1 Akaakolinto 12

Mmili ghumu na hibhungo hitangalo.

12 Handa bhula mmili ghwa mundu ghungubhegha na hibhungo hitangalo, na hibhungo ahyo hyoha payibhele ndo hitangalo, hingutenda mmili ghumu, ndo muyibheghite kwa mmili ghwa Kilisito. 13 Mana mu Nhuki yumu, twabhoha tukibatiswa mu mmili ghumu, handa Akaayahudi ebu bhandu bhaabheghite ng’obhe Ayahudi, handa abhandwa ebu twabhandu tulekekehitwe, twabhoha twenga tukipeghwa Nhuki yumu.

14 Hino, mmili ghubhumbwa ng’obhe kwa kibhungo kimu, ngati ghubhumbwa kwa hibhungo hitangalo. 15 Handa kighulu kingalongelite, "Kukita nenga chepa kibhoko, nenga chepa ghwa mmili." Bhuli, kulongela habhu, akyo kighulu kyangalepelitwe kubhegha kipalamande kya mmili. 16 Na handa likutu lyangalongelite, "Kukita nenga chepa liho, hinu nenga chepa ghwa mmili" Alyo likutu lyangalepelitwe kubhegha kipalamande kya mmili. 17 Handa mmili ghwoha ghungabheghite liho, twangahotolite kuyihwa? Ebu handa mmili ghwoha ghungabheghite likutu, mundu kangahotolite kunuha? 18 Peni handa muyibheghite, Chapanga kabhika hibhungo hya mmili handa pakapalite ywombe. 19 Handa hibhungo hyoha hya mmili hingabheghite mmili ghumu, mmili ghungabheghite kwoki? 20 Peni hinu, hibhungo hya mmili ndo hitangalo, ngati mmili ndo ghumu.

21 Hino, liho linguhotola ng’obhe kukighombela kibhoko, "Nungukupala ng’obhe ghwenga." Bhubho mutwe ghunguhotola ng’obhe kuyighombela mighulu, "Nunguapala ng’obhe mwenga." 22 Peni kihyengo kyake, hila hibhungo hya mmili hiibhonekana hiyoyoho na ndo hinakunoghwa muno. 23 Kangi, hila hibhungo hya mmili hituhihwachila kukita hya kuyuyuhwa, ndo tunguhipegha uhokamo nkulu. Hila hibhungo hya mmili tunguhihwachila hingubhonekana hinguyegha honi, ndo tunguhihiha kwa kighweka, 24 pala hibhungo hiyangayegha honi hingunoghwa ng’obhe kugubikwa handa hibhungo hingi. Chapanga mwene kahipangila unyanyi hibhungo mu mmili, hibhungo hinakiyuyuhwa kahitenda hihokamilwe. 25 Kukotoke kubhegha na nng’abhaniko ghwa mmili, peni hibhungo hyoha hitangatilane telatela kimu kwa kiyake. 26 Handa kibhungo kimu kingubhina, hibhungo hyoha ghubhina pamu na kibhungo akyo, na handa kibhungo kimu kingutikwa, hibhungo hyoha hinguyelelwa papamu na kibhungo akyo. 27 Hino, mabhoha mwenga ndo mmili ghwa Kilisito, na kila yumu mu mwenga ndo kibhungo kya mmili aghwo.