1 Muh wuchii wù le wu bɛɛŋ lɛ Jiso le Mbvusɛ wù Nyo gɛ̀ ka, wu le mboyɛ wu Nyo. Muh wuchii wù koŋe muh, le wu koŋe tɛ mboyɛ wu mwɛdɛ. 2 Fiɛɛ fì gee fɛ besabɛŋ kee lɛ besabɛŋ koŋe booŋ ba Nyo le sege besabɛŋ koŋe Nyo bee gee fiɛɛ fì banchi be duu. 3 Bɛŋ kêe lɛ ki besabɛŋ koŋe Nyo le ki bee gɛ̂ɛde banchi be, gɛ banchi be nyu bvujijɛ gɛ, 4 nje muh wuchii wù le mboyɛ wu Nyo le wu soo lo woŋ kfunɛ. Besabɛŋ soo woŋ kfunɛ nyu bɛ mbɛmɛ wese besabɛŋ. 5 Muh wù soo woŋ kfunɛ le wù la? Gɛ nyu wɛɛ wù le wu bɛɛŋ lɛ Jiso le Mwa Nyo gɛ?

6 Jiso Kletu gɛ̀ to yi woŋ kfunɛ le, fe yi joo bɛ yi kilɛmɛ le. Gɛ wu gɛh fe nyu yi joo le maa gɛ. Wu gɛ̀ fe yi joo le bɛ yi kilɛmɛ le. Kiyo ki Yuude lɛme jiŋ yi nsa wu fiɛɛ finɛ le nje Kiyo jɛme nchiɛɛŋ. 7 Mwɛɛ le yu muntɛde mù lɛme jiŋ yi nsa wuyu. 8 Mwɛɛ munɛ le Kiyo ki Yuude, joo bɛ kilɛmɛ. Mwɛɛ mù muntɛde munɛ muchii le yi fiɛɛ le fimimia. * 9 Besabɛŋ to be bɛme fiɛɛ fì muh wu wuŋ jɛme besabɛŋ le. Geenɛ, fiɛɛ fì jɛme Nyo fi jiji fi fede fi muh wu wuŋ. Bɛŋ kêe lɛ fi finɛ fiɛɛ le fiɛɛ fì jɛme Nyo besabɛŋ le, wu lɛme jiŋ yi nsa wu Mwa ye. 10 Muh wù le wu bɛɛŋ Mwa Nyo le wu kɛme fiɛɛ fì Nyo jɛme finɛ yi ye ye le. Muh wù baaŋ bɛɛŋ gɛ Nyo le gɛ, wu fɛde lɛ Nyo nyu muh wu chimbiaŋ, nje wu baaŋ bɛɛŋ gɛ fiɛɛ fì jɛme Nyo besabɛŋ le kune Mwa ye gɛ. 11 Njɛmɛ wù Nyo wunɛ le lɛ Nyo le wu nya besabɛŋ bɛ kinche kì kage gɛ, kinche kinɛ jade yi Mwa ye le. 12 Muh wù kɛme Mwa Nyo yi ye ye le kɛme kinche kiyu, muh wù kɛme gɛ Mwa Nyo yi ye ye le gɛ, tu gɛ wu kɛme kinche kiyu gɛ.

13 Nsaŋe mwɛɛ munɛ bɛŋ ba bɛɛŋ wa Mwa Nyo le, wu lɛ taŋlo bɛŋ kɛ̂ɛ lɛ bɛŋ kɛme wa kinche kì kage gɛ. 14 Gɛ besabɛŋ kɛme nfaaŋ ki bee kɛ̂ŋse bee gɛɛne fwe fɛ Nyo le bee lɛge fiɛɛ a wu le gɛ, nje besabɛŋ lɛge fiɛɛ a wu le bee bii no wu goone, wu yu fiɛɛ fì besabɛŋ jɛme. 15 Nɛ besabɛŋ kee lɛ wu yuge fiɛɛ fì bee jɛme sege besabɛŋ lɛge mo nyu la a wu le, besabɛŋ mo be kêe tɛ lɛ besabɛŋ le bee kɛmɛ wa fiɛɛ fì bee lɛge a wu le.

16 Nɛ muh yɛŋ mwa bwee gee kimbefɛ kì taŋlo ki gɛ ge wu kwe lo gɛ, wu lɛgɛ lɛ Nyo nyâ kinche wu le. Finɛ nyu fɛ muh wù kimbefɛ ke taŋlo ki gɛ ge wu kwe lo gɛ. Kimbefɛ kimi le yu kì taŋlo ki ge muh kwe lo. Gɛ njɛme lɛ muh bûune fɛ kikɛɛ le gɛ. 17 Gee chì befe chichii le kimbefɛ, geenɛ kimbefɛ kimi le yu kì taŋlo ki gɛ ge muh kwe lo gɛ.

18 Besabɛŋ kee lɛ gɛ muh wù le mboyɛ wu Nyo taŋlo wu mɛ̂ gɛh wu gee bimbefɛ gɛ, nje wuwɛɛ wù gɛ̀ bee Mboyɛ wu Nyo chiɛɛji wu, gɛ muh wu kimbefɛ wɛɛ taŋlo wu ka wu kuŋ wu le gɛ. 19 Besabɛŋ kee tɛ lɛ besabɛŋ le bamii ba Nyo, bamii ba le ba yi woŋ kfunɛ le bachii nyu chiaaŋ yi muh wu kimbefɛ wɛɛ le.

20 Besabɛŋ kee lɛ Mwa Nyo le wu to wa wu gwenyɛ bvufee bwesa besabɛŋ ki bee kɛ̂ɛ wu wù Nyo wù nchiɛɛŋ. Besabɛŋ le yi ye ye le, nyume nchiɛɛŋ no besabɛŋ le yi Mwa ye wù Jiso Kletu le. Le wu wù Nyo wù le kinchiɛɛŋ wu nyu kinche kì kage gɛ.

21 Booŋ baŋ, bɛŋ yɛ̂ne kune banyo ba achiji.