Lucas 16

Yunautopelo na Lasalo

19 Yesu kakighendelela kulongela, "Pakibhegha na yunautopelo yumu ywakahwaliteghe mapinda gha ghalabha ngulu munu mapinda gha langi ya samalati na mapinda mahuhu, na pakitendekeha chekwa mumanjubha ghoha. 20 Pala pa nnlyango ghwake kakibha kapukwa yumu ywakayeghiteghwe apwo, lihina lyake Lasalo, ywakabheghite hilonda mu mmili ghwake ghwoha. 21 Aywo Lasalo kakihyubhalila kulyegha mahighalo ghaaponikite ku kindangabhala kya aywo yunautopelo. Mbaka akabhwa bhakihika na kumyanga hilonda hyaki. 22 Lisaa palikihikite, yula kapukwa kakihwegha, na mahoka bha Chapanga bhakintola na kunbhika kakatame papamu na Ibulahimu. Yula yunautopelo naywo kakihwegha na bhakinkulila. 23 Yula yunautopelo pakabheghite kumambe mukimbamanda, kakilolekeha kunani naywo kakimmona Ibulahimu kya kutali, naywo Lasalo kakibhegha ugheghela naywo. 24 Hino yula yunautopelo kakinkema, ‘Tate Ibulahimu, ghunmonele luhungu, na ghunlaghile Lasalo kakichwike kikonji kyake mu machi ngati kalughupohe lulimi lwangu, kiyaha nungupungwa muno mu mwoto aghu.’ 25 Peni Ibulahimu kakinnyanga, ‘Mwana ghwangu, ghulikulungwe kukita paghubheghite kukali ghubhegha na ubhumi ghukihumbula mihalu ya maha, peni Lasalo kakimokola mihalu ya uhakata. Peni hinu nungunyonjokeha mwoyo apa na ghwenga ghubha na kibamanda kikulu. 26 Hata habhu, pakati yetu libhegha libhumba likulu, ngati bhala bhaapalite kubhuka akwo na kuhika kunu kakotoke ahotole, ebu mundu ywohele kakotoke kuyomboka kuhika kunu.’ 27 Ndo yula yunautopelo kakilongela, ‘Hinu, nungukuyupa, ghunlaghile Lasalo kaghende ku lubhagha lwa tate ghwangu, 28 kiyaha mmegha na alongo nhano. Kakaakinye ngati akotoke kuhika kunu kuhimbamanda.’ 29 Peni Ibulahimu kakinnyanga, ‘Alongo bhako abhegha na Matyeko gha Musa na ambuye bhangi bha Chapanga, aghatughile agho.’ 30 Yula yunautopelo kakilongela, ‘Ng’obhe, tate ghwangu Ibulahimu, handa mundu kaahyuka kuhuma kumambe kataahikila, bhaalipetula ulemwa na kummuyila Chapanga.’ 31 Peni Ibulahimu kakinng’ombela, ‘Handa bhaayitikila ng’obhe malaghilo gha Musa na Ambuye bhangi bha Chapanga, bhaahotola ng’obhe kunnyihwa hata paanyeghelehwa mundu ahyukite kuhuma kumambe.’ "