Apocalipse 15

Baŋgɛ ba bvusooshwi ba le ba kimɛsɛ

1 Ŋka nja n’yɛŋ kfuu chi fiɛɛ fi jwe wù yunɛ fimi le fɛwe, nyu lo kiŋgha ki fiɛɛ kì baaŋ. Gɛ̀ bee banchɛndaa ba Nyo ba bvusooshwi bò kɛme baŋgɛ bvusooshwi ba le ba kimɛsɛ ki bo nyâ bamii le, nje bo banɛ le ba Nyo lé wu gê wu mɛ̂sɛ wu dûnyɛ shɛ́ŋ ye yì bɛɛne bo le.

2 Ŋka nja n’yɛŋ fiɛɛ fimi le fi fiɛɛnɛ joo yì baaŋ yimi yì le ba fiiŋsɛ bɛ ŋgu, yi yuude njɛ mijoo. Bamii bamu lɛme mbebe joo yì baaŋ yiyu le bo nyume bo so wa nyaŋ yì kuufe ye yɛɛ bɛ fimooso mo ajii a ŋwa a le jee chi nyaŋ yiyu. Bo gɛ̀ lɛme fo bo kɛme chikome chi Nyo chiaaŋ le, 3 bo yɛɛne ŋkee wu Musɛ wù muh lɛme wu Nyo bɛ ŋkee wu Mwa Shoŋ. Bo gɛ̀ yɛɛne lɛ,

"O Tada Nyo wù Kɛme Bvuŋga Bvuchii,

mwɛɛ mù wo gee le mù baaŋ bɛ mu kiŋgha.

Wo le Nfoŋ wu bituŋ bichii,*15:3 Baŋwa ba kege bamu kɛme lɛ, "Nfoŋ wù segechii", bamu lɛ, "Nfoŋ wu bamii ba le ba Nyo."

je yì wo gee mwɛɛ yo le yì chaaŋ bɛ yì nchiɛɛŋ.

4 O Tada, muh wù taŋlo wu gɛ ka wu fâane wo gɛ, ki wu tûme maŋkuŋ mwuŋ le yɛɛŋ?

Le gɛh wo maa wù yuude.

Bituŋ bichii lé bi gê bi tôo bi nyâa mbɛɛŋsɛ wù baaŋ wo le,

nje bo le bo yɛŋ mwɛɛ mù wo gee le mu nyume chaaŋ."

5 Ajiŋ ayu nja mbijɛ, n’yɛŋ ba gwenyɛ yeh yi kintanyɛ yì fɛwe nyume chuŋ yì duunyi lɛ Nyo le bɛ bamii. 6 Banchɛndaa ba Nyo ba bvusooshwi ba gɛ̀ kɛme baŋgɛ ba bvusooshwi baa mo bo bu yeh yi kintanyɛ yiyu le. Gɛ̀ bee bo jii njú yì baaŋ yi lale, bo kaaŋ chiŋ’wa yi gvûu le ba kɛnyɛ bɛ kichwa ki bige kì yɛɛde. 7 Fiɛɛ fimimia ŋgoo yi mwɛɛ mu wuŋe mù munɛh mwɛɛ mu mo mu nya bintee bvusooshwi banchɛndaa ba bvusooshwi baa le ba kɛnyɛ bɛ kichwa ki bige kì yɛɛde. Bintee biyu gɛ̀ bee bi yisɛ bɛ shɛ́ŋ yì bɛɛne Nyo wù le segechii wu kage gɛ. 8 Yeh yi kintanyɛ ja yi yisɛ lo bɛ munjige mù jade fɛ n’yulɛ wu Nyo le bɛ fɛ bvuŋga bwe le. Fi mo fi nyume lɛ gɛ taŋlo muh gɛ ka wu lêe yeh yi kintanyɛ yi Nyo le gɛ, gɛɛne bude no baŋgɛ ba bvusooshwi ba banchɛndaa ba Nyo ba bvusooshwi baa gɛ̀ kɛme ki bo nyâ bamii le bo ka.