་མི་དམང་ནང་ ཁྲོས་ད་ས་ང་དཔེ་གཏམ་གྱི་ཐོག་ནས་སྦེ་གསུངས་ཇི་ དཔེ་གཏམ་མུ་དོ་ ཁྱི་ཁྱི་དོ་ཁྲོས་ག་ནི་ཡང་མ་གསུངས་ན། 35 ཆ་ཡི་གསུང་ཁན་ཆ་ཡི་དཀོན་མཆོག་གི་ན་རོ་ར་ ལུང་སྟོན་པ་ནས་རྒྱུད་དེ་གསུངས་དོཝ་ཅོག་སར།

ང་ཡི་དཔེ་གཏམ་བུ་ཇི་ཁ་སླབ་ད་ཡོན་ ང་འཇིག་རྟོན་བཀོད་པའི་བསྒང་ན་ གསང་བཞག་ཇི་བླེ་ཁན་ལ་ལོ་རྒྱུས་ཆ་ཡི་ ང་ཡི་འགྲེལ་བཤད་རྐྱབ་གེ་བུ་ཇི་✝ གསུངས་ཁན་ཆ་ཡི་ ལུང་བསྟན་གྲུབ་ན།

36 ཆོད་ནས་ཡེ་ཤུ་མི་དམངས་ནང་ཁ་འབྱལ་བྱི་ ཁྱི་རའི་གཟིམ་ཅུང་ནང་འབྱོནམ་དཝ་ ཁྱི་སློབ་མ་ཆ་ཡི་ཁྱི་ར་བཞུགས་ས་རོ་ཆར་ཇི་ དཀར་ཞིང་ནང་གཡུར་ཇ་ཁོརང་གི་དཔེ་གཏམ་གྱི་སྐོར་ནས་ ངེད་དོ་འགྲེལ་བཤད་རྐྱབ་ཇི་གནང་ང་ཡི་བུ་ཇི་ཞུ་མ།

37 ཆར་ཇི་ལན་ནང་ཡེ་ཤུ་གི་ སོན་བཀའ་ཅིན་ཇོར་ཁན་ཆ་ཡི་ མིའི་བུ་ས་ཡོན། 38 ས་ཞིང་དེ་འཛམ་བུ་གླིང་ཡོན་ སོན་བཀའ་ཅིན་ཆ་ཡི་རྒྱལ་སྲིད་ཆ་ཡི་སྲས་དང་སྲསམོ་ཚུ་ཡོན་ ཆོད་ནས་གཡུར་ཇ་ཆ་ཡི་ བདུད་ཀྱིས་བུས་དང་བུམོ་ཚུ་ཡོན། 39 གཡུར་ཇི་གི་སོན་ཇད་ཁན་ཆ་ཡི་དགྲ་བྱང་ཕྱད་ཆ་ཡི་བདུད་ཡོན་ ལོ་ཐོག་དུ་སའི་དུས་ཚོད་ན་ འཛམ་བུ་གླིང་མཐའན་མཇུག་གི་དུས་ས་ཡོན་ ལོ་ཐོག་བརྔ་ཁན་ཆ་ཡི་ ཕོ་ཉ་གང་པོ་ཡོན། 40 གཡུར་ཇ་ཁྲི་ཡི་ཇི་ གམ་མི་ནང་ཆང་དེའི་ཆོག་ ཆར་ མཐའན་མཇུག་གི་དུས་ཚོད་ན་ འོ་སོར་ག་ཡི་མེ་ལ་ཡོན། 41 མིའི་བུ་ས་གི་ཁྱི་ར་ཕོ་ཉ་ཆུ་བླེ་ཇི་ ངན་པ་བུ་འརན་ཆར་ཇི་ གཞན་ན་སྡིག་པ་ཡས་བུ་འརན་ད་ས་ང་རང་ ཁོ་ཡི་རྒྱལ་སྲིད་ནས་ཕང་ནང་ཇོང་ཇི 42 ཁྱིད་གམ་མི་ཐབ་ནང་ཆང་ཇི་ ཁྱི་ཆེ་ན་ ཀོ་བ་དར་ཇི་སྔུ་ཇི་ཉེ་ར། 43 ཆོད་ནས་ཆོས་སེམས་ན་ཁན་ཆ་ཡི་ ཁྱི་ཡབ་ཀྱི་རྒྱལ་སྲིད་ན་ཉིན་ཤར་དོཝ་ཆོག་སར་ ཤར་མེ་ལ་ཡོན་ ཨ་ཡི་དོ་རྣ་བ་ཉེ་མེ་ལ་ཉན་ཤིག་ཟེར་གསུངས་ན།

44 ད་རུང་ཡེ་ཤུ་གི་ ཞིང་ཁམས་ཀྱི་རྒྱལ་སྲིད་ཆ་ཡི་ བླེང་ནང་ངོ་གཏེར་བློམ་ཇི་བླེ་ཁན་འདྲ་ མི་ཐེ་གི་གཏེར་ཉང་མ་ད་དགོ་ ཁྱི་ད་རུང་བློམ་ཇི་བླེ་ན་ ཁྱི་གནམ་མེད་ས་མེད་སེམས་དགའ་ཇི་ ཁྱི་དོ་ག་ནག་སང་མུ་ཡི་ཇི་ གཏེར་ན་ཁན་ལ་གླེང་ཆ་ཡི་ཉི་ར་བུ་ཇི་གསུང་ན།

45 ད་རུང་ ཞིང་ཁམས་ཀྱི་ རྒྱལ་སྲིད་ཆེ་ཡི་ ཚོང་དཔོན་ཐེ་གི་མུ་ཏིག་བཀའ་ཅིན་ འཚོལ་ཁན་ན་འདྲ། 46 ཁྱི་གི་རིང་གོང་བྱིག་པ་ལ་མུ་ཏིག་ཐེ་ཇང་མ་དཝ་ ཁྱི་ག་ཡི་ས་ནས་ ཁྱི་དོ་ཇ་བུ་ས་ནས་མུ་ཡི་ས་ནས་ མུ་ཏིག་ཆ་ཡི་ཉེ་ས་ཡན་བུ་ཇི་གསུངས་ན།

47 ད་རུང་ཡེ་ཤུ་གི་ ཞིང་ཁམས་ཀྱི་རྒྱལ་སྲིད་ཆ་ཡི་ ཉ་རོགས་པ་གི་དྲཝ་མཚོ་ནང་ཆང་ཇི་ ཉ་རིགས་མ་འདྲཝ་ལེ་ཤ་བཟུང་མེ་ལ་དྲྭཝ་དང་འདྲ། 48 དྲྭཝ་ཆ་ཡི་ཉ་ཡི་ཉན་མ་ཏ་དགོ་ ཉ་རོགས་པ་གི་ མཚོའི་ངོད་པ་རོ་ངོན་ཇི་ མ་ས་རོ་ཉན་ཇི་ ཉ་བཀའ་ཅིན་ཆ་ཡི་ཁོམ་པ་ནང་བཙུགས་ཇི་ ཉ་ཟ་ཉེ་གང་པོ་པ་ངོ་ཙང་ད་ཡོན། 49 ཨོ་སོ་ཅོག་སར་ འཛམ་བུ་གླིང་གི་མཐའན་མཇུག་ན་འབྱུང་མེ་ལ་ཡོན་ད་ ཆ་ཡི་སྐབས་ན་ཕོ་ཉ་ཚུ་ར་ཇི་ ཆོས་སེམས་ན་ཁན་ཆ་ཡི་སྦུག་ནས་ ངན་པ་དེ་ཚུ་རང་ཁ་འཕྱལ་ཇི 50 མི་ངན་པ་ཆ་ཡི་གམ་མི་ཐང་བ་ནང་ཆང་ར་ བོད་ཨོ་སོ་ནང་ ཀོ་བ་དར་ཇི་སྔུ་ཇི་ཉེ་ར་བུ་ཇི་གསུངས་ན།

51 ཡེ་ཤུ་གི་བོ་དོ་ ཡོན་ཆ་ཁྱབ་དཔེ་གཏམ་ཆ་ཡི་ དོན་དག་ད་ས་ང་ ཁ་ཀོ་ས་བུ་ཇི་དྲི་བ་གསུངས་མ་ད་དགོ་ ཁྱི་གིས་ཧ་གོ་ཡི་ལགས་བུ་ཇི་ཞུ་ན།

52 ཆོད་ནས་བོ་ཡི་ ཞིང་ཁམས་ཀྱི་རྒྱལ་སྲིད་ཆར་ཇི་དོན་ན་ བཀའ་ཁྲིམས་ཀྱི་སློབ་དཔོན་ཆ་ཡི་ རིན་གོང་བྱིག་པ་ལ ་གི་རྒྱུ་ནོར་ན་ཁན་ལ་སྦྱིན་བདག་ཅོག་སར་ཡོན་ ཁྱི་གི་ཁྱི་རང་གི་བང་མཛོད་བླེ་ཁན་ལ་རྒྱུ་ནོར་གསར་པ་ནས་མན་པ་ ཀུ་ཡི་མེ་ལ་བུ་ཇི་ ཕང་ནང་ཆོང་དེ་ཇོག་སར་ ཡོན་བུ་ཇི་གསུངས་ན།

53 ཡེ་ཤུ་གི་དཔེ་གཏམ་ཚུ་ད་ས་ང་གསུངས་ཇད་མ་ ཁྱི་ལུང་ཕྱོགས་ཆ་ཡི་ནས་བྱོ་ང་ཇི་ཇོན་ན། 54 ཁྱི་རའི་ཡུལ་རྐོང་ནང་བྱོན་ཇི་ སི་ན་གོག་ཆེ་ན་ཁྲོས་གནང་མེ་ལ་བུ་ཇི་ འགོ་བཙུགས་གནངམ་ད་ ཁྱིད་ནས་ཁྲོས་ཉང་མི་ད་ས་ང་ཡ་མཚན་ཚེ་ན་ ཨོ་སོ་མི་ཆར་ཇི་ ཨོ་སོ་ཆོག་སར་ཤེས་རབས་ཆ་ཡི་ རྫུ་འཕྲུལ་ཆོང་མེ་ལ་གྱི་སྟོབས་ཤུགས་ཆ་ཡི་ ཨ་ཡི་ཉང་པ་ཡོན་ནམ། 55 ཁྱི་ཤིང་བཟོ་གི་བུ་ས་ཡོན་མེན་ནམ་ ཁྱི་གི་ཨ་མ་མཱོར་ཡམ་ ཁོ་གི་སྤུན་ཆ་ ཡ་ཀོབ་ནས་ ཡོ་སེབ་ སི་མཱོན་ ཡུ་དཱས་ཆ་ཡི་ཡོན་མིན། 56 ཁྱི་གི་ཉོ་མེ་ད་ས་ང་ ངད་ནེ་དེ་རེ་ ཆོར་བུ་མ་དཝ་མི་ཆར་ཇི་ ཨ་སོ་ད་ས་ང་ཨ་ངི་ཡམ་པ་སོ་ཡ་ བོ་ར་ཐེ་གི་ཐེ་ནང་དྲིས་ཇི 57 ཁྱི་གིས་ཁྱི་ར་ནང་སྣང་མེད་བརྩིས་ཇི་ ཆ་མ་བླེ་ན་ ཆོད་ནས་དཀོན་མཆོག་གི་ཁྱི་དོ་ ས་ཕྱོགས་གཞན་ན་ལུང་སྟོན་པ་ནང་ཞེ་ས་བུ་ས་ཡོན་ ཆ་ཡི་བུ་མ་ རང་གི་རྐང་ནང་ རང་གི་མ་ཡི་ནང་གི་བཟག་ཚང་ཚུ་གིས་ ལུང་སྟོན་པ་ནང་ལུ་ཞེ་ས་མི་བུ་ཟེར་གསུངས་ན།

58 ཁྱི་ཡེ་ཤུ་ན་ དད་པ་མ་སྐྱེདཔ་ནས་བརྟེན་ཇི་ ཁྱི་འོ་སོ་ན་ རྫུ་འཕྲུལ་ལེ་ཤ་ཆོང་ཇི་མ་གནང་ན།