1 ཆོད་ནས་ དུས་ཡོན་ཐེ་གི་སློབ་མ་ཆུ་ ཡེ་ཤུ་སྐུ་མདན་ར་ བོ་ཡང་འོང་ཞི་ ཞིང་ཁམས་ཀྱི་རྒྱལ་སྲིད་ནང་ན་ མཐོ་ཤོས་ཆ་ཡེ་ ཨ་ཡེ་ཡོན་ནམ་ བུ་ཇི་ཞུཝ་མ་དོག།

2 ཆོད་ནས་ཡེ་ཤུ་གི་ ཨོ་ང་ཆིང་ཀུ་ཐེ་ཚོར་འབོ་ཞི་ན་ ཁྱི་ན་ཁྱི་གི་སྦུག་ནང་ བླེ་བུ་ཇི་ཁྱི་དོ། 3 ཡེ་ཤུ་གི་ ང་དོ་ ཁྱི་དོ་བདེན་པ་བུ་ཇི་ སླབ་ཏ་ཡོན་ ཨོ་ང་ཆིང་ཀུ་ལ་མཆོག་སར་ཆེ་ན་ སེམས་འགྱུར་ཆུ་ནང་ནས་ ཁྱི་གི་ཞིང་ཁམས་གྱི་ རྒྱལ་སྲིད་ཆེ་ཡེ་ནང་ན་ འཇུལ་མི་ལ་ཆ་ཡི། 4 ཆོད་ནས་ ཆ་ཡེ་ཐོ་རོ་བུ་ཇི་ ཨོ་ང་ཆིང་ཀུ་ཆ་ཇི་ བོ་དོ་ཉམ་ཆུང་བུ་ཇི་ འགྱུར་ཆག་ནང་ནས་ ཞིང་ཁམས་ཀྱི་ རྒྱལ་སྲིད་ཆེ་ཡེ་ནང་ན་ སྦོམ་ཤོ་ཆ་ཡོན། 5 ཆོད་ནས་ཨ་ཡེ་ཡོན་སང་ ང་ཡེ་མིང་ཐོག་ན་ ཨོ་ང་ ཆིང་ཀུ་ལ་ཅོག་ཤར་དོན་ན་ ཁྱི་ཡེ་འབྱོན་པ་བུ་ནང་ནས་ ང་དོ་ཡང་ འབྱོན་པ་བུ་སར་འན་བུ་ཇི་ན།

6 ཆོད་ནས་ ཨ་ཡེ་ཡོན་སང་ ང་དོ་དད་པ་སྐྱེད་ཇི་ ཨོ་ང་ཆིང་ཀུ་ལ་ མཆོག་སར་ནས་ བོའི་ང་དོ་ ཨོ་ར་ཐེས་ན་དད་པ་ སྐྱེད་ནང་ནས་ ཆ་ཡེ་བོ་དོ་ དད་པ་མུད་ རང་འཐག་གོར་བྱིག་པ་ལ་འདི་ ཐེག་ཇི་ ཨོལ་ལྐོག་ནང་ཐག་པ་ བཏགས་བུ་ཇི་ གྱ་མཚོ་ན་ངོ་ ཐིམ་སག་ས་བུ་ད། 7 ཨ་སོ་འཇིག་རྟེན་པ་ཆེ་ན་ཨ་ཏོར་ཏི་ ལཱ་ཁག་བརྐྱབ་མེ་ལ་ཡོ་ ཞ་བོ་བུ་ནང་ནས་ མི་ཆར་ཇི་རྒྱུད་ནས་བུ་ཇི་ མི་ཚུ་ལུ་དད་པ་ཉམས་བཅུག་ས་ཡོན་ དད་པ་ནང་བར་ཆད་ར་ར་ ར་ས་ཡོན་ ཆ་ཡི་བུ་མ་ མི་གཞན་ན་བར་ཆད་བླེ་ཁན་ཆེ་ནང་ ཨ་ཏོར་ཏི་ཆད་པ་བྱོད་མེ་ལ་ཡོ།

8 ཆོད་ནས་ ཨ་ཏོ་ཏི་བུ་ཇི་ཁྱི་ར་གི་ཡག་གི་ ཨ་ཡེ་ཡོན་སང་ ཐ་བ་གི་ ཡིན་སང་ཁྱི་དོ་ སྡིག་པ་བུ་ནང་ནས་ ཆ་ཡེ་བཏུབ་ ཙ་ང་ཡེ་བུ་ཇི་ན་ཡག་ཇོན་ན་ ཡང་ན་ ཐ་བ་ཇོན་ བཏུབ་ ཙ་ང་ཡེ་བུ་ཇི་ མིའི་དམྱལ་བར་ན་ ག་ཡེ་བ་འདི་ ལག་ལྡུམ་བུ་ཇི་ ག་ཡེ་ནས་ རྐང་ཞརཝ་བུ་ཇི་ དྲག་བུ་ཇི་ན་ ཞིང་ཁམས་ན་ག་ཡི་པ་འདྲ། 9 ཡོད་ཀྱི་མིག་ཐེ་ནང་ ཡོད་དོ་སྡིག་པ་བུ་ས་འརན་ མིག་ཆ་ཡི་ཆོང་ཆ་ང་ཡི་ ཡོད་མིག་ཇོན་བུ་ཇི་ དམྱལ་བ་ག་མི་ནང་ག་ཡི་པ་བ་འདི་ མིག་ཐེ་བུ་ཇི་ཞིང་ཁམས་ལུ་ག་ཡི་པ་འདྲ།

10 རིག་པ་གིར་མེ་ ཁྱི་གི་ ཨོ་ང་ཆིང་ཀུ་ནས་ ཐེ་ལུ་སྨད་པ་ མ བརྐྱབ་ ཞ་བོ་བུ་ནང་ནས་ ང་ཡི་སླབ་ད་ བོད་བདག་འཛིན་ཐབ་ཁན་ལ་ཕོ་ཉ་ཆ་ཡི་ ཨ་སང་ར་ ཡརཝ་ཞིང་ཁམས་ནང་ ང་དོ་ཡབ་ཀྱི་སྐུ་མདུན་ན་ ཨོ་ང་སྐོར་ནས་གསུང་གྲོས་ནང་ད་ཡོན་བུ་ཇི་ གསུངས་ན། 11 * ཆ་ཡི་ན་ མི་བུ་མན་ཁ་ན་ཆ་ཡི་ འཚོལ་དུ་ར་ས་ སྐྱབས་བུ་རུ་ར་ས།

12 ཡོད་མནོ་བསམ་ཨ་ཏོར་བླེད་པ་ དཔེར་ན་མི་ཐི་ནང་ ཡུག་ཁ་ཡ་ང་ནང་ན་ནས་ ཆར་ཇི་ག་ཡི་ནས་ ཡུག་ཐེ་མ་ཉང་ནས་ ཁྱི་ཨ་ཏོར་བུ་ཡོ་ ཁྱི་ཡུག་ཁ་ཡི་བླེ་ནེ་ཆེ་དོ་གོ་ ཆ་ཡི་རི་ན་བླེག་ཇི་ མ་ཁན་ལ་ཡུག་ཆ་ཡི་འཚོལ་ཇི་མི་ག་ཡི་ཡ། 13 ང་ཡི་དོ་དོན་ལ་ར་སླབ་ཏ་ཡོན་ ཁྱི་མ་བྱུང་ཁན་ཡུག་ ཁ་ཡི་བླེ་ནེ་ཆེ་དོ་གོ་ ཆེ་ན་བ་ བྱོང་ཇི་ཉ་ཁན་ལ་ཡུག་ཆ་ཡི་ སེམས་དགའ་ཇི་ དགའ་ཚོར་སྐྱེད་ར། 14 དཔེ་གཏམ་ཆ་ཡི་ཅོག་སར་བུ་ཇི་ར་ ཡོད་ར་ཀྱི་ཞིང་ཁམས་ཀྱི་ཡབ་ནང་ ཨ་སོ་ཆིང་ཀུ་ཐེ་ནེ་ར་ བྱང་སྟོར་བཞུགས་ཁན་ལ་ ཐུགས་དགོངས་མུད་བུ་ཇི་ ཡི་ཤུ་གི་གསུངས་ན།

15 ད་ཡོ་ ཨ་ཏོར་ཏི་བུ་ཇི་ ཡོད་ཀྱི་དད་པ་ཅན་གྱི་སྤུན་ཆ་གིས་ ཡོད་དོ་འཛོལ་བ་བུ་ནང་ནས་ གཞན་མ་མ་བརན་བོད་ ཁྱི་ནག་ས་རོ་ག་ཡི་ཇི་ ཁྱི་སྐྱོན་ཆོང་ཇི་སླབ་བྱ་བུལ་ ཁྱི་ཡོད་བསླབ་བྱ་ཉན་ནང་ནས་ ཡོད་སྤུན་ཆ་ག་ཡི་ནས་ ཡམ་འཛོལ་བ་ནང་ནས་ ལོག་ཉང་ད་ཡོན། 16 ཨ་ཏོར་བུ་ཇི་ཡོད་སླབ་ཁན་མ་ཉང་ནང་ནས་ ད་རུང་མི་ཐེ་ ཡང་མི་ཇོན་པ་འདི་ ཡོད་དེ་རེ་ཁྱི་ཇི་ཁོ་ལེ་ མི་ཇོན་ཡང་ན་གསུམ་འཛོམ་དཔང་བུ་ཇི་ སླབ་ཁན་ལ་ལོ་རྒྱུས་ཆ་ཡི་ དོན་ལས་ར་བརྩི་ར། 17 ཨ་ཏོ་ཏི་བུ་ཇི་ ཁྱི་གི་ སླབས་པའི་གི་གཏམ་ན་ ནཝ་མ་ཉན་སར་ འ་ནང་ནས་ ཆོས་ཚོགས་དམང་ནང་ སྙན་འབུལ་ཞུ ཨ་ཏོ་ཏི་བུ་ཇི་ ཆོས་ཆོགས་དམང་ནང་ཡང་ ཁྱི་གི་ ནཝ་ཡ་མ་ཉན་སར་འན་འང་ནས་ ཁ་ཡི་བསྡུ་ཁན་ ཡང་ན་ དཀོན་མཆོག་དང་གཞན་འབྲེལ་མེ་མུ་ཁན་ཆ་ཡི་ མི་བུ་རྩི་དགོ།

18 ང་ཡི་ཡོད་དོ་དོན་ལ་ར་སླབ་ཏ་ཡོན་ ཡོད་ཀྱི་འཛམ་བུ་གླིང་ད་དམ་སང་ ཞིང་ཁམས་ནང་ཡང་དམ་ད་ཡོན་ ཡོད་འཛམ་བུ་གླིང་ནང་ཞ་ཁྱི་སང་ ཆེ་ ཞིང་ཁམས་ན་ཡང་འཁྱོལ་ཆུགས།

19 ད་ར་ཁྱི་དོ་སླབས་ཏ་ཡོན་ འཛམ་བུ་གླིང་ནང་ཞ་ཇུ་མེ་ལ་ཡོ་ ཡོད་གྲལ་ཁ་ནས་ ཇོན་ཁ་འཆམ་ནང་ནས་ ཞིང་ཁམས་ནང་ཞུ་ཁན་ཆ་ཡི་ ང་ཡི་ཡབ་གྱི་གནང་མེ་ལ་ཡོན། 20 ཆོད་ནས་ཨ་ཏོར་བུ་སང་ མི་ཇོན་ཡང་ན་གསུམ་ ང་ཡི་མིང་ནང་འཛོམས་ས་འརན་ ང་ཡི་ ཁྱི་སྦུག་ན་ ར་ཇི་ཉེ་མ་ལ་ཡོན་བུ་ཇི་གསུངས་ན།

21 ཆོད་ནས་ པི་ཏྲོ་ ཡེ་ཤུ་བཞུགས་སར་ཅར་ཇི་ གཙོ་བོ་ལགས་ ང་ཡི་ཨ་ཅོ་ནས་ནུ་མེ་གི་ ང་དོ་ཡས་བཀའ་ཅིན་མ་བུ་ནང་ནས་ ང་ཡི་ཁྱི་ཨ་ཏོར་ཏི་བཀའ་དྲིན་བསྐྱང་མེ་ལ་ཡ་ ཆར་ཉིས་གྱི་པད་ག་བུ་ཇི་ཞུ་ན།

22 ཆོད་ནས་ཡེ་ཤུ་གི་ལན་ན་ ང་དོ་ཁྱི་ལུ་ ཆར་ཉེས་བཀའ་དྲིན་བསྐྱང་བུ་ཇི་སླབ་མིན་ ཆ་ཡི་བུ་མ་དཝ་ བདུན་བཅུ་བུ་འརན་ཚར་ཉེས་ཚུན་ཚོད་ བཀའ་དྲིན་བསྐྱང་དགོ་བུ་ཇི་གསུངས་ན། 23 ཆ་ཡི་ནས་བརྟེན་ཇི་ ད་རུང་ཆར་ཇི་དཔེ་གཏམ་ཆ་ཡི་གསུངས་ན་ ཞིང་ཁམས་ཀྱི་རྒྱལ་སྲིད་ཆ་ཡི་ རྒྱལཔོ་ཁྱི་ར་གི་ གཡོགཔོ་ནས་བུ་ལེན་ལོག་ཉོང་ད་ཆོག་སར་ཡོན། 24 བུ་ལོན་སྤྲོད་མ་ལ་ནག་པའི་ཆ་ཡི་ རྒྱལཔོ་སྐུ་མདུན་ན་ན་འོ་ཇི་ བོ་ཡི་བུ་ལེན་རྩིས་རྐྱབ་མ་ད་དགོ་ ཆར་ཇི་གྲལ་ཁ་ནས་ གསེར་གི་པེ་ཆུང་སྟོང་ཕྲ་བཅེ་ སྤྲོད་དགོ་ཡོན་ད། * 25 མི་ཆ་ཡི་བུ་ལོན་སྤྲོད་མ་ཚུགསཔ་བརྟེན་ཇི་ སྦྱིན་བདག་གིས་ཁྱི་རང་ཨ་མ་ནས་ཨོ་ང་ ཆོད་ནས་ཁྱི་ར་ནང་ག་ནག་པའི་ ད་ས་ང་མུ་ཡི་ཇི་ བུ་ལོན་སྤྲོད་དགོ་ས་བུ་ཇི་བཀའ་གནང་ན། 26 ཆ་ཡི་བུ་མ་མི་ཆར་ཇི་ སྦྱིན་བདག་པུ་མོ་ས་ཁར་བཅུགས་ཇི་ ང་དོ་ཐུགས་གི་བཟོད་པ་བཞེས་ལེ་ ང་ཡི་བུ་ལེན་ཆ་ཡི་ད་ས་ང་ལོག་ཇི་ ཕུ་ཡི་ར་བུ་ཇི་གསུངས་ན། 27 ཆོད་ནས་སྦྱིན་བདག་གིས་བུ་ལོན་ཁོར་ཁན་མི་ཕྱག་སྒརཔ་ཆེ་ན་ སྐྱིད་སྡུག་གཟིགས་ཇི་ ཁྱི་བུ་ལེན་ད་ས་ང་ དགོངས་ཡངས་གནང་ཇི་ ལོག་ཇི་བླེད་ན།

28 ཆ་ཡི་བུ་མ་དཝ་ ཕྱག་སྒརཔ་ཆ་ཡི་ ཆ་ནེ་བྱོང་ག་མ་ ཁྱི་གི་ཆ་རོགས་ཕྱག་སྒརཔ་ཐེ་གི་ ཁོ་ལུ་དངོས་ཐ་ལ་ ཁ་ཡ་ང་སྤྲོད་མེ་ན་ཁན་ཆར་ཇི་དོམ་ཇི་ ཁྱི་ཆ་རོགས་གི་ཏག་པ་ནས་ ཇོང་ན་ ང་ཏི་རུ་ལོག་བའི་བུ་ཇི་སླབ་ཇི་ བང་བཙོངས་ན། 29 མཉམ་རོགས་ཆར་ཇི་ཁྱི་གདོང་ངོ་ པུས་མོ་ས་རོ་སོ་བྱི་ ཆོར་མ་འབད་ ང་དོ་དུས་ཚོད་ཐེ་ག་དོ་གནང་ངེ་ ང་དེ་མགྱོགས་པ་ར་སྤྲོད་ར་བུ་ཇི་གསོལཝ་བཏབ་ན། 30 ཆ་ཡི་བུ་མ་ ཁྱི་གི་དུས་ཚོད་ཕྱེ་ཀ་ཐེ་ཡང་མ་བུལ་ས་ མི་ཆ་ཡི་བཟུང་ཇི་ བུ་ལོན་ད་ས་ང་མ་སྤྲོད་བར་དོ་ བཙན་ནང་སོ་ཇི་བླེ་ན། 31 ཁྱི་ཆར་བུ་ས་རོ་ ཕྱག་སྒརཔ་གཞན་མི་གི་མཐོང་མ་ ཁྱི་གནམ་མེན་ས་མེད་སེམས་པམ་ན་ ཆོད་ནས་ཆར་ཇི་སྐོར་ནས་ ད་ས་ང་སྦྱིན་བདག་ནང་ཞུ་ན། 32 ཆོད་ནས་སྦྱིན་བདག་ གིས་ཕྱག་སྒརཔ་ཆ་ཡི་ བྱ་ཇི་ ཨ་ཁ་འི་མི་ངན་པ་ཆ་ཡི་ ཡོད་ང་དོ་གསོལཝ་བཏབ་མ་ ང་ཡོད་དོ་ཁྱི་བུ་ལོན་ད་ས་ང་དགོངས་ཡངས་བླེད་པ། 33 ཆོད་ནས་ང་ཡེ་ ཁྱི་དོ་ སྙིག་རྗེ་ སྐྱེད་མ་དོག་ ཆ་ཡེ་ཅོག་སར་ ཁྱི་གི་ཡང་ ཁྱི་ར་གི་མཉམ་རོགས་ནང་ ཞ་བུ་ཇི་སྙིང་རྫེ་མ་སྐྱེད་པ་ཡོན་བུ་ཇི་ གསུང་ན། 34 ཆོད་ནས་སྦྱིན་བདག་ཆ་ཇི་ དགོངས་ཁྲལ་ཇི་ བུ་ལོན་ཆ་ཡེ་ མ་འབྱོར་ཆོན་ཆུད་ ཁྱི་བཙོན་པ་སྲུང་ཇི་ ཡག་ན་སྤྲོད་ཇི་ པོ་གོ་བུལ་ན་ བཙོན་ནང་སོ་བླེད་ན།

35 དཔེ་གཏམ་ཆ་ཡི་ཆོག་སར་ ཁྱི་ཡོད་ར་སྤུན་ཆ་གི་འཛོལ་བ་ སེམས་ཀྱི་གཏིང་ལས་ར་བཀའ་དྲིན་མ་སྐྱང་ར་ ཞིང་ཁམས་ནང་ཞུ་ཁན་ ང་དོ་ཡབ་ཀྱི་ཡང་ ཡོད་དོ་འོ་སོ་ཇེ་ར་བུ་ཇི་གསུངས་ན།